Genesis 32 - Mawu a Mulluku

Yakobo anakhozekella okumana ni Esau

¹ Yakobo aatimulla olendwaaye nave angelo a Mulluku yaakumana ni olliye.

² Awoonilleeye aallota wi, “Olla tti mulloko wa akhoto a Mulluku.” Sika nipuronno aaniromolla Mahanaimu.

³ Vano Yakobo ahaarumiha amithengaaye wa Esau mwanamunne o Seiri, o ellapo ya Edomu.

⁴ Ahaalangiza wi yamulleelle wi, “Miyaano Yakobo oorumeyellaanyu kakhalla wonanko mulleto wa apwiyaaka Labani nave kookhallawo enthawi yoorekama ophiyera ollello.

⁵ Kookhallana ni eng'ombe, abulu, enkhosa ni epuri navettho akaporo aatthiyana ni aallopwana. Kinarumiha mawaalla wa nyuwaano apwiyaaka wi mukeerelle echifundo vookoonani miyaano.”

⁶ Amithengaayo ehokollweelle wa Yakobo, yaallota wi, “Naaya wa mwanamunninyu Esau nave animawa wi akumane ni nyuwaano ari ni athu 400.”

⁷ Vano Yakobo ahoova wunchichi nave aatathilla murima sika ahaakawa milloko miilli athu aariiyena ni enkhosa, epuri, eng'ombe navettho ekamira.*

⁸ M'murimani mwaye aganiza wi, “Esau awa wi awane ekhoto ni mulloko wawaamboolla, sika mulloko mmoddooyo ttuuthawa.”

⁹ Vano Yakobo ahaamba ovekella wi, “Mulluku a nikhollo naka Abrahamu, Mulluku a attiitthaaka Isaki, mukiiwe miyaano! Nyu Apwiya mwaakilleella wi, ‘Hokollweella o ellapwaawo, o ellapo ya abalaawo, kineeroweeriha wi ddeko ddiweetelle phaama.’

¹⁰ Miyaano ngiphwanenlle waakhella echikondi yoohisintheya ni echikhulupililo yoororomelleya mukoonihalleenyu mi oorumeyellaanyu. Kamullapuwalle Yordani kihinna erive ello koma kaarina ekopove koma vano kinahokollowa ni milloko miillinndda.

¹¹ Kinimuuvekani, kivulluseni o masiva a mwanamunnaka Esau. Kinoova wi apaalle anaweella okihella ekhoto nave attheenehi aneeroniipha ni atthiyana ni anamwanaalla.

¹² Upuwellani lonjezo nanyunne nawi, ‘Kineerewuupwatha wi ddeko ddiweetelle phaama nave kineerewuuvaha edduullu ddinchichi ddooheerengeya. Ddinaakhalle ddinchichi wonanko mihava dda mukhwipi mwa enyanja.’ ”

¹³ Akonille wenko mahiiyu yaayo, vatulli viwa aatthoollavo emphaso variyari va eyuumaaye ettheene aariiyena monga

¹⁴ epuri ddaamutthiyana 200 ni ddaamullopwana 20, enkhosa ddaamutthiyana 200 ni ddaamullopwana 20,

¹⁵ ekamira 30 ni aniiwa, eng'ombe ddaamutthiyana 40 ni ddaamullopwana khumi ni abulu aamutthiyana 20 ni aamullopwana khumi.

¹⁶ Orive mulloko wa eziweto aawuhiya m'mattani mwa kaporo wi ahoollelle nave ahaalleella attheenaayo wi, “Nyuwaano muhoolle vang'ono nave vaweetani ni milloko dda eziweto mooneseseke wi vikhalleke mpata variyari va orive mulloko.”

¹⁷ Aamulleella kaporo oohoollella mulloko wawaamba wi, “Mwanamunnaka Esau akumana ni weyaano nave akoha wi, ‘Ethiyo apwiyaawo ttaani? Ethiyo onaya wuuwi? Ethiyo eziweto ddiri vahoollomva tti ddawani?’

¹⁸ Weyaano waakhulle wi, ‘Ddenndda tti dda oorumeyellaanyu Yakobo nave anaddirumiha wa nyuwaano apwinnya wi ddikhalle emphaso. Olliyooyo ari mutulli mwahummu.’ ”

¹⁹ Sika aamulleellattho kaporwaaye aneepiilli mawu amoddamoddave yaayo, vamoddattho kaporo aneeraru, ophiyera attheene yaaneeta moohoolliha eziweto. Ahaalleella wi, “Nndda sika munaamulleelleenyu Esau, mwakumanana.

²⁰ Mulloteke wi, ‘Navettho oorumeyellaanyu Yakobo ari mutulli mwahummu.’ ” Yakobo aganiza wi, “Koomukhurumusa murima ni emphaso kimurumihelleeminndda nave kakumanana apaalle aneerokaakhella phaama.”

²¹ Sika emphasonnddo ddaahoolla nave mahiiyu yaayo Yakobo aakona omisasani wulle.

Yakobo anallipana ni muthu a o Penuwele

²² Mahiiyu yaayo Yakobo aavenya, aakusa awariye eelli ni akaporwiiwa eellaalle ni anaaye khumi ni mmodda nave aallapuwa Yaboki.

²³ Aallapusalle athu attheenaalle, aallapusattho eyuumaaye ettheene.

²⁴ Olliye ahallille mutulli, yeekha. Vano vaaphiya muthu oyo allipanilleeyena ophiyera otte waambeellaka osa.

²⁵ Muthooyo oonilleeye wi khapambana, aamukurukunyulla Yakobo voomellella kasambara sika kasambarooyo aakurukunyuwa yallipaniiwa.

²⁶ Vano muthooyo aallota wi, “Kihiye kiroweke kaambiiwa otte onimasa.” Koma Yakobo ahaakhulla wi, “Nguuhiya wi oroweke ophiyera okidalisalle.”

²⁷ Muthooyo aamukoha wi, “Nnddina nawo ttaani?” Yakobo ahaakhulla wi, “Nnddina naka tti Yakobo.”

²⁸ Muthooyo aallota wi, “Nnddina nawo khanikhallattho Yakobo. Vawi woollipana ni Mulluku vamoddattho ni athu nave woopambana, sika nnddina nawo ninaakhalle Israele.”

²⁹ Vano Yakobo aallota wi, “Nanyeenettho mukilleelle nnddina nanyu.” Koma muthooyo ahaakhulla wi, “Onakikohera tini nnddina naka?” Nave muthooyo aamudalisa Yakobo.

³⁰ Yakobo aallota wi, “Koomoona Mulluku vamiitthoni ni vamiitthoni nave kookhalla ni okumi.” Sika nipuronno aaniromolla Penuwele.

³¹ Nndduwa naari nikhumalle Yakobo atimulleeyewo o Penuwele nave eeta moottutthunya ekaamba yawi aakurukunyulliwa kasambara.

³² Sika ekaamba ya yeella ophiyera ollello edduullu ddittheddene dda Israele kheddinacha musempha wa voomellella kasambara ekaamba yawi tti vamusemphani wa voomellella kasambara mvo Yakobo akurukunyulliweeye.