Hoseya 11 - Mawu a Mulluku

Echikondi ya Mulluku va athwaaye oowukila

¹ Apwiya enallota wi, “Israele aariiye mwaana kaanamukonda, kaamwiithana mwanaka wi akhumewo o Iguputo.”

² Koma mmo kamwiithanelleemi, tti mmottho akithawelleeye, athwaaka yaanavelleella mikutho wa Abaala ni woosa lubani* wa mafano.

³ Komave tti miyaano kaahuddihalle Aefuremu weeta, kaawuupaara m'mattani mwaka koma kheyaadduwella wi tti miyaano kinaachiriha.

⁴ Kahaakokella wa miyaano mwa echifundo ni mwa echikondi, kahaatukhulla kaahameelliha nrama naka nave kaawarama kaachiha.

⁵ “Koma aakhoota ohokollweella wa miyaano sika eneerohokollweella wuukaporoni o Iguputo nave Asiriya aneerokhalla mweniiwa.

⁶ Ekhoto eneerewoononga mizinda ddiwa. Adani eneerewinttaka mikoko ddoollipa dda mipanda ddiwa ni owoononga ekaamba yoothwara malangizo a weekhiiwa.

⁷ Athwaaka aawanddeellella ddookiwukila. Vano eneerewinlla ekaamba ya nigoli* nno niri va alliwa koma khaavo anaawaavenyihelle.”

⁸ “We Efuremu, ethiyo kinaawuuhiye mwawiidde? We Israele, kinaawuutathille mwawiidde? Ethiyo kinaawuutthattuse mwawiidde wonanko Adima? Ethiyo ttuuwoononga mwawiidde wonanko Zeboimu? Murimaaka wookhoota, echifundwaaka tti yuullupalli va alliwa.

⁹ Nguullaka ni osha murima waka woowalli, ngimoonongattho Efuremu Mi tti Mulluku, ohikhalla muthu, miyaano aweella, kiri ni weyaano nave ngiwa kiwoononga.

¹⁰ “Kineerewaathurumella wonanko mukango nave athwaaka eneerokithwara. Kineerothuruma nave eneerokithamakella etthukumellaka ovenyera woovollowa nndduwa.

¹¹ Eneeroowa etthukumellaka wonanko epallame ovenyera o Iguputo. Eneeroowa wonanko manddiya ovenyera o Asiriya. Sika kineerewaahokollosella owaniwa. Mi Apwiya koollota.”

Echiweruzo ya Israele ni Yuda

¹² Apwiya enallota wi, “Aefuremu aakaapheella ni ddawoottha. Aisraele tti noolleka nave Ayuda aakiwukilave miyaano Mulluku Aweella ni oororomelleya.”