Hagai 1 - Mawu a Mulluku

Lamulo na omakattho enyumba ya Apwiya

¹ Va nllapo nawaamba na mweeri waneetthanu ni mmodda muyakha waneepiilli wa mwene Dariusi, mawu a Apwiya yaawa wa Zerubabele mwaana a Shealatiele, oolamulella a Ayuda navettho wa Yoswa mwaana a Yehozadaki, mullupa mukutho muullupalli, oweella mwa namallotella Hagai wi,

² “Nnddo kinalloteemi mi Apwiya Amasiva Mattheene tti ddawi athwaalla enallota wi enthawi khenakwakhwane yoomaka enyumba ya Apwiya.”

³ Vano mawu a Apwiya yaawa oweella mwa namallotella Hagai wi,

⁴ “Ethiyo ddenndda tti ddaphaama wi nyuwaano mukhalleke mu enyumba ddoomakiwa phaama, enyumbaaka eri ntepe ddiidda?

⁵ Ella sika ekaambiiwa mi Apwiya Amasiva Mattheene kinalloteemi wi mupwathe phaama meetellwaanyu.

⁶ Moomidda ddinchichi koma muhatille ddooyeva. Ocha munnacha koma khamunavona. Munnawirya koma nthona khaninamalla. Munnawara koma khamuniiwa oviha. Mallivello a allupa mutteko enaakhellella mu nthumba noophovowa.

⁷ “Ella sika ekaambiiwa mi Apwiyaanyu Amasiva Mattheene kinalloteemi wi mupwathe phaama meetellwaanyu.

⁸ Wellani omwaangoni, mwakakathe muteekho, mukimakelle enyumba yooreera wi kihakallallena ni waakhellamo ntitimiho. Mi Apwiya koollota.”

⁹ “Mookhalla mutiyerellaka ddoohata ddinchichi koma muhatille vang'ono. Mvo mwahateenyu ddoohata ddanyu, miyaano kaaddivaviha. Vano mi Apwiya Amasiva Mattheene kinnallota wi, keerella tini valle ddenndda? Ekaambiiwa tti yawi miyaano enyumbaaka tti ntepe vawi arive muthu aviheeriwalle ni omaka enyumbaaye.

¹⁰ Ella sika ekaambiiwa oddullu wummalliiwa nave ethaya enawatteelliiwa ezipaso.

¹¹ Ella sika ekaambiiwattho kimorihalleemi ettalla va ellapo yavatthi ettheene, miyaango, va emata ddatirigu, ddampesa ni miteekho dda olivi, va ddittheddene ddoomella muthaani ni virive veko mvo athu enallimiiwa komattho va athu ni enama ddittheddene.”

Athu eniiwellella lamulo na Apwiya

¹² Vaavo Zerubabele mwaana a Shealatiele, Yoswa mwaana a Yehozadaki muullupalli a allupa mukutho ni athu amodda attheene ayo yahokollowille wuukaporoni yaheera nnddo Apwiya Mullukwiiwa ellotilliiwa. Yiiwalliiwa mawu a namallotella Hagai oyo Apwiya yamurumalliiwa navettho yahoova wunchichi.

¹³ Vaavo Hagai, amithenga a Apwiya ahaalleella mawu a Apwiya awi, “Mi Apwiya kinuulleellani wi kiri ni nyuwaano.”

¹⁴ Vano Apwiya yaamullipiha murima Zerubabele mwaana a Shealatiele oolamulella a o Yuda ni Yoswa mwaana a Yehozadaki, muullupalli a allupa mukutho komattho ni athu amodda attheene. Yahaamba ophara mutteko woomakattho enyumba ya Apwiya Mulluku Amasiva Mattheene,

¹⁵ va nllapo na 24 na mweeri waneetthanu ni mmodda wa muyakha waneepiilli enthawi yeeyottho Dariusi aariiye mwene.