Genesis 44 - Mawu a Mulluku

Orimeella wa kapu

¹ Vatulli viwa Yosefe aamulamula kaporo oowehera enyumbaaye wi, “Oddallihe mathumba a athwaalla ni ddoocha ddinchichi moollikana ni mmo enaaworelliiwa otukhulla. Nave makobiri a arive muthu waahiye owanoni wa nthumba naye.

² Nave owanoni wa nthumba na mung'onong'ono ohiyewo kapwaaka a silivoolle ni makobiraaye ayo apaalleeye omukullella tirigu.” Kaporooyo aheera moollikana ni mmo alamulelliweeye.

³ Oyaaka ni osa, athwaalle yahaakhullelliwa orowa ni abulwiiwa.

⁴ Yeetille vang'ono okhuma m'muzindanimmo, Yosefe aamulleella kaporwaaye oowehera ddittheddene dda mpa mwaye wi, “Timulla, waathamakelle athwaalle. Waaphwanya, waakohe wi, ‘Kaambiiwa tini muhokolloselleenyu ddoonanara munipuroni mwa ddaphaama?

⁵ Mumwiiyere tini kapu oowiryellamo apwiyaaka? Yapaalla woombesa wi edduwelle ddamuhoollo enamupharihesa mutteko kapu yoolla. Mweerilleenyunnddathi tti ddoonanara wunchichi.’ ”

⁶ Kaporoolle aaphwanyille aallota mawu alleelliweeyaalle.

⁷ Alliwaayo yaamwaakhulla wi, “Apwiya, ethiyo munallotella tini mawu wonanko yaalla? Ata naari vang'ono hiyaano khaneera ello yoonanara yawi ddiidda.

⁸ Nyuwaano ni miitthwaanyu mwahoona wi hiyaano voovenyerani o Kanani, naahokollosa makobiri naaphwanyilleehu m'mathumbani mwahu. Ethiyo yawiiyera siliva apaalle golide mpa mwa apwiyaanyu tti tini?

⁹ Vano apwiya oyo mwa hiyaano anaaphwanyeyena kapooyo, iiphiwe nave attheenehi ninaakhalle akaporwaanyu.”

¹⁰ Sika kaporoolle aallota wi, “Ddikhallelle mwemmo mullotellaanyu. Komathi mmodda variyari vanyumva aphwanyeya ni kapooyo anaakhalle kaporwaaka, amodda attheenenyu muneerottaphulliwa.”

¹¹ Vano attheenaayo yaarulla vatthi mwawaakuva mathumbiiwa nave arive muthu aattaphulla nthumba naye.

¹² Kaporo a Yosefoolle ahaashaasha phaamaddene ovenyera va muullupalli ophiyera va mung'onong'ono nave kapooyo aphwanyeyille munthumbani mwa Benjamini.

¹³ Ekaamba ya ethakaraka, attheenaayo yahaahulla ddoowara ddiwa. Yaamumakellellattho katundwiiwoolle va abulu nave ehokollweella omuzindani wulle.

¹⁴ Yuda ni asinnaalle ephiyalle o enyumba ya Yosefe, yamuphwanyille ari wenko nave attheene yaamukokhorella vatthi.

¹⁵ Nave Yosefe aallota wi, “Mweerilleenywiilla tti tini? Ethiyo khamunadduwella wi muthu wonanko miyaano kinnoombesa ddamuhoollo?”

¹⁶ Sika Yuda aallota wi, “Apwiya, ethiyo hiyaano ttuullota tini wa nyuwaano? Ninaaddaakihere weekhiihu mwawiidde? Apaalle ninaaddeellihe weekhiihu mwawiidde? Mulluku ohuupullulla yoolakwaahu. Vano attheenehi niri akaporwaanyu ohiri mmoddave yoolla aphwanyeyille ni kapoolla munthumbani mwaye.”

¹⁷ Koma Yosefe aallota wi, “Iyaayi! Miyaano ngiwora weera ddennddo. Yooyove aphwanyeyille ni kapu sika anaakhalle kaporwaaka. Amoddanyu hokollweellani wa attiitthiinyu mwamurendelle.”

Yuda anamupepesella Benjamini

¹⁸ Sika Yuda ahaatamella wa Yosefe nave allota wi, “Pepaani apwiya, kaakhullelleni mi oorumeyellaanyu wi killote ni nyuwaano. Muhikishelle murima apwiya vawi nyuwaano muri wonanko Farao.

¹⁹ Apwiya, valle mwaanikoha wi, ‘Ethiyo mookhallana attiitthiinyu apaalle mung'onong'onwaanyu?’

²⁰ Nave hiyaano naawaakhullani wi, ‘Nookhallana attiitthiihu awuulluvalla ni mung'onong'onwaahu oyo ayariwe attiitthiihwaayo yuulluvanlle khalle. Muullupallaaye a musombwe yooyo aakhwa khalle. Sika mu erukullu mwa amennya, ookumi tti yoollave nave attiitthinnya ennamukonda wunchichi.’

²¹ Apwiya, valle mwaanilleella wi, ‘Mwamuweena wuno wi kimoone.’

²² Hiyaano naawaakhullani wi, ‘Musombooyo khanavenyevo vamiitthoni va attiitthinnya vawi eera ddiiddo, attiitthinnyaayo okhwa onaakhalle wenko.

²³ Vallethi mwallotille wi khamunaakhullella ophiyera vamiitthoni vanyu naahiwaana mung'onong'onwaahoolla.’

²⁴ “Nihokollweelle wa attiitthiihu oorumeyellaanyu, nahaalleella mawu mattheenaalle.

²⁵ Vano alliwa yaanilleella wi nihokollweellewo wi naakullelle ddoocha vang'ono.

²⁶ Koma hiyaano nahaalleella attiitthiihwaayo wi, ‘Khaniwora oyaawo vawi muthoolle khanaakhullella ophiyera vamiitthoni vaye vaavove mung'onong'onwaahu athaanane ni hiyaano.’

²⁷ Koma attiitthiihu yaallota wi, ‘Munnadduwella wi mwaaraka akiyarenlle anamwani eelli.

²⁸ Mmodda mwa anamwanaalla aakihiya khalle. Sika wi aattakhuniwa ni enama ddawoopiha ddamuhakani kaambiiwa nginamoonekettho waambeella vaavo.

²⁹ Vano mwakaakhattho olla nave yoonanara yamweereyella, sika miyaano kineerokhwa ni ethakaraka.’ ”

³⁰ Yuda aavirellella ollota wi, “Sika kahokollweella wa attiitthaaka, oorumeyellaanyu, ahiivo musomboolla vawi murima wa attiitthaaka ori va olliye,

³¹ yoona wi olliyoolla khaavo, eneerokhwa ni ethakaraka. Sika wi nineerihe tti hiyaano wi attitthaahu ekhalle ni ethakaraka ddookhwana yuulluvanlle.

³² Miyaanothi kaavelleella okumaaka wa attiitthaaka wonanko echikole ya okumi wa Benjamini. Kahaalleella wi kaahiihokollweellana wuno ari ni okumi, nyuwaano mukiipe mullatu miyaano mu okumaaka muttheene

³³ Sika vano apwiya, kinimuuvekani wi miyaano kihalle wuno wi kikhalle kaporwaanyu munipuroni mwa musomboolla. Mwaakhullelleni wi olliyoolla aroweke ni asinnaalla.

³⁴ Miyaano kinaawore mwawiidde orowa wa attiitthaaka musomboolla aahithaanana ni miyaano? Miyaano ngiwora ovillella wi koone otulli wawiddiidda waamorellaka attiitthaaka.”