Habakuku 2 - Mawu a Mulluku

Ababiloni eneerollakiwa

¹ Kinaakhalle wonanko mulonda awiimella vanttatthani. Kineerotiyerella enaakilleelliiwa vaavo kineerodduwella enaakaakhulliiwa dda okhupanya waka.

Apwiya enamwaakhulla Habakuku

² Apwiya yaakaakhulla wi, “Lemba masomphenyaalla vanllukuni wi muthu ttuuweerenga moohikatamiha.

³ Masomphenyaalla enatiyera enthawiiwa enthaweeyo khenakwakhwane, khe ddawoottha, yaselliwa tiyerani vawi eneerophiya, oohikayika.

⁴ Ngoonani, oyo ahinna murima woolungama khavulluwa koma oolungama eneerokhalla ni okumi ekaamba ya echikhulupililwiiwa.”

Otulli wa oohilungama

⁵ Navettho vinyo annalleka, wonanko muthu awiitukhulla, oohikhalla owaniwa, awunnuwiha ddoopaalla ddaye wonanko ellapo ya ookhwa. Ari wonanko okhwa, khonavona koma anniitthukumanihella athu a mitundu ddittheddene, annaddiithanella mitundu ddittheddene dda athu.

⁶ Koma oophariwaayo eneeromuvevulla, eneeromunyemulla voollotani wi, “Otulli wa oyo aniitthukumanihella eyuuma ehiri yaaye, anapata eyuuma oweella mu ekongoli ddoohilungama. Ophiyera niini?”

⁷ Ethiyo akongolaayo khewa ewukila moorurumusa, khewoopopiha ni owaakha ddittheddene ni okusa eyuumaawo ohipaallaka?

⁸ Ekaamba yawi waawaakha athu a mitundu ddinchichi athu oohalla eneerowaakhattho ekaamba yawi woowiipha ni oweerella ekuku athu a va ellapo yavatthi ni mizinda ddiwa.

⁹ Otulli wa oyo ari ni eyuuma yoovenyera mu yoophura yoophwanyeya moohilungama, annayikusella o enyumbaaye yavaddullu vooganizani wi ookhalla ni murendelle.

¹⁰ Woowulliha muru nibanja nawo vawaatthollosani athu anchichi, woonanariha okumaawo.

¹¹ Naari malluku a esiri dda enyumba eneerewuuhumullulla mookhuwa, migomba dda epattho ddineerowinllella.

¹² Otulli wa oyo anamaka muzinda ni nikhame, anatthipella va ddoonanara.

¹³ Ngoona, mitundu dda athu waddigonjihalleewe ddapharelle mutteko nivuddo, erive ello emakilliiwa tti wonanko ekhuni dda viikho. Apwiya Amasiva Mattheene sika yeerille ddenndda.

¹⁴ Vawi ellapo yavatthi ettheene eneeroddalla ni odduwella dda ntitimiho na Apwiya wonanko enyanja enaddallelliiwa ni maaddi.

¹⁵ Otulli wa oyo anaawiryiha akhwaaye kapu oowalli, aanaalezeliha wi aawullihe muru.

¹⁶ Koma oneerowulliwa muru munipuroni moovahiwa olemu. Vano wirya, olezele ni ohahareye, Apwiya eneerewuwiryiha kapu a owalliiwa, olemwaawo oneerotthattusiwa owulliwa muru.

¹⁷ Ekuku weerilleewe o Lebanoni eneerowoopopiha, woononga wa enama ddamuhakani oneerewuutthukumelliha ekaamba yawi woomoriha nikhame na athu, waaweerella ekuku athu a ellapo yavatthi ni mizinda ddiwa.

¹⁸ Ethiyo nifano niri ni mutteko tini? Tti ello yoopangiwa ni muthu, khenuulleella erive ello koma woottha. Yaphaama enamweerilliiwa oonipanga wi aniroromelle tti tini, mulluku oohiwora ollota wene?

¹⁹ Otulli wa oollota ni muteekho wi, “Venya!” Apaalle wa nlluku noohikhalla ni okumi wi, “Imella!” Ethiyo ddenndda ttuulangiza? Ngoona, yoohuruwelliwa ni golide ni siliva muwari mwiwa khamuri okumi.

²⁰ Koma Apwiya eri mu enyumbiiwa yaweella, ellapo yavatthi ettheene yeere ellapo tuu vamiitthoni viwa.