Genesis 38 - Mawu a Mulluku

Yuda ni Tamara

¹ Enthawi yeeyo Yuda ahaahiya asinne aya akhalla wa muthu mmodda a nlloko na Adulamu nnddina naye Hira.

² Wenko Yuda aamoonawo mutthiyana Aakanani, mwaana a Suwa, amutthella.

³ Mutthiyanooyo aakusa erukullu nave amuyara mwaana aamullopwana nave aamuvaha nnddina nawi Ere.

⁴ Aakusattho erukullu emodda nave amuyara mwaana aamullopwana nave aamuvaha nnddina nawi Onani.

⁵ Aamuyarattho mwaana aamullopwana mmodda nave aamwinnya nnddina nawi Shela. Shela ayariweeye, Yuda aari akelle o Kezibu.

⁶ Yuda aamwaashera mutthiyana mwanaye awaamboolle Ere, nnddina naye Tamara.

⁷ Koma makhallello oonanara a Ere yahaashiha murima Apwiya, sika yaamwiipha.

⁸ Sika Yuda aamulleella Onani wi, “Okone ni mwaara muha mwanamunnoolle. Onaphwanella ovollowe munipuroni mwaye wi muha mwanamunno akhalle ni anamwani.”

⁹ Koma Onani aadduwella wi anamwanaayo khekhalla aaye. Sika vookonani ni mutthiyanooyo aatathillella vatthi mmiddwaaye wi ahimuyarelle anamwani mwanamunne.

¹⁰ Eerilleeyenndda ddaamushiha murima Mulluku sika Apwiya yaamwiiphattho Onani.

¹¹ Vaavo Yuda aamulleella mvokohaaye Tamara wi, “Hokollweellani wa attiitthiinyu, mwakhalle naamukhwelle wenko ophiyera mwanaka Shela unnuwalle.” Allotille ddenndda kaambiiwa oova wi Shela ttuukhwattho wonanko asinnaalle. Sika Tamara aahokollweella wa attiitthinnya.

¹² Viviralle enthawi, mwaara Yuda, mwaana a Suwa, aakhwa. Sika vano Yuda amallihalle winlla malirwaayo, olliye ni mukhwaaye Hira Muadulamu, yaaya o Timna woochema enkhosa ddaye.

¹³ Muthu mmodda aamulleella Tamara wi, “Attiitthi a muha mamuno enaya o Timna woochema enkhosa.”

¹⁴ Vano Tamarooyo aarulla ddoowara ddaye dda onaamukhwellenndde awara ddimodda. Ahiipitthiha ekhovaaye ni ekuwo, aya akeraatthi va ettilla yoovollowella o Enaimu. Muzi wa Enaimu waari mukhwipi mwa musewu wooyeella o Timna. Tamara aadduwella wi Shela aari unnuwalle koma Yuda aari ahinamuvelleelle wi amutthelle olliye.

¹⁵ Yuda amoonille mutthiyanooyo, aganiza wi tti hule kaambiiwa aari iipitthihalle ekhove.

¹⁶ Voohidduwellani wi tti mvokohaaye, Yuda aaya vakhwipi va musewu vaari mutthiyanooyo amulleella wi, “Ethiyo ttuukaakhullella wi kikone ni weyaano?” Mutthiyanooyo aakoha wi, “Munaakivahe tini?”

¹⁷ Yuda ahaakhulla wi, “Kineerewuurumihella mwanapuri oovenyera munikhollani mwaka.” Vano Tamarooyo aallota wi, “Ee, kineerewaakhullella mwakinnya echikole wi kiyisunge ophiyera mukirumihelle musaana a epuri.”

¹⁸ Yuda aamukoha wi, “Ethiyo onapaalla echikole ya mutundu tini?” Tamara ahaakhulla wi, “Mukinnye emphetaanyu, mukwaanyu ni mutootwaanyu oyo ori m'mattani mwanyummu.” Vano Yuda aavelleella ddittheddenennddo wa Tamara. Sika Yuda aakona ni mutthiyanooyo nave Tamara aakusa erukullu.

¹⁹ Tamara aaya owaniwa, attaphulla ekuwo iipitthihalleeyena ekhoveelle nave awarattho ddoowara ddaye dda o naamukhwellenndde.

²⁰ Vatulli viwa Yuda aamuruma mukhwaayoolle Hira woovelleella mwanapuroolle wi mutthiyanoolle amuhokolloselle echikoleelle. Koma mukhwaayooyo khaamuphwanyillevo mutthiyanoolle.

²¹ Ahaakoha allopwana a wenko wi, “Ethiyo hule akhalla vamusewuni wooyeella o Enaimoolle ari wuuwi?” Allopwanaayo yaamwaakhulla wi, “Waambeella khalle khavinakhalleke hule vaava.”

²² Aahokollweella wa Yuda amulleella wi, “Ngimuphwannye mutthiyanoolle nave athu a wenko yallotille wi ‘Waambeella khalle khavinakhalleke hule vaava.’ ”

²³ Yuda aallota wi, “Ddeko nnddo akuse ddikhalle ddaaye, woova wi athu enaanittheyeke. Naari ohimuphwannye mutthiyanooyo komave miyaano kaamurumihella mwanapuroolla.”

²⁴ Viviralle miyeri miraru, muthu mmodda aamulleella Yuda wi, “Mvokohaanyoolla Tamara oheera wonanko hule nave ookusa erukullu yavahakani.” Nave Yuda aalamula wi, “Khaweni mwamuphare nave mwamoose viikho wi akhwe.”

²⁵ Voomupharani, Tamara aarumiha mawu wa Yuda attiitthinnya a muha mamune wi, “Miyaano kiri ni erukullu ya mwaneena a ddekonndda. Ngaddiweheseseni apaalle nyuwaano ttuumudduwella mwaneena a empheteella ni mukoolla vamoddattho ni mutootoolla.”

²⁶ Yuda aaddidduwella ddekonnddo nave aallota wi, “Mutthiyanoolla khachimwalle ello koma kichimwalle tti miyaano. Keerihalle tti miyaano voohimuvelleellani wa mwanaka Shela wi amutthelle.” Sika Yuda khaakonillenattho mutthiyanooyo.

²⁷ Ekwakhwanne enthawi yawi Tamara ayare m'mirimani mwaye mwaphwanyeya anapattha.

²⁸ Vooyarani, mmodda mwa anamwanaayo aakhumiha muwono. Muzamba aawuphara muwonooyo awumaka ni mukwe woofiira nave aallota wi, “Olla sika awaamba.”

²⁹ Koma mwaanooyo aawuhokollosella muwari muwonwaaye, mwawi mwanamunne sika aari aawaamba. Sika vano muzamboolle aallota wi, “Wiitthallelle musewu weekha mwawi ddiidda!” Sika mwaanooyo aaromolliwa Perezi.

³⁰ Vatulli viwa mwanamunne aayariwa ni mukwe woofiiroolle ori llellee m'muwononi. Vano olliyoolla aaromolliwa Zera.