Genesis 5 - Mawu a Mulluku

Edduullu dda Adamu

¹ Nna sika ntthopoollo ya edduullu dda Adamu. (Mulluku voomuphatusani muthu, amuphatusalle moophwanaphwana ni olliyooyo.

² Ahaaphatusa mullopwana ni mutthiyana nave ahaadalisa ni waavaha nnddina nawi, “Muthu”).

³ Adamu ari ni miyakha 130 aamuyara mwaana oophwanaphwana ni olliye, nnddina naye Seti.

⁴ Vatulli viwa Adamu aakhalla ni okumi miyakha ddimodda 800. Ahaayarattho anamwani amodda aallopwana ni aatthiyana.

⁵ Sika Adamu aakhwa ari ni miyakha 930.

⁶ Seti ari ni miyakha 105 aamuyara Enoshi.

⁷ Vatulli viwa aakhalla ni okumi miyakha ddimodda 807. Ahaayarattho anamwani amodda aallopwana ni aatthiyana.

⁸ Sika Seti aakhwa ari ni miyakha 912.

⁹ Enoshi ari ni miyakha 90, aamuyara Kenani.

¹⁰ Vatulli viwa aakhallattho ni okumi miyakha ddimodda 815. Ahaayarattho anamwani amodda aallopwana ni aatthiyana.

¹¹ Sika Enoshi aakhwa ari ni miyakha 905.

¹² Kenani ari miyakha 70, aamuyara Mahalalele.

¹³ Vatulli viwa aakhallattho ni okumi miyakha ddimodda 840. Ahaayarattho anamwani amodda aallopwana ni aatthiyana.

¹⁴ Sika Kenani aakhwa ari ni miyakha 910.

¹⁵ Mahalalele ari ni miyakha 65, aamuyara Yaredi.

¹⁶ Vatulli viwa aakhallattho ni okumi miyakha ddimodda 830. Ahaayarattho anamwani amodda aallopwana ni aatthiyana.

¹⁷ Sika Mahalalele aakhwa ari ni miyakha 895.

¹⁸ Yaredi ari ni miyakha 162, aamuyara Enoki.

¹⁹ Vatulli viwa aakhallattho ni okumi miyakha ddimodda 800. Ahaayarattho anamwani amodda aallopwana ni aatthiyana.

²⁰ Sika Yaredi aakhwa ari ni miyakha 962.

²¹ Enoki ari ni miyakha 65, aamuyara Metusela.

²² Enoki ahaattana ni Mulluku nave aakhalla ni okumi miyakha ddimodda 300. Ahaayarattho anamwani amodda aallopwana ni aatthiyana.

²³ Mallapo mattheene a okumi a Enoki yaari 365.

²⁴ Olliye ahaattana ni Mulluku mu okumaaye muttheene. Nave Enoki khaawooneyillettho, ekaamba yawi Mulluku aamukusa.

²⁵ Metusela ari ni miyakha 187, aamuyara Lameki.

²⁶ Vatulli viwa aakhallattho ni okumi miyakha ddimodda 782. Ahaayarattho anamwani amodda aallopwana ni aatthiyana.

²⁷ Sika Metusela aakhwa ari ni miyakha 969.

²⁸ Lameki ari ni miyakha 182, aamuyara mwaana,

²⁹ nave aallota wi, “Mwaana yoolla aneeronivevulla o mitteko ddahu ddoovoreyanndda ddoollima ethaya eyo yatembeleliwe ni Apwiya.” Sika mwaanooyo yaamuvaha nnddina nawi Nowa.

³⁰ Vatulli viwa Lameki aakhallattho ni okumi miyakha ddimodda 595. Ahaayarattho anamwani amodda aallopwana ni aatthiyana.

³¹ Sika Lameki aakhwa ari ni miyakha 777.

³² Nowa ari ni miyakha ddookhwaranya 500, ahaayara anamwani aallopwana araru, Shemu, Hamu ni Yafeti.