Hoseya 10 - Mawu a Mulluku

¹ Aisraele tti wonanko muteekho wa mpesa woohakallalla oyo onimma ezipaso ddinchichi. Mmo eyuumiiwa enavirellelliiwa waata tti mmo enavirellelliiwa omaka mapuro oollapellamo. Mmo munaatella makuwiiwa tti mmo mwiillaponi mwiwa munaatelliiwa apoto oopatuleya.

² Murimiiwa tti wawoottha sika eneerollakiwa ekaamba ya machimwiiwa. Apwiya eneerokumulla makuwiiwa nave eneerowinttaka apoto oopatuleya.

³ Vano eneerollota wi, “Khaninna mwene ekaamba yawi khanaawooville Apwiya. Komave mwenooyo anaaneerelle tini?”

⁴ Mamwene enallota mawu oohikhalla ni mutteko. Ennallupella ni opangana ddawoottha. Echilungamo yootthattuwa ohilungama wonanko ophuwa wa makukhu oowaawa a m'matani.

⁵ Athu a o Samariya eneerewoova nifano na musaanaang'ombe a o Betehaveni noonongiwa. Athwiiwa eneeroninllella navettho allupa mukuthwiiwa eneeromwinllella mullukwiiwooyo vawi ntitimiho naye noomuvenyeravo.

⁶ Nifanonno eneeronikusella o Asiriya wi nakhalle emphaso yoovelleella wa mwene muullupalli. Aefuremu ni Aisraele eneerowulliwattho muru ekaamba ya malangizo awoottha yawiiwellelliiwa.

⁷ Mwene a o Samariya aneerokuselliwa wuuteete wonanko mwanamuteekho wookusiwa ni maaddi

⁸ Mapuro oollapellellamo milluku ddawoottha ayo Aisraele yachimwiiwamo eneerewoonongeya. Miiwa ni epullathi ddineeromella vamakuwanimvo. Athu eneerollota wa miyaango wi, “Nimorelleni!” Eneerollota wa asimiyaango wi, “Niphitteereni!”

Apwiya enallalleyattho moomuvaanyiha Israele

⁹ Apwiya enallalleya wi, “Aisraele aakhalla echimwaka waambeella mvo yachimwalliiwa o Gibea. Sika eneerogonjihiwa o Gibea wenko.

¹⁰ Kineeroowa wi killipane ni athu eekukwaalla wi kaallake. Athu a mitundu ddimodda eneerotthukumana wi ewanena ekhoto ekaamba ya machimwiiwa manchichi.

¹¹ Khalle Efuremu aari wonanko eng'ombe yoohuddihiwa phaama eyo yamuuputhesa tirigu. Vano mu nikohi niwa nooreera koohiyamo nigoli.* Kinapaalla wi Yuda atipuleke nave Yakobo apweseke mallokotomwa.

¹² Mumidde echilungamo nave muneerohata echikondaaka yoohisintheya. Tipulani ntthalla nanyu vawi enthawi yoowaashaasha Apwiya yookwakhwana. Waashaasheni Apwiya ophiyera ewiille wi emurupihe murimu amadaliso.

¹³ Mwahaalla ddoolakwa nave mwaahata ohilungama, moocha ezipaso ddiwa dda ddawoottha. Ekaamba yawi munaroromella magaretaanyu ni waata wa athwaanyu akhoto,

¹⁴ Adanaanyu eneerewuuwukilani. Mizinda dda mipanda ddanyu ddineerewoonongiwa monga mwene Shalamani oononngelleeye muzinda wa Betaribeli vakhotoni. Va nllapo na ekhotonno ahaanyenya amoowe ni aniiwa.

¹⁵ Nyu athu a o Betele emoddamoddave yeeyo eneeroweereyellani ekaamba ya ochimwa wanyu wuullupalli. Ekhoto yaamba ohinase, mwenaanyu aneerewiiphiwa.”