Genesis 3 - Mawu a Mulluku

Ochimwa wa muthu

¹ Enowa yaari yoochenjeresesa okhwaranya enama ddamuhakani ddittheddene ddaphatusiwe ni Apwiya. Enoweeyo yaamukoha mutthiyanoolle wi, “Ethiyo tti ddawoona wi Mulluku ahuuhiihani ocha ezipaso dda orive muteekho ori m'matanimmu?”

² Mutthiyanoolle ahaakhulla wi, “Ttuucha ezipaso dda orive muteekho m'matanimmu,

³ koma ohiya yooyove ori variyari va emata. Mulluku aallota wi nihiche ezipaso dda muteekho yooyo naari ottannya kaambiiwa nawa neera ddiiddo, ttuukhwa.”

⁴ Enoweeyo yahaakhulla wi, “Khemukhwa iyaayi.”

⁵ Mulluku annadduwella wi nyuwaano mwacha ezipaso ddenndda, miitthwaanyu eneerokhunuuwa nave muneerokhalla wonanko Mulluku, sika muneerodduwella ddaphaama ni ddoonanara.

⁶ Vano mutthiyanooyo oonilleeye wi muteekhooyo waari wooreera, ezipasonnddo ddaari ddoophwanella oddiva voochani nave wi ezipasonnddo ttuumweeriha wi akhalle eezeru, sika aarukullawo ezipaso dda muteekhooyo nave aacha. Vano ddimodda aaya amuvaha mamune nave olliyettho aacha.

⁷ Echille, yaadduwella wi yaari epwillimwinddive. Sika yahiisowella mutambullo wa makukhu a namukuyu.

⁸ Misikuwa, nndduwa nikumphe, athu eellaayo yahiiwa muttotthoroso, Apwiya yeetaka m'matanimmo nave mullopwana ni mutthiyana yahiipittha variyari va miteekho dda m'matani wi Apwiyaayo ehiwoone.

⁹ Koma Apwiya Mulluku yaamwiithana mullopwana wi, “Ethiyo ori wuuwi?”

¹⁰ Mullopwanooyo ahaakhulla wi, “Kaawiiwani m'matanimmu koma kaamoova, sika kahiipittha ekaamba yawi kiri epwillimwinddive.”

¹¹ Mulluku aamukoha wi, “Ethiyo uulleelle ttaani wi ori epwillimwinddive? Apaallethi woocha ezipaso dda muteekho olle kuulamulalleemi wi ohiche?”

¹² Vaavo mullopwana ahaakhulla wi, “Mutthiyana mwakivahilleenyoolle sika akinnyalle ezipasonnddo wi kiche nave kaacha.”

¹³ Vano Apwiya yaamukoha mutthiyana wi, “Ethiyo weyaano, ella weerilleewe tti tini?” Mutthiyana ahaakhulla wi, “Enowa sika yakillekille wi kiche.”

Mulluku anallota dda ollaka

¹⁴ Sika Mulluku aayilleella enoweeyo wi, “Ekaamba ya nndda weerilleewe, ori ootembeleliwa variyari va enama ddittheddene dda va ellapo yavatthi, eziweto ni ddamuhakani ddene. Waambeella ollello mu okumaawo muttheene onaapaddeke ni erukullwaawo nave onaacheke nthupi.

¹⁵ “Kineeroweeriha weyaano ni mutthiyana wi mwiitane nave vineerokhalla wiitana wunchichi variyari va edduullu ddawo ni edduullu dda mutthiyanooyo. Edduullu ddaye ddineeronyenya murwaawo nave weyaano eneerolluma etotopwa ya edduullu ddaye.”

¹⁶ Vatulli viwa Mulluku aamulleella mutthiyanooyo wi, “Kineerewoonjerera wunchichi ddoovoreya ddawo wakhalla ni erukullu, oneerekewoona ovoreya va enthawi yooyara. Oneerekomukhallella munkhella mamuno nave mamunooyo aneerekewuulamulella.”

¹⁷ Vatulli viwattho Mulluku aallota ni mullopwanooyo wi, “Ekaamba yawi waamwiiwellella mwaariyo voochani muteekho kuulamulalleemi wi ohiche, ethaya eneerotembeleliwa ekaamba ya weyaano. Onaaphareke mutteko wanikhurumella enthawi ettheene ya okumaawo.

¹⁸ “Muthayani muneerekomella makukhu amiiwa ni a epullathi nave weyaano onaacheke ddoomella ddamuhakani.

¹⁹ “Onaaphareke mutteko wanikhurumella, ophiyera enthawi yoohokollweella othayani nko wavenyereewewo. Wavenyere othayani, oneerohokollweellattho othayani wenko.”

²⁰ Adamu aamuvaha nnddina mwaariye nawi Heva, ekaamba yawi olliyooyo aari amoowe a athu attheene.

²¹ Nave Apwiya yahaasowella Adamu ni mwaariye ddoowara dda nttapara na enama wi eware athu eellaayo.

Okhumihiwa m'matani wa Adamu ni Heva

²² Apwiya yaallota wi, “Vano muthu ari wonanko hiyaano vawi annadduwella ddaphaama ni ddoonanara. Ahaakhullelliwe ocha ezipaso dda muteekho woovaha okumi wi akhalle ni okumi woohimalla.”

²³ Sika Apwiya yaamukhumihamo muthooyo mu emata ya Edeni mulle wi allimeke ethaya eyo avenyerilleeyemo.

²⁴ Yaamwiikarella otte Adamu. Nave Mulluku ahaahiya akerubi* wookhuma nndduwa wa emata ya Edeni. Navettho aahiya nsupada na munllo nno naapheella embali ddittheddene, owehera muteekho woovaha okumi wi arive muthu ahaatamellevo.