Genesis 46 - Mawu a Mulluku

Yakobo ni nibanja naye enaya o Iguputo

¹ Yakobo aatthukumaniha ddaaye ddittheddene nave aaya o Beeresheba woovelleella mukutho wa Mulluku a attiitthinnya Isaki.

² Mahiiyu Mulluku aamooneyella Yakobo nave aallota wi, “Yakobo, Yakobo!” Olliye ahaakhulla wi, “Ee Apwiya.”

³ Vano Mulluku aamulleella wi, “Mi tti Mulluku, Mulluku a attiittho. Ohoove oya o Iguputo. Wenko kineeroruuwiha edduullu ddawo wi ddikhalle mutundu muullupalli.

⁴ Miyaano kineerooya nimodda ni weyaano o Iguputo nave edduullu ddawonnddo kineeroddihokollosellattho weewuno. Yosefe aneerokhalla ni weyaano va enthawaawo yookhwa.”

⁵ Vano Yakobo aatimulla olendwaaye ovenyera o Beeresheba. Anamwani a Israelaalle yahaawelliha attiitthiiwa, Yakobo ni atthiyana ni anamwani, va magareta ayo Farao aarumihalleeye.

⁶ Yaakusa eziweto ddiwa ddittheddene ni ddeko ddittheddene nnddo yaariiwana o Kanani nave yaaya o Iguputo. Yakobo aakusa edduullu ddaye ddittheddene.

⁷ Ahaakusa anaaye aallopwana ni edduullu ddeellopwana navettho anaaye aatthiyana ni edduullu ddeetthiyana. Attheenaayo aayaana o Iguputo.

⁸ Nave alla sika manddina a Aisraele, ayo ayiilleeyena o Iguputo. Vaari Rubeni, mwaana awaamba a Yakobo,

⁹ nave anamwani a Rubeni yaari Hanoki, Palu, Hezironi ni Karimi.

¹⁰ Anamwani a Simeoni yaari Yemuwele, Yamini, Ohadi, Yakini, Zohari ni Shaulooyo amennya yaari a o Kanani.

¹¹ Anamwani a Levi yaari Gereshoni, Kohati ni Merari.

¹² Anamwani a Yuda yaari Ere, Onani, Shela, Perezi ni Zera (koma Ere ni Onani yakhwille eri o Kanani.) Anamwani a Perezi yaari Hezironi ni Hamuli.

¹³ Anamwani a Isakara yaari Tola, Puva, Iyobu ni Shimironi.

¹⁴ Anamwani a Zebuloni yaari Seredi, Eloni ni Yaleele.

¹⁵ Nndda sika edduullu nnddo Leya amuyarenlleeye Yakobo o Mesopotamiya nave vaakhallattho mwanaye aamutthiyana, Dina. Attheene vamodda yaarivo 33.

¹⁶ Anamwani a Gadi yaari Zifiyoni, Hagi, Shuni, Eziboni, Eri, Arodi ni Areli.

¹⁷ Anamwani a Ashere yaari Imina, Ishiva, Ishivi, Beriya ni murokoriwa Sera. Anamwani a Beriya yaari Hebere ni Malikiele.

¹⁸ Nndda sika edduullu nnddo Zilipa, kaporo a Leya, amuyarelleeye Yakobo.

¹⁹ Anamwani a Rakele, mwaara Yakobo yaari Yosefe ni Benjamini.

²⁰ Manase ni Efuremu yaari anamwani ayo Yosefe aayarilleeye mwa Asenati, mwaana a Potifera mullupa mukutho o Oni.

²¹ Anamwani a Benjamini yaari Bela, Bekere, Ashibele, Gera, Naamani, Ehi, Rosi, Mupimu, Hupimu ni Aridi.

²² Ddittheddenenndda khumi ni asese sika edduullu nnddo Rakele amuyarelleeye Yakobo.

²³ Dani aari ni mwaana mmodda nnddina naye Hushimu.

²⁴ Anamwani a Nafutali yaari Yazeele, Guni, Yezera ni Shilemu.

²⁵ Dditthanu ni piillinndda sika edduullu dda Yakobo nnddo ddayariwe ni kaporo, Biliha oyo Labani amuvelleelleeye wa mwanaye Rakele.

²⁶ Edduullu ddittheddene dda Yakobo nnddo ddawiille o Iguputo ddaari 66, oohiwerengellavo awariwa a anaaye a Yakobooyo.

²⁷ Yosefe aayarille anamwani eelli o Iguputo, sika echiwerengero ya athu attheene a munibanjani na Yakobo yawiille o Iguputo yaaphiya 70.

Yakobo ni nibanja o Iguputo

²⁸ Israele aamuruma Yuda wi ahoolle nave amuveke Yosefe wi aachingamelle o Gosheni. Ephiyalle o Gosheni,

²⁹ Yosefe ahiithaniha gareta naye, aya o Gosheni wi akumane ni Yakobo attiitthinnya. Aphiyalle vamiitthoni viwa, ahaakhupaarella munikohini nave ahinlla va enthawi yoorekama.

³⁰ Yakobo aamulleella Yosefe wi, “Vano kineerokhwa ni murendelle vawi koowoonattho vamiitthoni ni vamiitthoni nave koodduwella wi wookhallawo.”

³¹ Vano Yosefe ahaalleella asinne ni nibanja nittheene na attiitthinnya wi, “Kinaya kamulleelle Farao wi asinnaka ni attheene a mu nibanja na attiitthaaka, ayo yakhalla o Kanani aawa wuno.

³² Athu yaalla tti abusa, enachiha eziweto. Aawa ni eziweto ddiwa ni ddeko ddiwa ddittheddene.

³³ Vano Farao awiithanani nave uukohani wi, ‘Munaphara mutteko wawiidde.’

³⁴ Nyuwaano mwamulleelle wi, ‘Hiyaano apwiya, tti abusa a eziweto waambeella enamwanaahu, wonanko mmo yeerella makhollwaahu.’ Mweeddiiddo, sika muneerokhalla mu ellapo ya Gosheni ekaamba yawi a Iguputo ennananariwa ni abusa.”