Genesis 26 - Mawu a Mulluku

Isaki anatthaamella o Gerari

¹ Mwiillaponimmo mwaakhalla ettalla woonjerera va yawaambeelle mu enthawi ya Abrahamu. Sika Isaki aaya wa Abimeleki mwene a Afilisti o Gerari.

² Vano Apwiya yaamooneyella Isaki nave emulleella wi, “Ohiye o Iguputo koma okhalle mu ellapo kineereemi kuulleelle wi okhallemo.

³ Khalla wuno wonanko mulleto nave miyaano kineerokhalla ni weyaano. Kineerewuudalisa voovelleellani ellapo ddittheddenenndda wa weyaano ni edduullu ddawo. Vawi kineerosunga ollupella nko kallupenlleemi ni attiittho Abrahamu.

⁴ Kineerewuuvaha edduullu ddinchichi wonanko ddikhallelle etheneeri ddooddullu nave edduullu ddawonnddo kineeroddivaha ellapo ddittheddenenndda. Mitundu ddittheddene dda va ellapo yavatthi ddineerodalisiwa oyeella mwa edduullu ddawo.

⁵ Kineerewuudalisa kaambiiwa Abrahamu aakiiwellella nave aasunga mawaaka, malamulwaaka, echiweruzwaaka ni malangizwaaka.”

⁶ Sika Isaki aakhalla o Gerari.

⁷ Athu a wenko emukohille dda mwaariye, Isaki aallota wi, “Olla tti murokoraka.” Nave oova allota wi, “Tti mwaaraka,” athu a wenko ttuumwiipha wi amutthelle Rebeka vawi aari ooreera wunchichi.

⁸ Isaki akhanlle wenko enthawi yoorekama, Abimeleki mwene a Afilisti atthurumellaka va niwindo wi awehe otte, aamoona Isaki amupharapharaka mwa echikondi Rebeka.

⁹ Sika Abimeleki aamwiithana Isaki nave aallota wi, “Ddawoona olla tti mwaariyo. Kaambiiwa tini walloteewe wi tti murokoriyo?” Olliye ahaakhulla wi, “Kaganiza wi kineerewiiphiwa kallota wi tti mwaaraka.”

¹⁰ Abimeleki aamukoha wi, “Kaambiiwa tini oneerenlleewe ddiidda? Mmodda mwa athwaakaalla akonilleke ni mwaariyooyo, weyaanothi waweeromuchimwiha.”

¹¹ Vano Abimeleki ahaalamula athwaaye attheene wi, “Muhimweerelle erive yoonanara muthoolla ni mwaariyeene. Mmodda eera yeella, aneerewiiphiwa.”

¹² Isaki ahaalla mwiillaponimmo nave muyakha yooyo aahata ddeko ddawaata wunchichi kaambiiwa Apwiya yaamudalisa.

¹³ Eyuumaaye yaavirellella waata nave aakhalla ni eyuuma yinchichi.

¹⁴ Vawi aakhallana eziweto ddinchichi nave aakhallattho ni akaporo anchichi, Afilisti yaamukhallella ehache.

¹⁵ Sika Afilisti yaavuhellella ehime ddittheddene ni ethaya nnddo akaporo a Abrahamu, attiitthinnya, yakatilliiwa, Abrahamooyo ahinakhwe.

¹⁶ Vano Abimeleki aallota ni Isaki wi, “Mutthaame mwiillaponi mwahummu vawi mookhalla ni masiva manchichi onikhwaranya hiyaano.”

¹⁷ Sika Isaki aatthaama nave aatthipella musasaaye mu ntapo na Gerari, nko akhallilleeyewo wa enthawi yoorekama.

¹⁸ Nave Isaki aavuhullattho ehime nnddo ddakatiwe mu enthawi ya Abrahamu nave nnddo Afilisti yaddivuhellelliiwa akhwille Abrahamu. Nave ehimennddo Isaki aaddivaha manddina ayo attiitthinnya yaddivahilliiwa.

¹⁹ Akaporo a Isaki yaakata ehime o ntapo nave yaamuphwanya neetuutu.

²⁰ Koma abusa o Gerari yahaamba okangana ni abusa a Isaki wi, “Maaddaalla tti aahu.” Sika Isaki ayiromolla ehimeeyo “Okangana,” ekaamba yawi yaakangana ni olliye.

²¹ Akaporo a Isaki yaakata ehime emodda nave yaakanganellattho yeeyo. Sika ayiromolla ehimeeyo “Wiitana.”

²² Nave aavenyawo wenko, eyattho yakata ehime emodda. Va ehime yeella kheyaakanganille, sika aayiromolla wi, “Mpata.” Aallota wi, “Vano Apwiya aanivaha mpata mwiillaponimmo nave nineerokhalla ni eyuuma.”

²³ Vano Isaki aatthaamella o Beeresheba.

²⁴ Mahiiyu Apwiya yaamooneyella nave yaamulleella wi, “Mi tti Mulluku a attiittho Abrahamu. Ohoove vawi miyaano kiri ni weyaano. Kineerewuudalisa nave kineerewuuvaha edduullu ddinchichi ekaamba ya oorumeyellaaka Abrahamu.”

²⁵ Sika Isaki aamaka nikuwa wenko nave ahaallapella Apwiya nave aamakattho musasaaye wenko. Navettho akaporwaaye yaakata ehime wenko.

Echipangano variyari va Isaki ni Abimeleki

²⁶ Abimeleki aaya wa Isaki ovenyera o Gerari ni Ahuzati endunaaye ni Fikolo muttekweene a allupa ekhotwaaye.

²⁷ Sika Isaki ahaakoha wi, “Ethiyo kaambiiwa tini muwiilleenyu wuno wi mukoone vawi mwahiitana ni miyaano, ophiyera mwaakiikarihamo mu ellapwaanyu?”

²⁸ Alliwaayo yaamwaakhulla wi, “Vano noodduwella wi Apwiya eri ni nyuwaano nave niganizalle wi nyuwaano ni hiyaano nikeraatthihe echipangano. Ninapaalla wi nyuwaano mulonjeze

²⁹ wi khamuwa muneerella ddoonanara moollikana ni mmo nahiwerenlleehuni ddoonanara. Naaweerellani ddaphaama nave naawaakhullellani wi murowe mwamurendelle. Sika vano Apwiya ahuudalisani.”

³⁰ Vano Isaki ahaakhozella machellello nave athwaayo yaacha ni owirya.

³¹ Osaka wene ohinase, attheene yaallupellellana nave Isaki aawaakhullella attheenaayo wi etimulla mwamurendelle, eroweke.

³² Nllapo nenno akaporo a Isaki yaawa emulleella dda ehime yakatilliiwa. Yaallota wi, “Noophwanya maaddi.”

³³ Isaki aayiromolla ehimeeyo Sheba. Sika ekaambiiwa muzindooyo onaromolliwiiwa Beeresheba ophiyera ollello.

Atthiyana a mitundu ddimodda a Esau

³⁴ Esau ari ni miyakha 40, aamutthella Yuditi mwaana a Beeri Muhiti. Aamutthellattho Basemati, mwaana a Eloni Muhiti.

³⁵ Atthiyana a Ahiti eellaalla yahaavoriiha murima wunchichi Isaki ni Rebeka.