Genesis 41 - Mawu a Mulluku

Yosefe anattaphullella olloha wa amwene

¹ Viviralle miyakha miilli, Farao aalloha iimenlle mukhwipi mwa muhinje wa Nailo.

² Enthawi yeeyo ahoona eng'ombe dditthanu ni piilli ddooneneva phaama ddiruuwaka m'muhinjenimmo nave ddahaamba ocha munyepu wa mupangoni.

³ Vatulli viwa m'muhinjenimmo mwaaruuwa eng'ombe dditthanu ni piilli ddimodda ddawoonda ni ddoofooka nnddo ddiimellille vamutundani vakhuviru ni eng'ombe ddimoddanndde.

⁴ Vano eng'ombe ddoofookannddo ddaamirya ddaphaamannddo. Sika vaavo Farao aarurumuwa.

⁵ Akonillettho aalloha wiilli. Ahoona makalla a tirigu matthanu ni meelli yiimalle vamuttatthini mmodda nave yaari awiithwa ni oowaraalla phaama.

⁶ Vatulli viwa vaaphuwattho makalla matthanu ni meelli awoonda ni ooshellella ni ephevo yoovenyera wookhuma nndduwa.

⁷ Makalla awoondaayo yaamirya makalla matthanu ni meelli oowaraalla phaamaalle. Farao avenyille, aadduwella wi aamalloha.

⁸ Osaka wene ohinase ekhovaaye yaamora wunchichi wawi aawiithaniha amasenga attheene ni athu attheene eezeru a o Iguputo. Attheenaayo ewiille, Farao ahaatthopoollella ddoolloha ddayennddo koma khaavo naari mmodda aworille ottaphullella.

⁹ Vano oovelleella vinyoolle aamulleella Farao wi, “Ollello kohuupuwella ochimwa waka.

¹⁰ Valle nyu amwene mwaanishella murima hiyaano allupa muttekwaanyu. Nave miyaano ni oomwaapeya buledi attheene mwaaniwallella mundendeni, mu enyumba ya muullupalli owaawehera akhoto.

¹¹ Mahiiyu mamodda arive muthu mwa eellihi aalloha nave orive olloha waakhalla ni ottaphullella wayiwawayiwa.

¹² Mpa nawallelliweehummo mwaakhalla musombwe a Eheberi, oomurumeyella muullupalli owaawehera akhoto a mundendeni mulle. Nave namulleelleehu, olliyooyo aattaphullella phaama moollikana ni olloha wa arive muthu.

¹³ Nave ddaheereya moollikana ni mmo attaphullelleeye. Miyaano kaahokolloselliwa vamuttekoni vaka koma oomwaapeya buledoolle aatthomeyiwa vamuteekhoni.”

¹⁴ Sika vano Farao aamwiithaniha Yosefe nave yaamukhumiha mwawaakuva ondendenko. Nave achemille phaama ni osintha ddoowara, aaya wa Farao.

¹⁵ Nave Farao aamulleella Yosefe wi, “Miyaano kaalloha koma khaavo naari mmodda oyo oowora ottaphullella ddoollohannddo. Vano kohiiwa wi weyaano walleelliwa ddoolloha, eniwa onnadduwella ottaphullella wene.”

¹⁶ Yosefe ahaakhulla wi, “Khe miyaano iyaayi koma Mulluku sika anaawore waattaphullella phaama amwene ddoollohanndda.”

¹⁷ Nave Farao aallota wi, “Miyaano kaalloha kiimenlle mukhwipi mwa muhinje wa Nailo.

¹⁸ Enthawi yeeyo kahoona eng'ombe dditthanu ni piilli ddooneneva phaama ddiruuwaka m'muhinjenimmo nave ddaahaambeella ocha munyepu wa mupangoni.

¹⁹ Vatulli viwa m'muhinjenimmo mwaaruuwa eng'ombe dditthanu ni piilli ddimodda ddawoonda ni ddoofooka. Eng'ombe ddennddo ddaari ddawoonda okhwaranya eng'ombe ddawoonda ddittheddene dda mu ellapo ya Iguputo.

²⁰ Vano eng'ombe ddoofookannddo ddaamirya ddaphaamannddo.

²¹ Koma naari ddamiryalle ddikhwiiwanndde, khaavo naari muthu mmodda aawore ohiyaniha vawi eng'ombe ddoofookannddo kheddaasintheyille mooneyellwiiwa koma ddaari ddoofooka wonanko ddakhallelliiwa khalle. Vano kaarurumuwa.

²² Kikonillettho wiilli kaalloha koonille makalla a tirigu matthanu ni meelli yiimalle vamuttatthini mmodda nave yaari awiithwa ni oowaraalla phaama.

²³ Vatulli viwa vaaphuwattho makalla matthanu ni meelli awoonda ni ooshellella ni ephevo yoovenyera wookhuma nndduwa.

²⁴ Makalla awoondaayo yaamirya makalla matthanu ni meelli oowaraalla phaamaalle. Vano kahaatthopoollella amasenga ddoollohanndda koma khaavo naari mmodda oyo awonre okittaphullella.”

²⁵ Sika Yosefe aamulleella Farao wi, “Olloha opiillinngu onattaphullella ello emoddave. Mulluku oowoonihellani khalleve nnddo anaaweereeye.

²⁶ Eng'ombe dditthanu ni piilli ddoonenevannddo tti miyakha mitthanu ni miilli. Navettho makalla a tirigu matthanu ni meelli oowaraalla phaamaayo tti miyakha mitthanu ni miilli. Ottaphullella wene tti omodda.

²⁷ Eng'ombe dditthanu ni piilli ddawoonda ddawiille vatulli viwanndde navettho makalla matthanu ni meelli ooshellellihiwa ni ephevo yoovenyera wookhuma nndduwanndde, tti miyakha mitthanu ni miilli dda ettalla.

²⁸ Vano wonanko killotelleemi, sika wi Mulluku oowoonihellani khalleve nnddo ddineereye.

²⁹ Vineerokhalla miyakha mitthanu ni miilli dda ddoocha ddinchichi mu ellapo ettheene ya Iguputo.

³⁰ Vatulli viwa, vineerokhallattho miyakha mitthanu ni miilli dda ettalla, sika yawi miyakha ddittheddene dda ddoocha ddinchichinndde ddineerotiwalliwa mu Iguputo muttheene. Ettalleeyo eneerewoononga ellapo.

³¹ Miyakha ddittheddene dda ddoocha ddinchichi khaddiwa dduupuwelliwattho, kaambiiwa ettalla enaaweeyo enaakhalle yawoopiha.

³² Nyu amwene Farao, voollohani opiilli ello emoddamoddave yeeyo, ddinasimikizella wi Mulluku sika akeraatthihalle ellweella nave aneereweera naanweene vaava.

³³ “Vano nyu amwene Farao mutthoolleni muthu awiiwesesa ni eezeru, mumuvahe olamulello va ellapo ettheene ya Iguputo.

³⁴ Farao atthoollettho enduna ddimodda mu ellapo ettheeneella wi ddisungeke erive yaneetthanu ya orive mutundu wa ddoocha va miyakha mitthanu ni miilli ddittheddene dda ddoocha ddinchichi.

³⁵ Etthukumanihe ddoocha ddittheddene dda miyakha ddinawanndda. Yeereke ddittheddenenndda ni olamulellwaanyu nave emutthukumanyiheke ni omuwehera phaama tirigu m'mizindani ddittheddene.

³⁶ Ddoochannddo ddinaakhalle dda veenthawini ya ettalla ya miyakha mitthanu ni miilli eyo enaawe mu Iguputommu. Sika athu a mwiillaponimmu khekhwa ni ettalla.”

Yosefe anatthattusiwa enduna yuullupalli ya o Iguputo

³⁷ Farao ni enduna ddaye yahaakhullella ddittheddene allotille Yosefe.

³⁸ Sika Farao aakoha enduna ddayennddo wi, “Ethiyo ninamphwanye wuuwi muthu mmodda oomukhwaranya olla ari ni munepa wa Mulluku?”

³⁹ Sika Farao aamulleella Yosefe wi, “Vawi Mulluku oowoonihella ddittheddenenndda, khaavottho mmodda awiiwesesa navettho eezeru okhwaranya weyaano.

⁴⁰ Weyaano sika onaalamulelleke enyumbaaka yoomwene nave athwaaka attheene eneerekowiiwellella. Miyaano kinaakhalle muullupalli wa weyaano voomwenenive vaava.”

⁴¹ Sika Farao aamulleellattho Yosefe wi, “Vano miyaano kohuutthoolla weyaano wi okhalle enduna yuullupalli ya ellapo ettheene ya Iguputo.”

⁴² Enre ddiiddo, Farao aarulla emphete yoomwene muyaallani mwaye, amuwariha Yosefe oyaallani waye. Aamuwarihattho ddoowara ddabafuta ni ogufu wa golide munikohini mwaye.

⁴³ Aamuwellihattho va gareta naye naneepiilli noomwene nave akhoto oomuwehera Farao yahaamba okhuwa eri vahoollo va garetanno wi, “Mukokhorelleni.” Sika Yosefe ahaakhella olamulello nave aakhalla enduna yuullupalli ya ellapo ettheene ya Iguputo.

⁴⁴ Farao aamulleella Yosefe wi, “Naari kiri mwene, weyaano waahaakhullella, khaavo naari muthu mmodda oyo anaawore weera erive ello naari weeta wene mu ellapo ettheeneella ya Iguputo.”

⁴⁵ Nave Farao aamuvaha nnddina Yosefoolle nawi Zafenati Panea. Nave aamuvaha mutthiyana nnddina naye Asenati, mwaana a Potifera oyo aari mullupa mukutho a o muzinda wa Oni. Sika Yosefe aheetella ellapo ettheene ya Iguputo.

⁴⁶ Yosefe aari ni miyakha 30 mvo Farao amutthattusalleeye enduna yuullupalli ya Iguputo. Nave Yosefe aatimulla, aamba weetella ellapo ettheene.

⁴⁷ Va miyakhanndde mitthanu ni miilli dda ddoocha ddinchichi, mu ellapo ettheene mwaakhalla ddoocha ddawaata wunchichi.

⁴⁸ Yosefe aatthukumaniha ddoocha wa miyakha mitthanu ni miilli mvo waariiwa ddoocha ddinchichi o Iguputo nave aaddisunga m'muzindani. Vano ahaalamula athu a orive muzinda wi esungeke ddoocha ddoohatiwa waapheella orive muzinda.

⁴⁹ Yosefe ahaalamula athu nave yaamutthukumaniha tirigu awaata wunchichi wonanko mihava dda enyanja. Tirigu ahaata wunchichi mwawi yaahiya omweerengella.

⁵⁰ Miyakha dda ettalla ddihinaphiye, Yosefe ahaayara anamwani aallopwana eelli mwa Asenati, mwaana a Potifera, mullupa mukutho a o Oni.

⁵¹ Sika aallota wi, “Mulluku ookitiwalliha ohoowa waka ottheene wulle vamoddattho ni dda nibanja na attiitthaaka.” Sika mwanaye awaamboolle amuromolla Manase.

⁵² Nave aallotattho wi, “Mulluku ookivaha anamwani mu ellapo ya ddookatamiha ddaka.” Sika mwaana aneepiillooyo aamuvaha nnddina nawi Efuremu.

⁵³ Miyakha mitthanu ni miilli dda ddoocha ddawaata ddimallille,

⁵⁴ sika miyakha mitthanu ni miilli dda ettalla ddaaphiya wonanko Yosefe allotelleeye. Ettalleeyo yaaphiyattho mu ellapo ddimodda ddittheddene koma mu ellapo ettheene ya Iguputo mwaakhalla ddoocha ddinchichi.

⁵⁵ Ettalleeyo ekwakhwanille ellapo ettheene ya Iguputo, athu yahaamba omwinllella Farao wi aavahe yoocha. Nave Farao ahaalleella athu attheene wi, “Khaweni wa Yosefe nnddo aneereeye uulamuleni, mweere ddennddo.”

⁵⁶ Vano ettalleeyo ekwakhwanille, Yosefe aaddihulla ekhokwe dda tirigunndde nave ahaamba waakullihella Aiguputwaayo kaambiiwa ettalla yahunnuwa wunchichi mu Iguputommo.

⁵⁷ Athu oovenyera o ezigawo ddittheddene dda va ellapo yavatthi yaanaphiya o Iguputo woomukulla tirigu wa Yosefe kaambiiwa ettalla yaari yunnuwalle wunchichi orive weko.