Hoseya 12 - Mawu a Mulluku

¹ Efuremu annavona mpweya, anathwara ephevo ya wookhuma nndduwa, nllapo nittheene annoonjera ddawoottha ni dda echiwawa. Annakeraatthiha echipangano ni Asiriya nave annaavelleella makhura o Iguputo.

² Apwiya ennawiipa mullatu athu a o Yuda, eneerewaallaka a mu nibanja na Yakobo ekaamba ya makhallellwiiwa nave eneerewaahokollosella moollikana ni mitteko ddiwa.

³ Aariiye m'mirimani mwa amennya Yakobo aaphara etotopwa ya mwanamunne nave unnuwalle mwamasiva aallipana ni Mulluku.

⁴ Yakobooyo aallipana ni mungelo nave aapambana. Ahinlla mooveka madaliso. Akumana ni Mulluku o Betele nave wenko oweella mwa olliye aallota ni hiyaano.

⁵ Yaalla sika Apwiya Mulluku Amasiva Mattheene. Athu emuupuwelleke ni nnddina naye nawi Apwiya.

⁶ Vano nyu attheene hokollweellani wa Mullukwaanyu. Mukhalle a echikondi ni oolungama. Nave mumuroromelleke Mullukwaanyu enthawi ddittheddene.

Mawu mamodda a echiweruzo

⁷ Apwiya enallota wi, “Israele tti wonanko ookulliha malonda ookhalla ni yoolingella yoolleka. Annakonda waaherulla athu.

⁸ Efuremu aallota wi, ‘Kootukhuwa, kookhalla ni eyuuma yinchichi, khaphwanya mullatu mwa miyaano va eyuumaaka.’

⁹ Koma mi tti Apwiya Mullukwaanyu oyo uukhumihalleni o Iguputo. Kineerewuukhallihanittho m'misasani monga mweerelleenyu mallapo akhalle muchipululuni mulle.

¹⁰ Kaallota ni anamallotella. Tti miyaano kawoonihelle masomphenya manchichi. Kaallota m'maphwanaphwaniho oweella mwa alliwa.

¹¹ Koma athu yallapella mafano o Giliyadi. Mafano yaalla eneerewoonongeya. Yaanavelleella mikutho dda eng'ombe o Giligala. Koma makuwiiwa kineerewaatthattusa malluku awuukelliwa m'matani.

¹² Yakobo aathawella mu ellapo ya Mesopotamiya wenko olliye aaphara mutteko woomullimella mutthiyana. Aanachiha enkhosa wi amutthelle mutthiyanooyo.

¹³ Apwiya yahaakhumiha Aisraele o ellapo ya Iguputo oweella mwa namallotella. Nave yaasungeya mwa anamallotellaayo.

¹⁴ Koma Aefuremu yaattatthamulla osha murima waka sika ekaambiiwa kinaawaallakeemi ni okhwa. Kineerewaallaka kaambiiwa yaakiwulliha muru wunchichi.”