Hoseya 14 - Mawu a Mulluku

Ohokollweella wa Apwiya

¹ Nyu Aisraele, hokollweellani wa Apwiya vawi mwaamora ekaamba ya machimwaanyu.

² Hokollweellani wa Apwiya ni mawu alla awi, “Munikhululukelle machimwaahu mattheene. Mwaapelle maaru oveka wahu nave nineerewuutitimihani ni eyano ddahu.

³ Asiriya khanivullusa, akavalo akhoto kheniteteza. Eyo nayipangilleehu ni mattaahu khaniwa niyiromolla wi, ‘Milluku ddahu.’ Vawi tti nyuwaano munaweerella echifundo anaamukhwelle.”

Apwiya enaalonjeza Aisraele okumi wanaanweene

⁴ Apwiya enallota wi. “Kineerochiriha ereetiiwa ya ohiroromelleya, kineerewaakonda ni murimaaka muttheene vawi koohiya waashella murima.

⁵ Kinaakhalle wa Israele wonanko nikame, aneerottaphulla malluwa wonanko kakombo, aneeromella misisi wonanko muteekho wa o Lebanoni.

⁶ Enthambi ddaye ddineerorapella wuuteete, aneerokhalla ooreera wonanko muteekho wa olivi, aneerewunkhella wonanko mukunguza wa o Lebanoni.

⁷ Israele aneerokhalla m'muuthuuchini waphaama, aneerokhalla ni ddawimma ddinchichi. Aneerewaata wonanko mpesa, eneerovuwa wonanko vinyo a o Lebanoni.

⁸ Ethiyo Aefuremu enaaweerena tini mafano? Tti miyaano kiniiwa ovekella wiwa ni waapwatha. Kiri wonanko mukunguza woophuwa enthawi ettheene tti miyaano kinaavaha ezipaso.”

Mawu oomallihella

⁹ “Oyo aniiwesese addisunge. Vawi ettilla dda Apwiya tti ddoolungama nave oolungama enneetamo koma oochimwa ennakwakwatuwamo.”