Hoseya 5 - Mawu a Mulluku

¹ Nyu allupa mukutho, apellani maaru! Nyu Aisraele attheene, iwani. Nyu a mu nibanja noomwene, reyaani naaru! Mawaaka oollaka eneerewuumorellani ekaamba yawi nyuwaano mwakhanlle wonanko mullapa o Mizipa apaalle mureyille nthavi o mwaango wa Tabori.

² Oowukila ahiikatella wunchichi m'machimwiiwa, miyaano kineerewaallaka.

³ Kinnaadduwella Aefuremu ni Aisraele, khe awiipittheya wa miyaano. Aefuremu yaanararuwa nave Aisraele yahiiripiha.

Hoseya anachenjeza dda oraruwa

⁴ Mitteko ddiwa ddoonanara ddoowalla ettilla ddiwa ddoohokollweella wa Mullukwiiwa vawi munepa wooraruwa ori mwa alliwa nave khenadduwella dda Apwiya.

⁵ Wiitukhulla wa Israele tti omboni woomuvaanyiha. Ddawoona, Efuremu aneerokwakwatuwa ni omora ni machimwaaye. Nayeenettho Yuda aneereweera emoddamoddave.

⁶ Athu ennavelleella mukutho wa enkhosa ni wa eng'ombe vawaashaashani Apwiya koma khenaaphwanya vawi ahaavenyeravo.

⁷ Yaheera ddoohaaroromella Apwiya wawi aniiwattho khe a Apwiya. Vano Ehakallallo ya Wooneya wa Mweeri eneerowoononga vamodda ni emata ddiwa.

⁸ Ipani mapallapata akhoto o Gibea ni o Rama, achenjezeni athu a o Betaveni. Nyu athu a o Benjamini, hoollani!

⁹ Efuremu aneerotthattuwa ntepe va echiweruzo. Kinallalleya ddawoona wa nyu Aisraele attheene.

¹⁰ Apwiya enallota wi, “Oohoollella a o Yuda ennawana ekhoto wi esuse mwawaanjerera malire. Sika kineerowiithella owallaaka wonanko maaddi.

¹¹ Aefuremu ennanyingallelliwa, ennallakiwa ekaamba ya owiiwellella amodda.

¹² Kineerowoononga Aefuremu wonanko mmo enjenjete ddinoonongelliiwa ddoowara, kinaakhalle wonanko nikhwata nawunta va athu a o Yuda.”

¹³ “Vano Aefuremu yoonilliiwa wi enimavoriiwa nave Ayuda yoonilliiwa wi aakhalla ni makhwata, Aefuremwaayo yaaya wa Asiriya nave Ayuda yaarumiha othenga wa mwene muullupalli wi aakavihere. Koma khawora waachiriha apaalle ovolliha makhwatiiwa.

¹⁴ Kineerewaalluphella Aefuremu nave kineerewaapuramella Ayuda wonanko mukango. Kineerewaakhaddulla nave kineerovenyavo, khaavo anaawore waavullusa.”

¹⁵ Kineerohokollweella onipuroni waka ophiyera athwaaka ellakeyille nave yaambille okaashaasha. Mu ddookatamiha ddiwa, eneereweeseesa wi ekiphwanye.