Genesis 37 - Mawu a Mulluku

Yosefe ni asinne

¹ Nave Yakobo aavirellella okhalla mu ellapo ya Kanani nko attiitthinnya yakhanlliiwa wonanko mulleto.

² Ella sika epilli ya nibanja na Yakobo. Yosefe ari musombwe a miyakha 17, achiha enkhosa ni epuri nimodda ni asinne, anamwani a Biliha ni a Zilipa, awariwa ang'onong'ono a attiitthinnya. Vano Yosefooyo aanaalleella attiitthinnya ddoonanara ddittheddene yeera asinnaayo.

³ Sika Yakobo aanamukonda Yosefe okhwaranya anaaye amodda attheene kaambiiwa Yosefooyo ayariwe olliye uulluvallille. Sika aamusowella mukanjo wooreera.

⁴ Asinne yoonilliiwa wi Yakobo aanamukonda Yosefe okhwaranya alliwaayo yahaamba omwiita Yosefooyo nave kheyaallotana moohakallalla.

⁵ Nllapo nimodda Yosefe aalloha nave ahaatthopoollella asinne ollohanko. Nndda ddaheeriha wi emwiite wunchichi okhwaranya khalle.

⁶ Olliye ahaalleella wi, “Iwani nnddo killohilleemi.

⁷ Attheenehi naamaka mitolo ddahu dda tirigu m'matani. Nimakaka ddiiddo, mutolwaaka wahiimella. Vano mitolo ddanyu ddahaapheella mutolwaaka ddikokhorille.”

⁸ Nave asinne yaamukoha wi, “Ethiyo onaganiza wi weyaano ttuukhalla mwene nave ttuunilamulella hiyaano?” Sika vano yaamwiita wunchichi okhwaranya khalle ekaamba ya ddoolloha ni ddoollota ddayennddo.

⁹ Vano Yosefe aallohattho nave ahaatthopoollellattho asinnaayo wi, “Koollohattho nave kahoona nndduwa, mweeri ni etheneeri khumi ni emodda ddikikokhorellaka.”

¹⁰ Ahaalleellattho attiitthinnya dda ollohanko ni asinnaalle, attiitthinnyaayo yaamuhumullulla wi, “Ethiyo olloha wenngu onattaphullella tini? Ethiyo onaganiza wi miyaano, amaaywaalla ni asinnwaalla, ttuuwuukokhorella weyaano?”

¹¹ Sika asinnaalle yaamukhallella ehache wunchichi koma attiitthinnya yaakhalla eganizeraka ddenndda.

Okullihiwa wa Yosefe o Iguputo

¹² Nllapo nimodda asinne a Yosefe yaaya o Shekemu woochiha eziweto dda attiitthiiwa.

¹³ Nave Yakobo aamulleella Yosefe wi, “Asinno enachiha eziweto o Shekemu. Kinapaalla wi oye wawoone.” Yosefe ahaakhulla wi, “Ee kineeroyaawo.”

¹⁴ Attiitthinnya yaamulleella wi, “Khawe wawoone asinno ni eziweto ddene yaarimi eri phaama, weera ddiiddo owe okilleelle.” Sika attiitthinnya yaamuruma Yosefe ovenyera o ntapo na Hebroni. Yosefe aphiyalle o Shekemu,

¹⁵ muthu mmodda aamuphwanya aapheellaka muhakanimmo. Nave muthooyo aamukoha Yosefe wi, “Ethiyo onaasha tini?”

¹⁶ Yosefe ahaakhulla wi, “Kinawaashaasha asinnaka. Koophara mwetwaanyu, killeelleni nko enachihiiwa enkhosa.”

¹⁷ Muthoolle aallota wi, “Yavenyillewo khalle wuno. Kaawiiwa ellotaka wi enaya o Dotani.” Sika Yosefe ahaathwara asinnaayo, ophiyera ahaaphwanya o Dotani.

¹⁸ Nave asinnaalle yamoonilliiwa awaaka voorekama, ahinaatamelle naari vang'ono ophiya yaariiwamvo, yahiiwanana wi emwiiphe.

¹⁹ Mwawiiwanana yaallota wi, “Ngamooneni namalloha anawa mvooyo!

²⁰ Hankoni nimwiiphe, mutembwaaye niwuvokhelle mu emodda mwa ehime ddiri mvanndda. Niye nallote wi oottakhuniwa ni enama yawoopiha nave nineerewoona mmo onaakhallelle ottaphullella wa olloha waye wulle.”

²¹ Koma Rubeni ahiiwa ddallota amoddaalle nave aheeseesa wi amuvulluse Yosefe. Sika aallota wi, “Iyaayi, nihimwiiphe.

²² Nimuvokhelle mwiihimeni yoohikhalla ni maaddeella ochipululuni weewuno. Nihimuphoriihe naari vang'ono iyaayi.” Rubeni yoolingaaye yaari yawi amuvulluse Yosefe m'mattani mwiwa nave amuhokolloselle wa attiitthinnya.

²³ Yosefe aaphwanyille asinnaayo, alliwaayo yaamurulla mukanjwaaye wooreeroolle,

²⁴ nave yaamuvokhella mwiihimeni yawumma.

²⁵ Echaka, yahoona mulloko wa amalonda ovenyeraka o Giliyadi. Ekamira* ddiwa dditukhullalle makhura awunkhella oohiyanahiyana olendo wooya o Iguputo.

²⁶ Nave Yuda ahaakoha asinne wi, “Ethiyo ninaaphurevo tini namwiipha munnihu nave nakhuwa wi khanimwiiphalle?

²⁷ Hankoni nimukullihe wa amalondaalla vawi olliyoolla tti mwanamunnihu a nipelle nimodda.” Nave asinnaayo yahaakhullella.

²⁸ Nave vano amalonda amodda yaviriiwa vaavo, asinnaayo yaamukhumiha Yosefe mwiihimeni mulle nave emukulliha wa amalondaayo va mutengo wa makobiri asiliva makhumi meelli. Nave amalondaayo yaayaana Yosefe o Iguputo.

²⁹ Vano Rubeni ahokollweelle wiihimeni wulle amuphwanyille Yosefe ahiimo. Vaavo ahaahulla ddoowara ddaye moomoriwa ethakaraka.

³⁰ Nave aahokollweella wa asinnaalle aalleella wi, “Musomboolle khaamo! Vano miyaano kinaaye kakomelle wuuwi?”

³¹ Sika asinne a Yosefaalle yahiipha epuri nave etthaveya mukanjo wa Yosefe munikhamenimmo.

³² Nave yaakusa mukanjoolle eya yawoonihella attiitthiiwa. Nave yaallota wi, “Ngoonani niphwannyeehu. Khe mukanjo wa mwaninyu olla apaalle khe yooyo?”

³³ Yakobo aawudduwella mukanjooyo nave aallota wi, “Ee, ddawoona tti mukanjo wa mwanaka! Enama yawoopiha yoomwiipha mwanaka. Kookhwa miyaano, Yosefe oottakhuniwa!”

³⁴ Sika Yakobo ahaahulla ddoowara ddaye nave awara echiguduli vawoonihani ethakaraka. Nave ahinlla maliro a mwanayaayo va enthawi yoorekama.

³⁵ Anaaye attheene aallopwana ni aatthiyana yaawa wi emukhurumuse murima koma olliye aakhoota ni wi, “Kinaakhalle kinllaka maliro a mwanaka ophiyera kivollowille mu mahame mmo muri olliyooyo.” Sika aavirellella winlla ekaamba ya Yosefe mwanaye.

³⁶ Enthawi yeeyo amalondaalle yaari emukullihalle Yosefe wa Potifara o Iguputo. Potifarooyo aari enduna yuullupalli ya akhoto oowehera enyumba ya Farao.