Genesis 28 - Mawu a Mulluku

¹ Vano Isaki aamwiithana Yakobo amudalisa nave aamulamula wi, “Ohimutthelle mutthiyana o Kanani wuno.

² Khawe o Mesopotamiya, owaniwa wa Betuele, attiitthiiwa a amaaywaalla. Wenko wamutthelle mmodda a anamwani aatthiyana a Labani, murokoriwa a amaaywaalla.

³ Mulluku Amasiva Mattheene uudalise nave uuvahe edduullu ddinchichi wi okhalle nlloko nuullupalli na mitundu ddinchichi dda athu.

⁴ Uudalise weyaano ni edduullu ddawo moollikana ni mmo amudaliselleeye Abrahamu wi ekhalle yaawoyaawo ellapo eyo oneereewe okhallekemo, ellapo eyo amuvahilleeye Abrahamu.”

⁵ Sika Isaki aamurumiha Yakobo o Mesopotamiya wa Labani, mwaana a Betuele Muaramu. Labani aari murokoriye a Rebeka, amennya a Yakobo ni Esau.

Esau anamutthella mutthiyana mmoddattho

⁶ Esau ahiiwa wi Isaki aamudalisa Yakobo nave wi Yakobooyo oorumihiwa o Mesopotamiya wi atthelle wenko. Ahiiwattho wi voomudalisanimvo, aamulamula wi ahiwe amutthella mutthiyana a o Kanani.

⁷ Ahiiwa wi Yakobo aawiiwellella attiitthinnya ni amennya nave wi aaya o Mesopotamiya.

⁸ Sika Esau ahoona wi attiitthinnya Isaki kheyaapaalla atthiyana o Kanani.

⁹ Sika vano aaya wa Ishmaele mwaana a Abrahamu nave aamutthellattho Mahalati mwaana a Ismaelooyo, murokoriye a Nebayoti.

Olloha wa Yakobo va Betele

¹⁰ Yakobo aatimulla olendo ovenyera o Beeresheba, oya o Harani.

¹¹ Aphiyalle vanipuroni nimodda, ahiimella vaavo vawi nndduwa naari nivollowille. Nave aakona vaavo ahameellihalle murwaaye vanllukuni.

¹² Muullohani ahoona makwelelo oovenyera vatthi ophiyera oddullu nave aawoonattho angelo ewellaka navettho ekitthaka vamakwelelonimvo.

¹³ Nave Apwiya yahiimella vakhwipi ni olliye emulleella wi, “Mi tti Apwiya Mulluku a nikhollo nawo Abrahamu ni attiittho Isaki. Ellapo onakoneewemweella kineerewuuvaha weyaano ni edduullu ddawo.

¹⁴ Edduullu ddawonnddo ddineerewaata wonanko nthupi na va ellapo yavatthi. Ddineeropallalleyella o ezigawo ddittheddene, woovollowa nndduwa, wookhuma nndduwa, ompoto ni omwera. Nave mitundu ddittheddene dda va ellapo yavatthi ddineerodalisiwa oyeella mwa weyaano ni edduullu ddawo.

¹⁵ Ngoona, miyaano ngiwa kuuhiya, kineerewuuteteza orive weko oneereewe oyeewo nave kineerewuuhokollosella o ellapo yeella. Ngiwa kuuhiya ophiyera kenre ddittheddene kuulonjezilleeminndda.”

¹⁶ Yakobo avenyille aallota wi, “Ddawoona, Apwiya eri vaava nave miyaano ngaadduwella.”

¹⁷ Ahoova nave aallota wi, “Hii, nipuronna tti noottikhiniha! Vaava tti enyumba ya Mulluku navettho tti mullako wooddullu.”

¹⁸ Sika Yakobo aavenya osaka wene ohinase nave aakusa nlluku ahameellihalleeye murunne aniimesa wi nikhalle nlluku na yawuupuwelliha. Vano aanizoza ni makhura nllukunno.

¹⁹ Sika aaniromolla nipuronno Betele koma vawaamba naromolliwa Luzi.

²⁰ Vano Yakobo aallupella wa Mulluku wi, “Mwakhalla ni miyaano nave mwakiteteza phaama voolendonaakoolla navettho mwakivaha ddoocha ni ddoowara,

²¹ navettho mwakihokollosella ni murendelle wa attiitthaaka, muneerokhalla Mullukwaaka.

²² Nlluku na yawuupuwelliha kiimesilleeminna ninaakhalle enyumbaanyu nave miyaano kineerowinnyani yaneekhumi ya ddittheddene munaakivaheenyu.”