Genesis 50 - Mawu a Mulluku

¹ Sika Yosefe ahiikuhella vakhuviru ni vamutemboni wa attiitthinnya nave ahinlla, nngu aakhupaarellaka attiitthinnyaayo.

² Nave Yosefe aalamula wi mutembo wa attiitthinnya opotokosiwe wi ohunte nave alliwaayo yaheera ddenndda.

³ Moollikana ni mutetho, mutteko woopotokosa mutembooyo wi ohunte waakusenlle mallapo 40 nave Aiguputo yahinlla maliro a Yakobo mallapo 70.

⁴ Enthawi yawinlla maliro emallille, Yosefe aaddilleella enduna dda Farao wi, “Pepaani, mukeerelle echifundo, mwamulleelle Farao wi,

⁵ ‘Attiitthaaka eri vakhuviru okhwa, yaakillupelliha wi kaavitthe mu mahame ayo yiikatenlliiwa weekhiiwa mu ellapo ya Kanani. Sika kinimuuvekani wi mukaakhullelle wi kaavitthe attiitthaaka, vatulli viwa kineerohokollowattho.’ ”

⁶ Nave Farao ahaakhulla wi, “Khawe waavitthe attiittho moollikana ni mmo yuullupellihalliiwa.”

⁷ Sika Yosefe aaya aavittha attiitthinnya. Nave attekweene a Farao, uullupalli a nthato ni athu amodda oodduwanyeya o Iguputo yaamuvelleella Yosefe.

⁸ Nave yaathaananattho ni attheene a o nibanja naye, asinne ni attheene a nibanja na attiitthinnya. O Gosheni wulle wahallille anamwani ni eziweto ddiwa.

⁹ Akhoto oowella va magareta ni va akavalo alliwattho yaamuvelleella, sika waari mulloko munchichi wa athu.

¹⁰ Ephiyalle onipuroni noomuuputhellavo tirigu o Atadi, wookhuma nndduwa wa Yordani, yaheera moollikana ni ehuddiho yoolemu ya minllello nave yahinlla maliro wenko mallapo matthanu ni meelli.

¹¹ Vano Akanani yoonilliiwa minllello awiddiiddwaayo o Atadi wulle, yaallota wi, “Minllello a maliro awi ddiiddaalla tti a o Iguputo.” Sika ekaambiiwa nipuronna naromolliwiiwa Abele Miziraimu nave niri wookhuma nndduwa wa Yordani.

¹² Sika anamwani a Yakobo yaheera wonanko mmo attiitthiiwa yaalamulelliiwa.

¹³ Nave yahaatukhulla oyaana o Kanani nave yahaavittha munikhunguni nno niri m'matani o Makipera, wookhuma nndduwa wa Mamure. Abrahamu akullalle nikhungunno wa Efuroni Muhiti ni emateeyo wi ekhalle mahame.

¹⁴ Yosefe aavitthalle attiitthinnya, aahokollweella o Iguputo ni asinnaalle, vamoddattho ni attheene yamuvelleelle.

Yosefe anaallipiha murima asinne

¹⁵ Ekhwille attiitthiiwaalle, asinne a Yosefe yaallota wi, “Nineere tini hiyaano, Yosefe aarimi aniitakave wi anihokolloselle wonanko namuhooselleehu?”

¹⁶ Sika yaarumiha mawu wa Yosefe wi, “Attiitthiinyu ehinakhwe yaanilleella wi nuuvekeni wi,

¹⁷ ‘Pepaani, khululukellani nichimo nuullupalli nno asinninyu yaweerelliiwani.’ Vano ninimuuvekani wi munikhululukelle nichimo nno hiyaano, oorumeyella a Mulluku a attiitthiinyu, neerilleehu.” Yosefe iiwalle ddenndda ahaamba winlla.

¹⁸ Vano asinnaalle yaawa ekokhora vamiitthoni vaye. Yaallota wi, “Hiyaano niri vamiitthoni vanyu wonanko akaporwaanyu.”

¹⁹ Koma Yosefe ahaalleella wi, “Muhoove iyaayi. Miyaano ngiwora wiihiya munipuroni na Mulluku.

²⁰ Nyuwaano mwahiiwanana okeerella yoonanara koma Mulluku aatthattusa okhalla yaphaama wi athu anchichi evullusiwe. Sika ekaamba yawi ollello athu anchichi aavullusiwa.

²¹ Vano nyuwaano muhikhupanye. Kineerewuuweherani phaama ni aniinyu.” Sika ahaasimikizella ni mawu ookhurumusa ni oollipiha murima.

Okhwa wa Yosefe

²² Yosefe aakhalla o Iguputo ni nibanja na attiitthinnya nave akhwille ari ni miyakha 110.

²³ Nave Yosefe aakhalla ni okumi ophiyera ahoona edduullu ddaye, anamwani a Efuremu. Anamwani a Makiri, mwaana a Manase yayariwiiwa, Yosefe aawaakhella munibanjani mwaye.

²⁴ Nave ahaalleella asinne wi, “Onnoonathi wi kiri vakhuviru okhwa koma Mulluku aneerokhalla ni weyaano nave aneerewuuhokollosella o ellapo allupenlleeye wa makhollwaanyu Abrahamu, Isaki ni Yakobo.”

²⁵ Eerilleeye ddiiddo Yosefe ahaaveka anamwani a Yakobo wi ellupelle vawaalleellani wi, “Llupellani wi Mulluku uuweherani phaama muneerotukhulla makhuvaaka mwaatthaamaka wuno.”

²⁶ Sika Yosefe akhwille ari ni miyakha 110 nave mutembwaaye yaawupotokosa ni murete wi ohunte nave yaawusunga munibokosini o Iguputo wenko.