Hoseya 4 - Mawu a Mulluku

Apwiya enamuhumullulla Israele

¹ Nyu Aisraele, iwani mawu a Apwiya vawi aakhalla ni mullatu ni ookhalla mwiillaponi. Mullatweene tti wawi mwiillaponi khamuri ororomelleya apaalle oreera murima nave khenamudduwella Mulluku.

² Ennallupella mwawoottha, ennallota ddawoottha, enniipha, enniiya ni oraruwa. Machimo aattepa nave enniiphanana.

³ Sika ekaambiiwa ettalla enaamoriiwa mwiillaponi nave attheene ookhallamo eneerokhwa vamodda ni enama ddamuhakani, epallame ddoovava ni ehomba ddamunyanja.

Apwiya enamuhumullulla allupa mukutho

⁴ Apwiya enallota wi, “Nyu allupa mukutho oolleka, ahikhallevo anaavaanyihe erive ello, ahikhallevo anaamwiipe mullatu mukhwaaye vawi mullatu ori variyari va nyuwaano ni miyaano.

⁵ Munnakwakwatuwa otthaana ni mahiiyu nave anamallotella enneera emoddamoddave. Kineeromoononga meenyu, Israele.

⁶ Athwaaka ennoonongeya ekaamba ya ohidduwella. Kineerewuukhootani wi muhikirumeyelle wonanko allupa mukutho ekaamba yawi mookhoota ohuddera dda miyaano. Mootiwalla malamulo a Mullukwaanyu vano miyaanottho kineerewaatiwalla aniinyu.

⁷ Mmo allupa mukutho yaatelliiwa tti mmottho yattepelliiwa ochimwa. Kineerotthattusa oriiheya wiwa wi okhalle owulliwa muru.

⁸ Ennaphwanyavo eyuuma yinchichi va ochimwa wa athwaaka nave ennapaalla wi athu echimwekeve.

⁹ Vano allupa mukuthwaayo kineeroweerella nnddo kinaaweerelleemi athu. Kineerewaallaka ekaamba ya makhallellwiiwa oonanara ni waahokollosella mitteko ddiwa ddoonanara.

¹⁰ Eneerekoocha koma khevonaka, eneerekoraruwa koma kheyaataka vawi ahaahiya Apwiya yiivelleella o ddooraruwa.”

Apwiya enahumullulla ollapella mafano

¹¹ Apwiya enallota wi, “Vinyo akhalle naari musha annoononga ezeru.

¹² Athwaaka ennaveka ezeru o nifano namuteekho nave ennoombesa ni ekopo ddiwa. Munepa wa oraruwa wohaahollosa nave voomuhiyani Mullukwiiwa aakhalla oohiroromelleya.

¹³ Ennavelleella mikutho m'miyaangoni, ennoosa lubani* mu asimiyaango, vatthi va miteekho ddoovattha monga muthundu, nnjalle ni munkhundi ekaamba yawi muuthuuchiiwa tti waphaama. Sika ekaambiiwa aniinyu aatthiyana ni avokohaanyu enararuwiiwa.

¹⁴ Koma ngaallaka aniinyu aatthiyana ni avokohaanyu ekaamba ya oraruwa wiwa. Vallethi allopwananyu ennararuwa ni mahule voollapellani nave munnaheraatthi mukutho vamodda ni alliwa. Athu oohikhalla ni ezeru ddiidda eneerewoonongeya.

¹⁵ Naari Aisraele ehiroromelleyaka, athu a o Yuda ehiphwanyeye ni mullatu. Ehiye woollapella o Giligala apaalle o Betaveni. Ehillupellettho vamiitthoni va Apwiya.

¹⁶ Aisraele tti eetiyamaaru wonanko asaanaang'ombe. Ethiyo Apwiya ttuuwaachiha wonanko asaanaankhosa va munyepu waphaama?

¹⁷ Athu a o Efuremu aapataana ni mafano, ddayiwa ddennddo.

¹⁸ Yalezela wunchichi ennararuwa. Ennaddivelliwa ddoowulliha muru okhwaranya oriiheya wiwa.

¹⁹ Eneerovenyihiwa wonanko ello yoovavihiwa ni ephevo nave eneerowullihiwa muru ekaamba ya mikutho ddiwa ddeelleto.”