Genesis 49 - Mawu a Mulluku

Mawu oomallihella a Yakobo

¹ Vatulli viwa Yakobo aawiithana anaaye aallopwana nave aalleella wi, “Mutthukumane vamodda wi kuulleelleni ddinaaweereyelleni muhoollo.”

² “Muwe wuno nave mwaapelle maaru, nyuwaano anamwani a Yakobo. Muwiiwellelle attiitthiinyu Israele.”

³ “Rubeni, mwanaka awaamba, weyaano tti masivaaka, tti echipaso yawaamba ya masivaaka. Mwa anaaka attheene, muullupalli tti weyaano va otitimiheya ni va masiva.

⁴ Tti wonanko echigumula ya maaddi awoopiha. Koma khokhallattho awaaposa akhwaawo, kaambiiwa waakona ni mwaaraka mung'onong'ono nave waheera ddoowulliha muru vabedini a attiittho.”

⁵ “Simeoni ni Levi tti amoddamoddave. Enaphariha mutteko ezida ddiwa dda ekhoto vaweerani echiwawa.

⁶ Ngiwa kiiwanana ni ddoollota ddiwa ddavakhwipi, naari va mitthukumano ddiwa, ngiwa kaattanana, kaambiiwa yaawiipha athu moosha murima, nave yahaaphoriiha anankhoro a eng'ombe mwa ekuku, nave yahaatthattusa yoottheellana.

⁷ Otembeleliwe osha murima kaambiiwa tti wawoopiha, otembeleliwettho owalliiwa kaambiiwa wenko tti ohoosa. Kineerewaamwara mu ellapo ettheene ya Yakobo, Kineerewaapallallesa variyari va Israele.”

⁸ “Yuda, asinno eneerewuuthokoza, nave adanaawo oneerewaagonjiha, navettho abalaawo eneerewuukokhorella.

⁹ Yuda ari wonanko mwanamukango, Iipha enamaaye, annahokollweellattho nko aniipittheeye. Annattaphuruwa navettho annakonaatthi vatthi wonanko mukango, Nave khaavo anaallipe murima wi amuvenyihe.

¹⁰ Yuda eneerophareella ekopo yoomwene enthawi ddittheddene. Aneerowummellella omwenooyo, nave aneerosunga masiviiwa, ophiyera mwaneenaneena aphiyalle, oyo anaalamulelle athu attheene.

¹¹ Bulwaaye anamumakellella vamuteekhoni wa mpesa, mwaana a bulu o mpesa waphaama. Ddoowara ddaye anaddichapa mu vinyo, mu vinyo oofiira wonanko nikhame.

¹² Miitthwaaye tti oofiira ni vinyo, miinwaaye tti aweella ni mukaka.”

¹³ “Zebuloni anaakhalleke mukhwipi mwa enyanja, madokwaaye eneerokhalla mapuro a echombo, ellapwaaye eneerophiya o Sidoni.”

¹⁴ “Isakara ari wonanko bulu amasiva, anakona moottaphuruwa variyari va katundu.

¹⁵ Nave ahoona okhalla phaama wa nipuro nawiithuuwellamonno, ahoonattho wi ellapweeyo tti yooreera. Aawaramiha mutthana wi amutukhulle katundwaaye, nave aatthattuwa oophara mutteko wathangata.”

¹⁶ “Dani aneerewaalamulella athwaaye. Athwaayo eneerophwanaphwana ni malloko mamodda a Aisraele.

¹⁷ Dani anaakhalle wonanko enowa vakhwipi va musewu, enowa yoovoreya wunchichi vakhwipi va musewu, Yoolluma etotopwa ya kavalo, wi oowellavooyo iikuhe ni etulli.”

¹⁸ “Kinatiyerella ovullusa wa Apwiya.”

¹⁹ “Gadi aneerohelliwa ekhoto ni allupaawiiya, Koma olliyooyo aneerewaagonjiha vatulli viwa.”

²⁰ “Ellapo ya Ashere eneerokhalla ni ddoocha ddooddiva, yoocha yoophwanella mamwene.”

²¹ “Nafutali ari wonanko epaalla yamuhakani eyo enaayara anamwani ooreera.”

²² “Yosefe ari wonanko enthambi yawiima ezipaso, enthambi yawiima ezipaso vakhuviru ni neetuutu, enthambi yoorapella vasirini.

²³ Adanaaye yaallipanana mweekuku, nave yaamwiikariha ni miira ddiwa.

²⁴ Koma olliye muuraaye wahiimella moollipa nave miwono ddaye ddaallipattho, ni masiva a Mulluku Amasiva Mattheene a Yakobo, oyo tti Mbusa, Nlluku na Israele.

²⁵ Mulluku a attiittho anuukavihera, Mulluku Amasiva Mattheene sika anuudalisa. Annudalisa ni murimu oovenyera muddullu, ni maaddi ootuulla ovenyera vatthi va ethaya. Nave aneerewuudalisa vawuuvahani anamwani anchichi ni eng'ombe ddinchichi.

²⁶ Madaliso a attiittho tti amasiva okhwaranya madaliso a miyaango ddoohimalla, okhwaranyattho ddaphaama dda o miyaango dding'onong'ono ddoohimalla. Ddenndda ddinaakhalle vamuruni va Yosefe, vamuruni va oohoollella oyo amutthoollilleeye khalleve variyari va asinne.”

²⁷ “Benjamini ari wonanko enama yawoopiha ohinase annattakhuna nnddo aphanreeye, nave mahiiyu annakawa ddawaakhannddo.”

²⁸ Alla sika attekweene a malloko khumi ni meelli a Israele nave alla sika attiitthiiwa Yakobo aalleelleeye, mvo amudaliseeye arive muthu mwa alliwaayo voollanyanani.

Okhwa ni ovitthiwa wa Yakobo

²⁹ Vano Yakobo ahaalamula anaaye wi, “Vawi kiri vakhuviru okhwa, mwakivitthe munikhunguni nno niri m'matani mwa Efuroni Muhiti,

³⁰ o Makipera. Niri wookhuma nndduwa wa Mamure mu ellapo ya Kanani. Abrahamu aakulla nikhungunno ni emateene ovenyera wa Efuroni Muhiti wi vikhalle mahame.

³¹ Wenko sika wavitthiwe Abrahamu ni mwaariye Sara. Isaki ni mwaariye Rebeka yavitthiwettho wenko. Nave Leya kamuvintthettho wenko.

³² Emateeyo ni nikhungunno akullalle ovenyera wa Ahiti.”

³³ Vano Yakobo amallihalle waalangiza anaaye, aahokollosellattho manyallwaaye vabedini nave aakhwa.