Genesis 6 - Mawu a Mulluku

Onanara murima wa athu

¹ Mvo athu yaambilliiwa woonjerereya va ellapo yavatthi nave mvo anamwalli yayariwiiwa,

² anamwani aallopwana a Mulluku yahoona wi anamwalli a athwaayo yaari ooreera, sika yahaamba waatthella ayo yaakondilliiwa.

³ Sika Apwiya yaallota wi, “Ngiwa kaakhullella wi muthu akhalleke ni okumi woohimalla vawi tti mwiilli wookhwa. Waambeella ollello okumaaye onaakomelleke miyakha 120.”

⁴ Va mallapo yaayo naari vatulli viwattho vaakhalla athu amasiva ni oorekama va ellapo yavatthi ayo yaari edduullu dda atthiyana alle yatthelliwe ni anamwani aallopwana a Mullukwaalle. Alliwaalla yaari anamwani oodduwelliwa navettho athu oovuwa va mallapo akhallaayo.

⁵ Apwiya vawoonani wi athu a va ellapo yavatthi aananara mwawoopiha navettho wi mirima ddiwa tti ddooddalla ni maganizo oonanara,

⁶ yaamoriwa ethakaraka wi yahaaphatusa athu ni waahiya va ellapo yavatthi. Vawi murima wahaavoreya wunchichi,

⁷ vano Apwiyaayo yaallota wi, “Athu attheene kaaphatusalleemi kineerewaatthollosa. Kineerewoonongattho enama ddittheddene ni ddawaapadda ddene ni epallame kaambiiwa kinnamoriwa ethakaraka wi kaaphatusa ddenndda.”

⁸ Koma Nowa aheerelliwa echifundo ni Apwiya.

Epilli ya Nowa

⁹ Nna sika ntthopoollo na Nowa. Nowa aari muthu oolungama ni oohichimwa vamiitthoni va Mulluku. Nave mum'badwaaye aari yooyove aattanille ni Mulluku.

¹⁰ Aari ni anamwani aallopwana araru, Shemu, Hamu ni Yafeti.

¹¹ Koma athu attheene a ellapo yavatthi yaari a echiwawa vamiitthoni va Mulluku nave ochimwa wiwa waari virive veko.

¹² Mulluku awehille ellapo yavatthi ahoona wi tti yoonanara, ekaamba yawi athu attheene yaari oonanara wunchichi.

¹³ Sika Mulluku aamulleella Nowa wi, “Koosimikiza ni murima muttheene wi kiwoononge athu attheene. Kineerewaatthollosa ekaamba yawi ellapo yavatthi ettheene yooddalla ni echiwawa.

¹⁴ Omake echombo ni matabwa a muteekho wa nnjalle. Okawe ezipinda muwarimmo nave oyimare ni onyoma otte ni muwari mwene.

¹⁵ Orekama wa echombweeyo okhalle mamita 140. Okhuveya okhalle mamita 23 nave oya muddullu okhalle mamita 13 ni hafu.

¹⁶ Omake epattho ya echombweeyo nave ohiye mpata wa masentimita 50 variyari va epatthweeyo ni mukhwipi mwiwa. Oyimake mootthinddaanyera, ekhalle ya enyumba ddiraru nave mukhwipi mwene mukhalle nchiwi.

¹⁷ Kineeromurupiha murimu a echigumula va ellapo yavatthi wi oononge erive ello yookumi. Ddeko ddittheddene dda va ellapo yavatthi ddineerokhwa,

¹⁸ koma kineerokeraatthiha echipangano ni weyaano. Ovollowe muchomboni weyaano ni mwaariyo owaakattho anaawo ni awariwa.

¹⁹ Nave ovollochihe mu echombweeyo enama dda orive mutundu, nankhoro ni yaamutthiyana wi ddisungiwe ni okumi.

²⁰ Epallame ni enama dduullupalli ni ddawaapadda dda mitundu ddoohiyanahiyana, ddivollowe muchomboni wi ddisungiwe ni okumi.

²¹ Okusettho ddoocha ddoohiyanahiyana wi nyuwaano ni enamannddo mwacheke.”

²² Sika Nowa aheera moollikana ni mmo Mulluku amulamulelleeye.