Genesis 35 - Mawu a Mulluku

Mulluku anamudalisa Yakobo o Betele

¹ Vano Mulluku aamulleella Yakobo wi, “Timulla, oye o Betele, wakhalle wenko. Wamakewo nikuwa na Mulluku oyo awooneyelle enthawi wamuthaweewe mwanamunno Esau.”

² Sika Yakobo ahaalleella a mu nibanja naye nittheene ni athu attheene aariiyena wi, “Tathillani milluku ddeelleto nnddo ddiri variyari vanyu. Muddeellihe nyookhaanyu nave muware ddoowara ddaphaama.

³ Nineerotthaamawo wuno nave nineeroya o Betele nko kineereemi kamake nikuwa na Mulluku oyo akikaviherille va enthawi ya ddookatamiha ddaka. Vawi olliye sika akhanlle akiweheraka orive weko kayeemiwo.”

⁴ Sika milluku ddeelleto ddittheddene anaaye yaariiwana, yaaddivelleella wa Yakobooyo, vamoddattho ni endolo dda m'maaruni yawariiwa. Ddittheddenennddo yaaddivuhellella vatthi va muteekho wa muthundu vakhuviru ni Shekemu.

⁵ Yakobo ni anaaye yatimulliiwa, athu attheene a mizinda ddawaapheella yahoova wunchichi vawi yaalephela waathamakella.

⁶ Sika Yakobo ni athwaaye yaaphiya o Luzi, nipuro nooromolliwattho Betele mu ellapo ya Kanani.

⁷ Aamaka nikuwa wenko nave nipuronna yaaniromolla Betele, ekaamba yawi wenko sika Mulluku adduupullullalleeye wa Yakobo enthawi amuthaweeye mwanamunne.

⁸ Debora oomullella Rebeka ovenyera enamwanaaye, akhwenlle wenko nave aavitthiwa vatthi va muteekho wa muthundu o Betelenko. Sika nipuronno naaromolliwa wi Muteekho wa Winlla.

⁹ Yakobo awiillewo o Mesopotamiya wulle, Mulluku aamooneyellattho nave amudalisa.

¹⁰ Mulluku aallota wi, “Nnddina nawo tti Yakobo koma waambeella ollello nnddina nawo ninaakhalle Israele.” Sika ahaamba oromolliwa Israele.

¹¹ Nave Mulluku aamulleella wi, “Mi tti Mulluku, Amasiva Mattheene. Nave muyarane wi mwaate. Edduullu ddawo ddineerokhalla mitundu ddinchichi nave ovenyera mwa ddennddo muneerokhalla mamwene.

¹² Kineerewuuvaha ellapo eyo kamvahilleemi Abrahamu ni Isaki. Ellapo yeella kineeroyivahattho wa edduullu ddawo, weyaano wakhwa.”

¹³ Vano Mulluku aamuhiya Yakobo vanipuroni nne alloteeyena.

¹⁴ Yakobo ahiimesa nlluku na yawuupuwella va nipuro nenno. Aavelleella mukutho wayoowirya vanllukunimvo nave aanizoza ni makhura.

¹⁵ Yakobo aaniromolla nipuronno Betele.

Okhwa wa Rakele

¹⁶ Vano attheene yaavenyawo o Betele koma ehinaphiye o Efurata, enthawi yawi Rakele ayare yaamukwakhwanella nave oyara waye waamukatamiha wunchichi.

¹⁷ Ddiphiyalle voonanara wunchichi, azamba yaamulleella wi, “Muhoove, yoolla tti mwaana aamullopwana mmoddattho.”

¹⁸ Vano Rakele amalliheyeeye, nngu avumellaka muddullu, aamuvaha nnddina mwaanooyo nawi Benoni, koma attiitthinnya yaamuvaha nnddina nawi Benjamini.

¹⁹ Rakele akhwilleeye, avitthiwe mukhwipi mwa musewu wooya o Efurata, sika wi o Betelehemu.

²⁰ Nave Yakobo ahiimesa nlluku na yawuupuwella va mahame a Rakele. Nllukunno nookhallawove ophiyera ollello.

²¹ Yakobo aakhwaranya aya atthipella misasa ddaye ntthella na nttattha na Edere.

Anamwani aallopwana a Yakobo

²² Yakobo ari mwiillaponimmo, Rubeni aakona ni Biliha, mmodda mwa awariye ang'onong'ono a attiitthinnya nave Yakobo ahiiwa ddenndda. Yakobo aari ni anamwani aallopwana khumi ni eelli.

²³ Anamwani aallopwana a Leya yaari Rubeni mwaana awaamba a Yakobo, Simeoni, Levi, Yuda, Isakara ni Zebuloni.

²⁴ Anamwani a Rakele yaari Yosefe ni Benjamini.

²⁵ Anamwani a Biliha kaporo a Rakele yaari Dani ni Nafutali.

²⁶ Anamwani a Zilipa kaporo a Leya yaari Gadi ni Ashere. Yaalla sika anamwani aallopwana a Yakobo yayarelliwe o Mesopotamiya.

Okhwa wa Isaki

²⁷ Yakobo aaphiya wa attiitthinnya o Mamure, nkottho waromolliwa o Kiriyati Ariba apaalle Hebroni, nko wakhalla Abrahamu ni Isaki wonanko alleto.

²⁸ Isaki akhwille ari ni miyakha 180.

²⁹ Nave aakhwa avitthiwa mu mahame uulluvallille wunchichi. Anaaye, Esau ni Yakobo sika yamuvitthalle mu mahame.