Genesis 4 - Mawu a Mulluku

Kaini ni Abele

¹ Adamu aakona ni mwaariye Heva nave mutthiyanooyo aakusa erukullu. Sika aamuyara mwaana aamullopwana nave aallota wi, “Koomwaakhella mwaana mookaviheriwa ni Apwiya.” Sika mwaanooyo yaamuvaha nnddina nawi Kaini.

² Vatulli viwa aamuyarattho Abele, mung'onong'onwaaye a Kaini. Abele aari oochiha enkhosa nave Kaini aari oollima.

³ Viviralle enthawi, Kaini aakusavo ezipaso allimalleeye, aaharaatthella mukutho Apwiya.

⁴ Abele nayeenettho aakusa amodda a anamwani awaamba a enkhosa ddaye nave aavelleella wonanko mukutho enama yaphaama yamakhura. Sika Apwiya yaahakallalla ni Abele ni mukuthwaaye.

⁵ Koma Apwiya kheyaahakallallille ni Kaini ni mukuthwaaye. Ekaamba ya yeella Kaini aasha murima wunchichi, mwawi ekhovaaye yaamora navettho yaawa mahinyare.

⁶ Enthawi yeeyo Apwiya yaamukoha Kaini wi, “Ethiyo oshelle murima tini? Ethiyo omorelle ekhove tini ni owa mahinyare?

⁷ Weerilleke ddaphaama, keerohakallalla ni weyaano koma ekaamba yawi woheera ddoonanara, nichimo noowaatthamella wonanko enama yawoopiha. Ninapaalla wi nuuphare koma weyaano onapaalleya wi ogonjihe nichimonno.”

⁸ Nllapo nimodda Kaini aamulleella mung'onong'onwaaye Abele wi, “Hanko niye omata” Ephiyalle omata wulle, Kaini aamurukunuwella mung'onong'onwaaye nave aamwiipha.

⁹ Sika vano Apwiya yaamukoha Kaini wi, “Ethiyo mung'onong'onwaawo Abele ari wuuwi?” Olliye ahaakhulla wi, “Nginadduwella. Ethiyo mi tti mullupa mutteko oomuwehera mung'onong'onwaaka?”

¹⁰ Apwiya yaamukohattho wi, “Ethiyo weerille tini? Nikhame na mung'onong'onwaawo ninnakinllella miyaano ovenyera muthayani.

¹¹ Sika wootembeleliwa, khoyillimattho ethaya eyo ewinrye nikhame na mung'onong'onwaawo oyo omwiiphalleewe ni mattaawo.

¹² Weesa ollima mmiddo, ethayeeyo kheyimmihaka nave onaakhalle muthu aweeteeta va ellapo yavatthi, aweeteeta shisha nave oohikeraattheya nipuro nimodda.”

¹³ Nave Kaini ahaalleella Apwiya wi, “Mookillaka wunchichi mookhwaranya masivaaka.

¹⁴ Vano mookiikaravo va ellapo yavatthi vamoddattho ni vamiitthoni vanyu. Kinaakhalle aweeteeta shisha, oohikeraattheya nipuro nimodda nave arive muthu anaakiphwanye aneerokiipha.”

¹⁵ Koma Apwiya yaamwaakhulla wi, “Khe ddiiddo, arive muthu oyo anaawiiphe weyaano Kaini aneerollakiwa nave miyaano kineeromuhokollosella otthanu ni opiilli.” Sika Apwiya yaahiya echizindikiro va Kaini omuchenjeza arive muthu anaamuphwanye wi ahimwiiphe Kainooyo.

¹⁶ Vano Kaini aavenyavo vamiitthoni va Apwiya nave aya akhalla mu ellapo yooromolliwa Nodi, wookhuma nndduwa wa Edeni.

Edduullu dda Kaini

¹⁷ Kaini aakona ni mwaariye nave mutthiyanooyo aakusa erukullu. Sika aamuyara Enoki. Vano Kaini aamaka muzinda oyo awuromonlleeye ni nnddina na mwanaye Enoki.

¹⁸ Enoki aamuyara mwaana nave aamuvaha nnddina nawi Iradi. Iradi aamuyara Mehuyaele. Mehuyaele aamuyara Metushaela, attiitthinnya a Lameki.

¹⁹ Lameki aatthenlle atthiyana eelli. Nnddina na mwaariye awaamba naari Ada nave na mwaariye aneepiilli naari Zila.

²⁰ Ada aamuyara Yabala nave olliyooyo sika nikhollo na athu attheene oochiha eziweto ni ookhalla m'misasani.

²¹ Mwanamunne aari Yubale nave olliyooyo sika nikhollo na athu attheene awiipa gitala ni echitolilo.

²² Zila aamuyara Tubala Kaini. Olliyoolla sika nikhollo na athu attheene oophara mutteko woohana malluku mukuwa ni mikoko. Murokora a Tubala Kaini nnddina naye naari Naama.

²³ Vano Lameki aallota ni awariye. “Nyuwaano Ada ni Zila, mwiiwellelle mawaaka, apellani maaru, nyu awaraka. Mi koomwiipha muthu ekaamba yookiphoriiha, kaamwiiphattho musombwe oyo akuukuthalle.

²⁴ Oyo anaamwiiphe Kaini ahokolloselliwe otthanu ni opiilli, sika wi anaakiiphe miyaano Lameki ahakolloselliwe wookwakhwana 77.”

Dda Seti ni Enoshi

²⁵ Adamu aakonattho ni mwaariye Heva nave aakusa erukullu amuyara mwaana. Vano Hevooyo aallota wi, “Mulluku ookivaha mwaana mmodda ovollowa munipuroni mwa Abele olle iiphiwe ni Kaini.” Mwaanooyo aamuvaha nnddina nawi Seti.

²⁶ Seti aamuyara Enoshi. Enthawi yeeyo athu Yahaambeella waallapella Apwiya.