Hoseya 13 - Mawu a Mulluku

¹ “Khalle Aefuremu yallota, athu yaanatthukumella vawi yaanavahiwa olemu mu ellapo ya Israele koma yaalakwa voomullapellani Baala nave eneerokhwa.

² Vano enimachimwave, enniipangella mafano awoopiwa ni siliviiwa. Mafano mattheenaayo tti mitteko dda athu eeruso. Ennallota wi, ‘Velleellani mikutho wa yaalla nave mwaallapelle asaanang'ombaalla vawaakhupaarellani.’

³ Ekaamba ya yeella eneerothiima wonanko echifunga apaalle nikame nookamuwa mwawaakuva. Eneeromwareya wonanko mallulla oovenyera va nipuro noomuuputhellavo tirigu apaalle mwiisi wookhuma vaniwindoni.

⁴ Apwiya enallota wi, ‘Miyaano kookhalla Apwiya Mullukwaanyu ovenyera enthawi elle kuukhumihalleemini mu ellapo ya Iguputo nave khemwaaphwanenlle omudduwella mulluku mmodda koma meeneve nave oovullusaanyu tti meeneve.

⁵ Tti miyaano kuupwathilleni muchipululuni, ellapo yooviha.

⁶ Kahaachiha evona koma evonille yahiitukhulla nave yaakitiwalla.

⁷ Sika kineerewaalluphella wonanko mukango, kineerowiipitthella mu ettilla ddiwa wonanko nanthavi.

⁸ Kineerewaaphara wonanko echimbalangondo yawaakhiwa aniiwa, kineerewinttaka epararu ddiwa, kineerewaaparulla mowaashella murima wonanko mukango nave kineerewaakhaddulla wonanko enama yawoopiha.

⁹ Kineerowoonongani Aisraele. Ethiyo ttaani anaawukavihereni?’

¹⁰ Nyu mwallota wi, ‘Nivaheni mwene ni oohoollellaahu.’ Ethiyo mwene awi uuvullusenooyo ari wuuwi? Ethiyo oohoollellaanyu awi yuutetezenaayo eri wuuwi?

¹¹ Kahuuvahani mamwene moosha murima nave kahaavenyihavo moowalli.

¹² Onanara wa Aefuremu woomakelliwa vamodda machimwiiwa aasungeya.

¹³ Ddoovoreya wonanko dda mutthiyana aamuyaraka mwaana ddineerewaamorella. Koma tti wonanko mwaana oohikhalla ni ezeru, ookhoota okhumella otte va enthawaaye yooyariwa.

¹⁴ Ethiyo kaavulluse wa ookhwa, kiwoopolla wuukhwaani? We okhwa, mullillaawo ori wuuwi? Ethiyo mahame, woononga wawo ori wuuwi? Athu yaalla ngiweerellattho echifundo.

¹⁵ Naari Efuremu ahakallallille wonanko epango, ephevo ya wookhuma nndduwa, ephevo ya Apwiya eneerewoopa ovenyera ochipululuni. Sika aneetuutu eneerowelleella nave mathiyaaye eneerewumma. Adani eneerewoononga eyuumaaye yoowallamella mutengo.

¹⁶ Asamariya eneerollakiwa kaambiiwa yaamuwukila Mullukwiiwa. Eneerewiiphiwa ni nsupada, aniiwa eneerewiiphiwa mowaavaddiha miru ddiwa vatthi nave awariwa ookhalla ni erukullu eneerophulliwa.”