Genesis 43 - Mawu a Mulluku

Asinne a Yosefe enahokollweella o Iguputo ni Benjamini

¹ Ettalla yahunnuwa wunchichi mu ellapo ya Kanani.

² Vano nibanja na Yakobonne nimuchille tirigu muttheene yamukullalliiwa o Iguputoolle, Yakobo ahaalleella anaayaalle wi, “Muhokollweellewo, mwanikullelle yoocha vang'ono.”

³ Koma Yuda aallota wi, “Muthoolle aanichenjeza moollupella wi khanaakhullella ophiyera vamiitthoni vaye, naahimukusa mung'onong'onwaahoolla.

⁴ Mwanaakhullella wi nimukuse, nineeroyaawo nuukullelleni yoocha.

⁵ Koma mwaahaakhullella, hiyaano khaniyaawo vawi muthooyo aanilleella wi, ‘Ngiwaakhullellani ophiyera vamiitthoni vaka mwaahiwaana mwanamunninyooyo.’ ”

⁶ Yakobo ahaakhulla wi, “Kaambiiwa tini mwakitthollenlleenyu mankhalla miyaano voomulleellani wi mookhalla ni mwanamunninyu mmodda?”

⁷ Alliwaayo yahaakhulla wi, “Ekaamba yawi muthooyo aanakohesesa dda hiyaano ni dda nibanja nahu wi, ‘Ethiyo attiitthiinyu yookhallawove? Ethiyo mookhalla ni mwanamunninyu mmodda?’ Sika hiyaano naphwanella omwaakhulla va nnddo akoheeye. Hiyaano naadduwelle mwawiidde wi vatulli viwa aneeronilleella wi mwanamunnihooyo niyeenawo nimodda.”

⁸ Nave Yuda aamulleella Israele attiitthinnya wi, “Musomboolla mumuhiye m'mattani mwaka nave nikhozeke wi nitimulle. Mwawi ddiiddo attheenehi, nyuwaano, aniihu ni hiyaano khanikhwa ni ettalla.

⁹ Miyaano kinaakhalle wonanko echikole ya okumi wa Benjamini. Kaahiihokollweellana wuno ari ni okumi, nyuwaano mukiipe mullatu miyaano mu okumaaka muttheene.

¹⁰ Nahikokowilleke ddaano neetille ettilla piilli ophiyera vano.”

¹¹ Vano Yakobo attiitthiiwa ahaalleella wi, “Ddikhallelliiwammu, erani ddennddo. Muthooyo mumukusellewo ezipaso ddooddiva dda mwiillaponimmu m'mathumbani mwanyummo wi mwamuvahe. Mumukusellettho makhura awiihella vang'ono, enwi vang'ono, makhura awunkhella oohiyanahiyana, mure,* muteza ni ezipaso ddimoddattho.

¹² Mukuse makobiri ookwakhwana wi mwahokollose makobiri yaphwanyeyille m'mathumbani mwanywaalle vawi apaalle ddeko ddarimavirikana.

¹³ Mukuseni mwanamunninyoolla nave timullani, muyettho wa muthooyo.

¹⁴ Mulluku Amasiva Mattheene aweerelleni echifundo vamiitthoni va muthooyo wi amuhokollose mwanamunninyu mmoddoolle ni Benjamini. Wa miyaano, khaya kaatathilla anamwani attheene, kaatathille.”

¹⁵ Sika asinne a Yosefe attheenaalle yaakusa emphasonndde nave yaakusattho makobiri manchichi, yaamukusattho Benjamini. Nave yaakhozeka, etimulla olendo wooya o Iguputo nave yaaphiya vamiitthoni va Yosefe.

¹⁶ Yosefe amoonille Benjamini, aamulamula kaporwaaye oowehera ddittheddene dda mpa mwaye wi, “Athu alla waavollochihe mpammu. Wiiphe enama nave oyaapeye phaama kaambiiwa athu yaalla enaache ni miyaano otthaana vano.”

¹⁷ Kaporooyo aheera moollikana ni mmo Yosefe amulamulelleeye, ahaakusella allopwanaayo o enyumba ya Yosefe.

¹⁸ Alliwaayo yahoova wunchichi vawoonani wi anaakusella o enyumba ya Yosefe. Nave yaganiza wi, “Ananivollochiha mmu ekaamba ya makobiri alle yahokolloselliwe m'mathumbani mwahu va enthawi yawaambeelle. Anaasha voonihellellavo ekhoto moorurumusa wi anitthattuse akaporwaaye nave wi anaakhe abulwaalla.”

¹⁹ Sika ehinavollowe mpammo yaaphiya wa akaporo a Yosefe oowehera mpoolle,

²⁰ emulleella wi, “Pepaani apwiya, hiyaano naambilleke owaakattho wuno khalle wookulla ddoocha.

²¹ Niphiyalle vanipuroni nookonellavo olendo, voottaphullani m'mathumbani mwahu, arive muthu mwa attheenehi aaphwanya makobiraaye owanoni wa nthumba naye nave makobiraayo yaarivo mattheene wonanko mmo neerengelleehu. Nave makobiraayo noowaana.

²² Noowaanattho makobiri mamodda ookullella ddoocha ddimodda. Khaninamudduwella oyo ahiyalle makobiri m'mathumbani mwahu.”

²³ Kaporooyo ahaakhulla wi, “Muhitathille murima nave muhoove iyaayi. Mullukwaanyu, Mulluku a attiitthiinyu, sika uuhiyereni makobiri m'mathumbani mwanyummo. Makobiraanyu awaambaalle kahaakhella.” Enre ddiiddo ahaakhumihella Simeonoolle.

²⁴ Kaporooyo avollowillena allopwanaayo mpa mwa Yosefe ahaavaha maaddi wi ehuwe manyallwiiwa nave ahaachihattho abulwiiwaalle.

²⁵ Vano allopwanaayo yakhozekella ovelleella emphaso ddiwanndde wa Yosefe oona aphiyaka otthaana, ekaamba yahiiwa wi enaachelle nimodda wenko.

²⁶ Yosefe aphiyalle, asinnaalle yaavelleella emphaso ddiwanndde wa olliye nave yaamukokhorella.

²⁷ Olliye ahaallochella dda okumiiwa nave aakohattho wi, “Ethiyo attiitthiinyu awuulluvallaalle mwakilleelleenywaalle aaselliwa? Ethiyo yookhallawove?”

²⁸ Alliwaayo yahaakhulla wi, “Oorumeyellaanyu, attiitthiihu, aakhallawo nave aakhalla phaama.” Vaavo attheenaayo yaamukokhorellattho emuwaramella Moomuvaha olemu.

²⁹ Yosefe amoonille Benjamini, mung'onong'onwaaye, aallota wi, “Olla sika mung'onong'onwaanyu mwakilleellaanyoolle. Mulluku uudalise, mwanaka.”

³⁰ Allotille ddennddo Yosefe aavenyavo mwawaakuva ekaamba yawi murimaaye waaddalla ni echifundo va mung'onong'onwaayoolle. Ahallille vang'ono winlla, sika aavollowa ochipindani waye inllellaka wenko.

³¹ Avuttalle miitthori ddaye aakhuma aallipattho murima nave aalamula wi yoocha ewe.

³² Yosefe achella va yeekha nave asinnaayo yachella vaweekhiiwattho. Aiguputo aariiyena nimodda mpammo ni alliwa yachella va weekhiiwa ekaamba yawi alliwa yaananariwa ochella nimodda ni Aheberi

³³ Allopwanaayo yakeraatthille vahoollo va Yosefe nave ahaatthatta moothwarana ni oyariwa wiwa, waambeella muullupalli ophiyera mung'onong'ono. Allopwanaayo yoonille mmo aatthattelleeye, yaawehana moottikhina wunchichi.

³⁴ Yoocheeyo yakawiwa ovenyera va tebulo ya Yosefe koma yoocha yoovelleelliwa wa Benjamini yaari yawaata wonanko ya athu atthanu. Sika attheenaayo yaacha ni owirya ni Yosefe ophiyera yaavona nave yaahakallalla nimodda ni olliye.