Habakuku 3 - Mawu a Mulluku

Nivekello na Habakuku

¹ Nivekello na namallotella Habakuku moollikana ni miipello a Shigionoti.

² Nyu Apwiya, kahiiwa epillaanyu ni woova, Apwiya, hihimullani muttekwaanyu mallapo allello, muwudduwanyeyihe mu mallapwaahu. Naari mushille murima, muhitiwalle echifundwaanyu.

³ Mulluku avenyenre o Temani aaweella o miyaango dda Parani. Ntitimiho naye naahuruwella oddullu, ellapo yavatthi yaaddalla ni mallapellwaaye.

⁴ Owala waye tti wonanko ettari, osherima onavenyera m'mattani mwaye mmo munakhalla masivaaye awiipittheya.

⁵ Millilli ddiri vahoollo vaye, ereta ddiri vatulli vaye.

⁶ Iimella, ellapo yavatthi ennatikheya, aweha mitundu dda athu ddaatthukumella, Miyaango ddookeraattheya ddaakumuwa, asimiyaango akhalle ennawarama nko eeteeyewo khalle.

⁷ Kaawoona athu a o Kushani yoovaka, a o Midiyani etthukumellaka.

⁸ Nyu Apwiya, ethiyo ddaari mihinje dduushihalleni murima apaalle enyanja yaweerihalleni onanariwa? Mwaawella va akavalwaanyu, va magaretaanyu oovullusa.

⁹ Mwaahullulla muuraanyu munipuroni mwiwa, mwaakhumiha mipaamba mu nigonelo niwa, mwaatthalla ellapo yavatthi ni mihinje.

¹⁰ Miyaango ddawoonilleewani ddaatikheya, maaddi yaamora ovenyera oddullu. Maaddi a vatthi va ellapo yaathuruma, mafundiiwa yaawella muddullu.

¹¹ Nndduwa ni mweeri muddullu ddahiimella ooheeta ddoonille osherima wa mipaamba ddanyu ddoothamaka ni onyezimella wa mavakaanyu oowala.

¹² Mwaheeteeta va ellapo yavatthi mushille murima, mwaanyingallella mitundu dda athu moowalli.

¹³ Mwaaya wi mwaavulluse athwaanyu, wi mwamoopolle mwenaanyu oozoziwa.* Mwaamoononga oohoollella a athu oonanara ni waatthollosa athwaaye attheene.

¹⁴ Mipaamba ddanyu ddaamuhoma oohoollella a akhotwaaye ayo yaawiille wonanko namangalle wi enipallallese, ehakallallaka vawaanyingallellani oohoowa moovittheya.

¹⁵ Mwaanyingalla enyanja ni akavalwaanyu, maaddi amasiva manchichi yaapanga niphoru.

¹⁶ Vawiiwani nndda kinnatthukumella, eyanwaaka ennatikheya wunchichi ni woova, Mwiillaaka onnatthukumella, manyallwaaka ennoopana vatthimva. Kineerotiyera owa wa nllapo na ollakiwa wa oonihella ekhoto.

¹⁷ Naari namukuyu ahiphuwe malluwa apaalle mipesa ddihiime ezipaso apaalle olivi ahimme ezipaso, m'matani muhikhalle ddoocha apaalle eziweto ddittheddene ddikhwe m'makhollani,

¹⁸ kineerohakallalla ni okotella mwa Apwiya kaambiiwa Apwiya Mulluku tti oovullusaaka.

¹⁹ Apwiya Mulluku sika masivaaka, ennallipiha manyallwaaka wonanko a epaalla, ennakeetiha va mapuro aweellesesa.