Genesis 31 - Mawu a Mulluku

Yakobo anamuthawa Labani

¹ Yakobo ahiiwa wi anamwani a Labani yallota wi, “Yakobo ookusa ddittheddene dda attiitthiihu. Aphwannye eyuumaaye ovenyera mu eyuuma ya attiitthiihu.”

² Yakobo ahoonattho wi Labani khaamupwatha wonanko eerelleeye khalle.

³ Sika Apwiya yaamulleella wi, “Hokollweella o ellapo ya makhollwaawo ni ya abalaawo nave miyaano kineerokhalla ni weyaano.”

⁴ Sika Yakobo aarumiha mawu wa Rakele ni Leya wi akumanena obusani nko waari eziweto ddaye.

⁵ Aphiyallewo, olliye ahaalleella wi, “Kohoona wi attiitthiinyu khenakipwatha wonanko yeerelliiwa khalle. Koma Mulluku a attiitthaaka ookhalla ni miyaano.

⁶ Eellinyu munnadduwella mmo ni masivaaka mattheene kaapharelleemi mutteko attiitthiinyu.

⁷ Koma alliwaayo aakilleka nave aakhalla yaakakhanihaka mallivellwaaka okhumi. Koma Mulluku khaapaallille wi akeerelle ddoonanara.

⁸ Enthawi ddittheddene attiitthiinyu yallota wi, ‘Kinuullivelle eziweto dda madonthomadontho,’ Eziweto ddittheddene ddaarella anamwani a madonthomadontho. Nave yallota wi ‘Kinuullivelle eziweto dda malembamalemba,’ Eziweto ddittheddene ddaarella anamwani a malembamalemba.

⁹ Mulluku ohaakha eziweto ddittheddene wa attiitthiinyu nave ookivaha miyaano.

¹⁰ “Va enthawi eyo eziweto ddiniitumiiwa, miyaano kaalloha. Nave kahoona wi anankhoro yaddiwellaayo yaari a mizeremizere ddaweella, a madonthomadontho ni a mankhaangamankhaanga.

¹¹ Muullohani, mungelo a Mulluku aallota ni miyaano wi, ‘Yakobo,’ Nave kahaakhulla wi, ‘Miyaano!’

¹² Olliye aallota wi, ‘Tukhulla miitthwaawo nave ona, anankhoro attheene enawellaalla tti amadonthomadontho, amizelemizele ddaweella ni amankhaangamankhaanga. Ddenndda kenre tti miyaano vawi kohoona nnddo Labani anaweerelleeye.

¹³ Mi tti Mulluku awooneyelle o Betele wulle wiimesilleewe nlluku na yawuupuwella nave waanizoza ni makhura navettho wenko waallupella. Okhozeke vano, ovenyewo wuno, ohokollweelle o ellapo yoowaninyu.’ ”

¹⁴ Rakele ni Leya yahaakhulla wi, “Khavihallille erive ello wi ttuuhallana ovenyera wa attiitthiihu.

¹⁵ Hiyaano attiitthiihu enaneesa alleto. Yaanikulliha nave makobiri yaaphwanyilliiwa ovenyera mwa hiyaano, yahaamalla waacha mattheene.

¹⁶ Eyuuma ettheene Mulluku ohaakha wa attiitthiihu, tti yaahu ni aniihu, sika erani nnddo Mulluku uulleelleenyuni.”

^17-18 Sika Yakobo aakhozekella olendo woorowa wa attiitthinnya o Kanani. Nave ahaawelliha anaaye ni awariye va ekamira.* Nave eziweto ddittheddene yaaddihoolliha enaddittottha ni ddittheddene addiphwanyilleeye o Mesopotamiya wulle.

¹⁹ Labani aari akelle woochema enkhosa. Nave ari wenko, Rakele ahiiya milluku dda mpa mwa Labani attiitthinnya.

²⁰ Sika Yakobo aamulleka Labani Muaramoolle voohimullaanyani wi animavenyavo.

²¹ Sika aakusa ddaaye ddittheddene, avenyavo moothawa. Aatimulla, allapuwa muhinje wa Yufurate, aamba olendo wooya o ellapo yamiyaango ya Giliyadi.

Labani anamuthamakella Yakobo

²² Viviralle mallapo mararu, Labani ahiiwa wi Yakobo oothawa.

²³ Vano ahaakusa athwaaye, anamuthamakella Yakobooyo mallapo matthanu ni meelli, ophiyera aamuphwanya o ellapo yamiyaango dda Giliyadi.

²⁴ Muullohani mahiiyu yaayo, Mulluku aamulleella Labani Muaramoolle wi, “Onesesa wi ohimoopopihe Yakobo mu erive ettilla.”

²⁵ Vano Labani aamuphwanya Yakobo atthipenlle misasa omiyaangoninnddo. Olliyettho Labani aatthipella misasa ddaye wenkottho o ellapo yamiyaango ya Giliyadi.

²⁶ Labani aamukoha Yakobo wi, “Kaambiiwa tini okillekilleewe niwaakusa anaaka aatthiyana wonanko oophariwa okhotoni?

²⁷ Kaambiiwa tini wakillekilleewe nave okithawa ohikilleella? Wakilleelleke keerowaakhullella moohakallalla nave viri wiipa machipo ni asikoma ni magitala.

²⁸ Khonapaalla wi killaanyane ni edduullu ddaka ni anaaka. Woheera ddookarangeya.

²⁹ Kookhalla ni masiva ooweerella yoonanara koma mahiiyu evirallaalla, Mulluku a attiittho ookilleella wi, ‘Onesesa wi ohimoopopihe Yakobo mu erive ettilla.’

³⁰ Kinnadduwella wi waatimulla kaambiiwa waapaallesesa ohokollweella owaninyu. Koma kaambiiwa tini okiiyerilleewe milluku ddaka.”

³¹ Yakobo ahaakhulla wi, “Kaamoova kaambiiwa kaganiza wi ttuukaakha aniinywaalla.

³² Koma mwaphwanya wi mmodda a hiyaano vaava ari ni milluku ddanyunnddo, iiphiwe yooyo. Athu niriihunaalla ekhalle mboni nyuwaano vawaashani ddeko ddanyu mukatunduni muttheenoolla. Sika mwaphwanya ddeko ddanyunnddo muddikuse.” Vawi Yakobo khaadduwella wi Rakele sika iiyalle millukunnddo.

³³ Nave Labani aavollowa m'musasani mwa Yakobo ni m'musasani mwa Leya navettho m'musasani mwa akaporwaaye aatthiyana eellaalle koma khaaphwanyillemo milluku ddayennddo. Sika vano aavollowa m'musasani mwa Rakele.

³⁴ Rakelooyo aari asunge millukunnddo vatthi va saduro ya ekamira nave olliyooyo aakeraatthella vaavo. Labani ahaashaasha m'musasani koma khaaphwanyillemo.

³⁵ Rakele ahaalleella attiitthinnya wi, “Attiitthi, muhinakishella murima ekaamba yawi ngiimenlle moovelleella olemu vamiitthoni vanyu. Miyaano ngiri phaama ekaamba kiri omweerini.” Sika Labani khaaphwanyille milluku ddayenndde.

³⁶ Vano Yakobo aasha murima wunchichi nave moosimwa aamukoha Labani wi, “Ethiyo mullatwaaka tti ttuuvi? Ethiyo kichimwalle tini wi nyuwaano mukithamakelleke ddiidda?

³⁷ Vawi mohaashaasha variyari va katundwaaka muttheene, ethiyo muphwanyillemo tini yaanyu? Eyo muphwannyeenyumo muyikhumihelle vaweellamva wi athwaanyu ni athwaaka eyoone. Nave alliwaayo sika eneeruza variyari va nyuwaano ni miyaano wi emphwanye aphaama ttaani.

³⁸ Kookhalla ni nyuwaano miyakha 20 ophiyera ollello nave enkhosa ddanyu ni epuri ddanyu ddene kheddaavuddalle naari omodda. Nave miyaano nginamullawiheke omuttakhuna nankhoro a enkhosa a munikhollani mwanyu.

³⁹ Enkhosa yattakhuniwa ni enama yawoopiha, miyaano kaanallivella enthawi ddittheddene, ngaaphiyana vamiitthoni vanyu wi kooneye oohilakwa. Mwaanoonesesa wi killivelle erive ello yawiiyiwa mahiiyu apaalle otthaana.

⁴⁰ Enthawi ddinchichi kaanahoowa ni oviha otthaana navettho ni oriirya mahiiyu. Ata, ngaakona.

⁴¹ Mmu sika ddeko ddakhallelliiwa va miyakha 20 nnddo kakhanlleemi ni nyuwaano. Kohuupharellani mutteko miyakha khumi ni misese ekaamba ya aniinyu eellaalla nave miyakha mitthanu ni mmodda ekaamba ya eziweto. Komave mookhalla murukunusaka okumi mallivellwaaka.

⁴² Mulluku a attiitthaaka, Mulluku a Abrahamu, Mulluku oyo Isaki amooveye, ahikhanlleke ni miyaano, ddaano mukiikarihalle khalle mattave. Koma Mulluku ahoona ddookatamiha ddaka ni mitteko ddaka nave mahiiyu evirallaalla ohuuhumullullani.”

Echipangano variyari va Yakobo ni Labani

⁴³ Labani aamwaakhulla Yakobo wi, “Anamwani aatthiyanaalla tti aaka, aniiwaalla tti aakattho ni eziweto ddittheddenenndda. Koma ethiyo vano kineere tini wa anaaka aatthiyanaalla ni edduullu ddakanndda?

⁴⁴ Vano hanko nikeraatthihe echipangano wi ekhalle omboni variyari va weyaano ni miyaano.”

⁴⁵ Sika Yakobo ahiimesa nlluku na yawuupuwella.

⁴⁶ Ahaalleella athwaaye wi etotelle malluku awuukellelle nipuro nimodda. Nave vakhwipi va nipuronno yaachellavo yoocha.

⁴⁷ Vano nipuronno Labani aaniromolla Yagara Sahaduta, koma nipuro nennottho Yakobo aaniromolla Galedi.

⁴⁸ Vatulli viwa Labani aallota wi, “Nipuro nenna ninaakhalle omboni variyari va miyaano ni weyaano.” Sika nipuronna yaaniromolla Galedi.

⁴⁹ Labani aallotattho wi, “Apwiya eniwehere eellihi naahiyanaka.” Sika nipuronno yaaniromollattho Mizipa.

⁵⁰ Vawi Labani aavirellella ollota wi, “Waawaahoosaka anaakaalla apaalle waatthella atthiyana amodda naari vihiri arive muthu mwa alla niriihunaalla, wuupuwelle wi Mulluku sika mboni variyari va miyaano ni weyaano.”

⁵¹ Vano Labani aamulleella Yakobo wi, “Ngoona nipuro namalluku kuukellelleeminna nave vaava vookhalla nlluku na yawuupuwella.

⁵² Nipuro namallukunna ni nlluku na yawuupuwella, ddittheddenenndda tti omboni. Nave miyaano ngiwa killapuwa nipuro nenna wi killipane ni weyaano.

⁵³ Mulluku a Abrahamu, Mulluku a Nahori, Mulluku a attiitthiiwa, sika anaaneeruze eellihi.” Sika Yakobo aallupella vamiitthoni va Mulluku oyo attiitthinnya Isaki yamooviiwa.

⁵⁴ Vano Yakobo aavelleella mukutho vamwaangonimvo nave awiithana athwaaye wi eche ddoocha. Emallihalle ochanko, yaakona vamwaangonimvo.

⁵⁵ Osaka wene, ohinase, Labani aakhupaarella edduullu ddayenndde ni anaaye aatthiyana. Nave aadalisalle, ahaallaanya, sika aatimulla anarowa owaniwa.