Hoseya 1 - Mawu a Mulluku

¹ Alla tti mawu a Apwiya yawiille wa Hoseya mwaana a Beeri mu enthawi ya Uziya, Yotamu, Ahazi ni Hezekiya, mamwene a o Yuda nave mu enthawi ya Yerobowamu mwaana a Yowashi, mwene a o Israele.

Mwaara Hoseya ni anaaye

² Apwiya yallotilliiwa vawaamba ni Israele oweella mwa Hoseya yaamulleella wi, “Khawe wamutthelle hule nave omuyarelle anamwani ayo enaakhalle ooraruwattho. Vawi athu a mwiillaponimmu tti oohiroromelleya vookihiyani mi Apwiya.”

³ Vano Hoseya aaya amutthella mutthiyana nnddina naye Gomeri mwaana a Dibulaimu. Mutthiyanooyo aakhalla ni erukullu amuyara mwaana aamullopwana.

⁴ Vano Apwiya yaamulleella Hoseya wi, “Omuvahe nnddina nawi Yezireele. Vawi vavira enthawi vang'ono kineerollaka nibanja na Yehu ekaamba ya athu ayo yawiiphalliiwa o Yezireele nave kineeromalliha omwene wa Israele.

⁵ Enthawi yeeyo kineeromalliha masiva a Israele mu ntapo na Yezireele.”

⁶ Gomeri aakhallattho ni erukullu amuyara mwaana aamutthiyana. Apwiya yaamulleella Hoseya wi, “Omuvahe nnddina nawi Khanakondiwa. Vawi Israele ngimukondattho nave ngimukhululukella.

⁷ Koma kineerowoonihella echifundo athu a Yuda nave kineerewaavullusa ni masivaaka, mi Apwiya Mullukwiiwa,” oohikhalla ni muura, nsupada, akavalo ni oowella va akavalo.

⁸ Khanakondiwa ahiyalle waamwa Gomeri aakhallattho ni erukullu amuyara mwaana mmodda aamullopwana.

⁹ Vano Apwiya yaamulleella Hoseya wi, “Omuvahe nnddina nawi, Khe Athwaaka. Vawi nyu Aisraele khamuhiyo athwaaka nave miyaano ngihiyo Mullukwaanyu.”

Ohokollowa wa Israele

¹⁰ Aisraele eneerewaata wonanko mihava dda mu enyanja nnddo ohinaaworeewe owulinga ni oweerenga. Vano vanipuroni mvo yalleelliwiiwa wi, “Nyu khe athwaaka,” vaavottho aneerewaaromolla wi, “Anamwani a Mulluku Ookumi”

¹¹ Athu a o Yuda ni o Israele aneerewaatthukumanihattho vamodda nave eneeromutthoolla oohoollella mmodda. Vano eneerokhuma mwiillaponi mwiwa vawi nllapo na Yezireele ninaakhalle nllapo nuullupalli.