Genesis 34 - Mawu a Mulluku

Opharelliwa wa Dina

¹ Nllapo nimodda Dina mwaana aamutthiyana a Yakobo, a erukullu ya Leya, aaya wawaarera ni aatthiyana amodda a mwiillaponimmo.

² Shekemu, mwaana a Hamori Muhivi mwene a echigawo ya ellapweeyo, amoonille namwallooyo, aakonana momupharella.

³ Vawi Shekemu aamukonda wunchichi Dina ahaambella omullotella mawu oomukohera namwallooyo.

⁴ Sika ahaalleella attiitthinnya wi, “Mukikuselle namwalloolla wi akhalle mwaaraka.”

⁵ Yakobo ahiiwa dda ddoowulliha muru nnddo ddamweereyelle mwanaye Dina voopharelliwani koma vawi anaaye aallopwana yaari obusani woochiha eziweto, khaaweerillevo ello ophiyera alliwaayo ewiille.

⁶ Hamori, attiitthinnya Shekemu, yaaya wawaarera ni Yakobo.

⁷ Va enthawi yeeyo anamwani a Yakobo yaari yiikimaphiya wene ovenyera obusani wulle. Anamwanaayo yiiwalle ddennddo, yaasha murima wunchichi. Yaananariwa wunchichi vawoonani wi Shekemu aheera ello yoonanara wunchichi eyo tti yoowulliha muru mu Israele, voomupharellani Dina.

⁸ Sika Hamori ahaalleella wi, “Mwanaka Shekemu oomukonda mwaninyu. Kinimuuvekani, mwaakhullelleni wi amutthelle.

⁹ Hankoni niiwanane wi nitthellaneke variyari vahu. Hiyaano naatthelleke aniinyu, nyuwaano mwaatthellekettho aniihu.

¹⁰ Ddeeddiiddo muneerekokhalla ni hiyaano mwiillaponi mwahummu. Mukeraattheye mwamurendelle orive weko munapaalleenyuwo, mukulliheke malondaanyu mwamurendelle nave mukulleke mapuro oomakavo enyumba moopaalla mwanyu.”

¹¹ Vatulli viwa Shekemu ahaalleella attiitthinnya a Dina ni arokoriyaalle wi, “Mukeerelle echifundo nave kineerewuuvahani ddittheddene munaapaalleenyu.

¹² Killeelleni emphaso eyo munapaalleenyu nave muromolle orive mutengo wa emphaso yootthellella. Miyaano kineerewuuvahani erive ello munaaromolleenyu, mwakaakhullella wi kimutthelle namwalloolla.”

¹³ Koma anamwani a Yakobo yaawaakhulla Shekemu ni attiitthinnya mwawaalleka vawi Shekemu aheera ddoomuwulliha muru Dina murokoriwa.

¹⁴ Alliwaayo yaallota wi, “Khanaakhullella wi murokorihu atthelliwe ni muthu oohiphaddiwa. Ello yeella tti yoowulliha muru wa hiyaano.

¹⁵ Ninaakhullelle vaavove nyuwaano mwakhalla wonanko hiyaano nikhallelleehummu, vawaaphaddani aniinyu aallopwana attheene.

¹⁶ Sika vaavo nineerowaakhullellani waatthella aniihu nave hiyaanottho nineerekewaatthella aniinyu. Sika nineerokeraattheya variyari vanyu wi nitthattuwe nlloko mmodda.

¹⁷ Koma mwaahaakhullella ninalloteehunndda wi muphaddiwe, hiyaano nineeromukusa namwalloolla nirowekena.”

¹⁸ Mawaalla yaamuddivella wunchichi Hamori ni mwanaye Shekemu.

¹⁹ Nave Shekemu ahaakuva weera ddapaalleyannddo, ekaamba yawi aamukonda wunchichi mwaana a Yakobo. Vano Shekemu aanavahiwa olemu wunchichi munibanjani noowaniwanno.

²⁰ Vano Hamori ni mwanaye Shekemu yahiithaniha mutthukumano va mullako woovollowella m'muzindaniiwa, enallota ni athu a m'muzindanimmo wi,

²¹ “Athwaalla tti akhwiihu. Sika niwaakhullelle wi ekhalle mwiillaponi mwahummu wi epangeke malonda mwamurendelle. Ellapweella tti yuullupalli nave eneerewaakwakhwanella alliwaayo sika hankoni vano nitthellaneke.

²² Koma athwaalla enaakhullelle okhalla variyari vahu ni ottakanyiherana ni hiyaano wi nikhalle mutundu mmodda, vaavove hiyaano naaphadda allopwana attheene wonanko eneerelliiwa alliwaayo.

²³ Ethiyo nndda kheddinattaphullella wi eziweto ddiwa ni katundwiiwa ddinaakhalle ddaahu? Sika vano hankoni naakhullelle wi ekhalleke variyari vahu.”

²⁴ Athu attheene a m'muzindanimmo yahaakhullella ddoollota dda Hamori ni Shekemu nave allopwana attheene a m'muzindanimmo yaaphaddiwa.

²⁵ Viviralle mallapo mararu, makhwata a ophaddiwa wulle ehinavolle, anamwani eelli a Yakobo, Simeoni ni Levi, arokoriye a Dina, yaakusa mavakiiwa akhoto. Nave evollowa mwawiitta m'muzindani mulle, ewiipha allopwana attheene.

²⁶ Yaamwiiphattho Hamori ni mwanaye Shekemu. Nave voorowani yaamukusa Dina ovenyera mpa mwa Shekemu.

²⁷ Simeoni ni Levi ewiiphalle allopwana attheene a m'muzindani mulle, anamwani amodda a Yakobo yaaphiya va awiiphiwaalle nave yahaakha ddittheddene dda m'muzindammo, ekaamba yawi yaamupharella murokoriwa.

²⁸ Yahaakha enkhosa, epuri, eng'ombe ni abulu vamoddattho ni ddittheddene ddaari m'muzindanimmo navettho ni ddoocha ddiwa.

²⁹ Yaakusa eyuuma ettheene nave yahaaphara atthiyana attheene ni anamwani, yaakusattho erive ello ya mpa.

³⁰ Yakobo aamulleella Simeoni ni Levi wi, “Hii! Mookittatthamullella ekhoto nave mohunkhiha nnddina naka variyari va athu mwiillaponimmu, Akanani ni Aperezi. Miyaano nginna athu anchichi, sika alliwaalla yatthukumana wi ekihelle ekhoto, miyaano ni nibanja naka nittheene, attheene nineerewoonongiwa.”

³¹ Koma alliwa yahaakhulla wi, “Hiyaano khanaakhullella wi Shekemu amutthattuse hule murokorihu.”