Genesis 9 - Mawu a Mulluku

Echipangano ya Mulluku ni Nowa

¹ Mulluku aamudalisa Nowa ni anaayeene voollotani wi, “Muyarane wi mwaate nave muddalle va ellapo yavatthi.

² Enama ddittheddene dda va ellapo yavatthi ni epallame ddene, ddawaapadda ni ddittheddene ddamunyanja ddineerekowoovani. Ddittheddenenndda kooddihiya wi muddilamulelleke.

³ Vano mucheke enama ddittheddene, wonanko kawaakhullelleemini ocha matthaapa amakukhu. Kohuuvahani ddittheddenenndda wi ddikhalle yoochaanyu.

⁴ “Koma ello emoddave muhinaachekeenyu tti enama yookhalla ni nikhame muwari mwiwa. Koovaanyiha ekaamba yawi okumi wa enama onakhalla mu nikhame.

⁵ Arive muthu oomwiipha muthu, aneerewiiphiwa. Erive enama yoomwiipha muthu, eneerewiiphiwa. Arive muthu oomwiipha mukhwaaye, nayeenettho iiphiwe.

⁶ Arive muthu oomwiipha muthu, nayeenettho aneerewiiphiwa ni muthu vawi muthu aphatusiwe moophwanaphwana ni Mulluku.”

⁷ Vano Mulluku aamudalisa Nowa wi, “Muyarane wi mwaate nave muddalle va ellapo yavatthi.”

⁸ Mulluku aamulleella Nowa ni anaaye wi,

⁹ “Vano kinakeraatthiha echipangano ni nyuwaano ni edduullu ddanyu,

¹⁰ ni ddookumi ddittheddene, epallame, eziweto, enama ddamuhakani ni ddimodda ddittheddene ddakhumalle ni nyuwaano muchomboni.

¹¹ Echipanganweeyo tti yawi, ‘Ngiwa koonongattho ddookumi ddittheddene ni echigumula. Kinimallupella wi echigumula khewa yoonongattho ellapo yavatthi.’ ”

¹² Nave Mulluku aavirellella ollota wi, “Ella sika echizindikiro ya echipangano yoohimalla kinahiyeemi variyari va miyaano ni nyuwaano ni erive yoophatusiwa eri ni nyuwaano, ophiyera o mibado ddamuhoollo.

¹³ Kinahiya mwiisherima m'miraponi wi okhalle echizindikiro ya echipangano variyari va miyaano ni ellapo yavatthi.

¹⁴ Enthawi ddittheddene mwakhalla mirapo muddullu nave wooneya mwiisherima m'miraponi,

¹⁵ kineerekewuupuwella echipanganwaaka eyo kakeraatthihalleemi ni nyuwaano ni enama ddittheddene wi echigumula ehiwe yoonongattho ddookumi ddittheddene.

¹⁶ Mwiisherima wooneya m'miraponi, miyaano kineerewoona nave kineerekewuupuwella echipangano yoohimalla ya variyari va miyaano ni ddookumi ddittheddene ddookhalla va ellapo yavatthi.

¹⁷ Ella sika echizindikiro ya echipangano eyo kikeraatthihalleemi ni ddookumi ddittheddene dda va ellapo yavatthi.”

Nowa ni anaaye aallopwana

¹⁸ Anamwani a Nowa ayo akhumalleeyena muchomboni mulle yaari Shemu, Hamu ni Yafeti. Hamu sika aari attiitthinnya a Kanani.

¹⁹ Anamwani a Nowa araru yaalla sika makhollo a athu a va ellapo yavatthi ettheene.

²⁰ Nowa ahaamba ollima nave aari muthu awaamba waalla mpesa.

²¹ Nllapo nimodda olliye amuwiryalle vinyo, aalezela, arulla ddoowara ddaye ddittheddene, akonaatthi epwillimwinddive m'musasani mwaye.

²² Hamu, attiitthinnya a Kanani, oonille wi Nowa, attiitthinnya eri epwillimwinddive, ahaalleella asinne eellaalle.

²³ Koma Shemu ni Yafeti yaakusa yawiikhuneellana eyihiya otulli wiwa, eyitukhullalle vamathurini. Nave yaheeta nintulli yaakhuneella attiitthiiwaayo, miitthwiiwa ewehaka okhwipi ekaamba yawi yaawulliwa muru wi ehoone epwillimwinddi ya attiitthiiwa.

²⁴ Nowa avenyilleeye, ahiiwa ddittheddene nnddo mwanaye mung'onong'ono eerilleeye,

²⁵ nave aallota wi, “Atembeleliwe Kanani! Anaakhalle kaporo a akaporo attheene wa asinne.

²⁶ Etitimihiwe Apwiya Mulluku a Shemu, Kanani akhalle kaporo a Semooyo.

²⁷ Mulluku amunnuwihe Yafeti, edduullu ddaye ddikhallelle nimodda ni edduullu dda Shemu, nave Kanani anaakhalle kaporo a Yafeti.”

²⁸ Eviralle echigumula, Nowa aakhalla ni okumi miyakha 350

²⁹ nave akhwille ari ni miyakha 950.