Hoseya 3 - Mawu a Mulluku

Hoseya anamoopolla mwaariye

¹ Vano Apwiya yaakilleella wi, “Khawettho wamukonde mwaariyo ooraruwa oyo ari ni ezibwenzi ddaye. Omukonde wonanko mmo kinamukondelleemi Israele naari allapellaka milluku ddimodda ni ooddivelliwa ovelleella mikutho ddampesa wawumma.”

² Sika kaamutthellattho voomopollani ni makobiri khumi ni matthanu owaaka mitaanga mitthanu ni miilli ya barele.

³ Kaamulleella mutthiyanooyo wi, “Okhalleke ni miyaano mallapo manchichi, ohinakonaka apaalle oraruwa ni muthu mmodda. Miyaanottho kineereweera emoddamoddave yeeyo.”

⁴ Vawi Aisraele eneerokhalla mallapo manchichi ehinna mamwene apaalle enduna, oohivelleella mikutho apaalle wiimesa apoto oopatuleya, oohikhalla ni milluku dda mpa apaalle efodi.*

⁵ Vatulli viwa Aisraelaayo eneerohokollowa ni owaashaasha Apwiya Mulluku ni edduullu ya Davide mweniiwa. Enthawi yeeyo Aisraele eneerowoovattho Apwiya nave eneerewaakhella ddaphaama ddiwa.