Genesis 45 - Mawu a Mulluku

Yosefe anadduupullulla yeekha vamiitthoni va asinne

¹ Vano Yosefe khaaworillettho ovillella vamiitthoni va akaporwaayaalle. Aallota mookhuwa wi attheene ekhume muchipindanimmo. Sika Yosefe ahallillemo yeekha ni asinne aadduupullulla yeekha.

² Ahinlla mookhuwa ophiyera Aiguputo yahiiwa nave epilli ya winllanngu wahiiweyattho o enyumba ya Farao.

³ Yosefe ahaalleella asinne wi, “Mi tti Yosefe. Ethiyo attiitthaaka yookhallawove?” Koma asinnaayo yahoova wunchichi vawi kheyaaworille naari omwaakhulla.

⁴ Vano Yosefe ahaalleella wi, “Pepaani, susellani vakhuviru.” Attheene esuserille vakhuviru, Yosefe aallota wi, “Mi tti mwanamunninyu, olle mwamukullihalleenyu o Iguputo.

⁵ Koma vano muhitathille murima apaalle wiishella murima nyookha ekaamba yawi mwaakikulliha vawi Mulluku mwaneena sika akirumihalle khalle wuno wi vawi ddiiddo avulluse okumaanyu.

⁶ Muyakhoolla tti waneepiilli wa miyakha dda ettalla. Koma ddoohalla miyakha mitthanu nave va miyakha ddenndda athu khellimaka apaalle ohata.

⁷ Mulluku aakirumiha khalleve wi kuuvulluseni wi edduullu ddanyu ddinchichi ddikhalle ni okumi.

⁸ Sika khamuhiyo nyuwaano mwakirumihalle wuno iyaayi koma Mulluku. Olliye ookitthattusa enduna yuullupalli ya Farao nave ellapo ettheeneella ya Iguputo eri m'mattani mwaka.

⁹ “Vano akuvani, hokollweellani wa attiitthaaka, mwaalleelle wi mwaninyu Yosefe anallota wi, ‘Mulluku ookunnuwiha ophiyera ookitthattusa oolamulella Iguputo muttheene, sika muwe wuno muhiselliwe.

¹⁰ Ttuuwora okhalla mu echigawo ya Gosheni wi mukaatamelle miyaano. Mukhalle wuno nyuwaano, aniinyu, edduullu ddanyu, enkhosa ddanyu ni epuri ddene, eng'ombe ddanyu ni ddittheddene muriinyuna.

¹¹ Mwaakhallaka o Gosheni, miyaano kineerekewuuweherani. Miyakha dda ettalla ddookhallavove mitthanu. Nginapaalla wi nyuwaano muhoowe ni nibanja nanyu ni attheene muriinyuna.’ ”

¹² Yosefe aavirellella ollota wi, “Vano attheenenyu ni Benjamini, mung'onong'onwaakoolla, ttuuwoona ni miitthwaanyu wi tti miyaano Yosefe kinallota ni nyuwaano.

¹³ Mwaalleelle attiitthaaka wi kinnavahiwa olemu munchichi Iguputo wuno. Mwaalleellettho ddittheddene nnddo muddoonilleenyu. Nave akuvani, muweena wuno attiitthaakaayo.”

¹⁴ Enre ddiiddo aamukhupaarella Benjamini, mung'onong'onwaayoolle, ahaambattho winlla. Nayeenettho Benjamini ahaamba winlla nngu amukhupaarelle munikohini.

¹⁵ Vatulli viwa ahaakhupaarella asinne attheenaalle inllaka. Vano asinnaalle yahaamba waarera ni Yosefe.

¹⁶ Epilleella yiiweyille o enyumba ya Farao wi asinne a Yosefe aawa, Farao ni allupa muttekwaaye attheene yaahakallalla wunchichi.

¹⁷ Nave Farao aamulleella Yosefe wi, “Waalleelle asinno wi emumakellelle katundu va enama ddiwa nave ehokollweelle o Kanani.

¹⁸ Vano wenko yaakuse attiitthiiwa ni mabanjiiwa nave ewe wuno. Kineerewuuvahani ellapo ya ethaya yaphaama ya Iguputo nave muneerekoocha ddaphaama dda mwiillaponimmu.

¹⁹ Waalamulettho wi ekuse magareta a wuno o Iguputo wi awariwa yawellevo ni aniiwa nave attiitthiiwa ewe wuno.

²⁰ Ehikhupanye wi eneerohiya eyuuma wenko ekaamba echigawo ya ethaya yaphaama ya o Iguputo wuno enaakhalle yayiwa.”

²¹ Anamwani a Yakobo yaheera ddennddo. Yosefe ahaavaha magareta moollikana ni mmo Farao alamulelleeye nave ahaavaha pooso a voolendoni.

²² Aamuvahattho arive muthu ddoowara ddanaanweene koma Benjamini aamwinnya makobiri a siliva 300 ni ddoowara dditthanu dda ehakallallo.

²³ Nave ahaarumihella attiitthinnya abulu khumi etukhullalle ezipaso ddaphaama dda mu Iguputo ni abulu khumi emutukhullalle tirigu, buledi ni ddoocha ddimodda dda voolendoni dda attiitthinnya.

²⁴ Sika ahaarumiha asinnaayo nave vootimullani ahaalleella wi, “Muhinakanganaka muttillammo.”

²⁵ Sika yaatimulla ovenyera o Iguputo oya o Kanani wa attiitthiiwa, Yakobo.

²⁶ Ephiyalle, yahaalleella attiitthiiwa wi, “Yosefoolle ookhallawo! Tti oomulamulella Iguputo muttheene!” Yakobo murimaaye waatthomowamo vawi khaakhulupililalle ddoollota ddiwannddo.

²⁷ Koma emulleelle ddittheddenennddo Yosefe aalleelleeye nave oonille magareta ayo Yosefe arumihalleeye wi olliye awellevo vooyaani o Iguputo, murima wa Yakobo wahaamba ohokollweella m'mapuroni.

²⁸ Sika aallota wi, “Ddawoona, mwanaka Yosefe ookhallawo. Kineeroyaawo kamoone kihinakhwe.”