Genesis 25 - Mawu a Mulluku

Edduullu ddimodda dda Abrahamu

¹ Abrahamu aamutthellattho mutthiyana mmodda nnddina naye Ketura.

² Ketura aamuyarella Abrahamu Zimirani, Yokishani, Medani, Midiyani, Ishibaki ni Shuwa.

³ Yokishani aamuyara Sheba ni Dedani nave anamwani a Dedani yaari Aashuri, Aletushi ni Aleumi.

⁴ Midiyani aamuyara Efa, Efere, Hanoki, Abida ni Elida. Nndda sika ddaari edduullu dda Ketura.

⁵ Abrahamu aamuhiyera Isaki ddittheddene aariiyena.

⁶ Koma ahinakhwe ahaakawellawo emphaso anaaye amoddaalle aayarilleeye mwa awariye ang'onong'ono. Attheenaayo ahaarumiha o ellapo ya wookhuma nndduwa wi yakhalle wenko, waavenyihawo wa mwanaye Isaki.

Okhwa ni ovitthiwa wa Abrahamu

⁷ Abrahamu aakhalla ni okumi wa miyakha 175.

⁸ Nave akhwille mwamurendelle navettho uulluvallille wunchichi.

⁹ Anaayaalle, Isaki ni Ishmaele, yaamuvittha munikhunguninne na Makipera, mu emata elle khalle yaari ya Efuroni mwaana a Zohari o Hiti. Emateeyo yaari wookhuma nndduwa wa Mamure.

¹⁰ Yaari emata eyo Abrahamu ayikullalleeye wa Ahiti. Sika Abrahamu ni mwaariye Sara yavitthiwe wenko.

¹¹ Akhwille Abrahamu, Mulluku aamudalisa mwanaye Isaki oyo akhalla vakhuviru ni “Neetuutu a Ookumi Anakoona Miyaano.”

Edduullu dda Ishmaele

¹² Nna sika ntthopoollo na edduullu dda Ishmaele, mwaana a Abrahamu oyo amuyarelleeye Hagara, kaporo a o Iguputoolle.

¹³ Alla sika manddina a anamwani a Ishmaele, awaamba aari Nebayoti, vatulli viwa aamuyara Kedara, Adibeele, Mibisamu,

¹⁴ Mishima, Duma, Masa,

¹⁵ Hadadi, Tema, Yeturi, Nafishi ni Kedema.

¹⁶ Alla sika anamwani aallopwana a Ishmaele. Yaari mamwene khumi ni eelli, arive mwene aakhalla ni mizi ddaye ni misasa ddaye.

¹⁷ Ishmaele akhwille ari ni miyakha 137 nave aavitthiwa mu mahame.

¹⁸ Edduullu dda Ishmaele ddakhalla mu ellapo ya variyari va Havila ni Shuri, wookhuma nndduwa wa Iguputo, va ettilla ya o Asiriya. Nave ddakhalla moohiyana ni edduullu ddimodda dda Abrahamu.

Oyariwa wa Esau ni Yakobo

¹⁹ Ella sika epilli ya Isaki mwaana a Abrahamu. Abrahamu aamuyara Isaki.

²⁰ Isaki aari ni miyakha 40 enthawi eyo amutthellilleeye Rebeka mwaana a Betuele Muaramu a o Mesopotamiya. Murokoriye Rebeka aari Labani, Muaramu.

²¹ Vano vawi mwaara Isaki khaayara, Isakooyo aamuvekella mwaariye wa Apwiya. Apwiya yahiiwa ovekella waye nave Rebeka aakusa erukullu.

²² Koma anamwani eellaayo yaambeelliiwa ollipana m'mirimani mwaye, aallota wi, “Kaambiiwa tini nndda ddinakeereyelliiwa?” Sika ahaakoha Apwiya wi emwaakhulle.

²³ Apwiya yaallota wa oolliye wi, “M'mirimani mwawo muri mitundu miilli dda athu. Oneeroyara mitundu dda athu ddoollipana, mwaana mmodda anaakhalle amasiva omukhwaranya mukhwaaye, muullupalli aneerekomurumeyella mung'onong'ono.”

²⁴ Enthawi yooyara ekwakhwanne, Rebeka ahaayara anapattha.

²⁵ Mwaana awaamba aari oofiira nave mwiillaaye muttheene waari wonanko yoowara yamapururu. Sika yaamuvaha nnddina nawi Esau.

²⁶ Vooyariwani mung'onong'onwaaye, nnatta naye napharille etotopwa ya Esau. Sika yaamuvaha nnddina nawi Yakobo. Anamwanaalla yayariwe Isaki ari ni miyakha 60.

Esau anakulliha ottekweenaaye

²⁷ Asombwaayo yahunnuwa nave Esau aari oosaya enama, ookonda weeteeta. Koma Yakobo aari oomaalleya, ookonda okhalla vaatte.

²⁸ Isaki aamukondesesa Esau ekaamba yawi aanacha enama nnddo amuvaheeye iipha. Koma Rebeka aamukondesesa Yakobo.

²⁹ Nllapo nimodda Yakobo ahaapeya echipele nave Esau aari avenyeraka ohakani nave avolliwe ettalla wunchichi.

³⁰ Sika aamulleella Yakobo wi, “Ettalla eneerokiipha. Kivahe vang'ono echipele yoofiira waapeyilleeweeyo.” (Sika ekaambeene yaamuvaha nnddina nawi Edomu).

³¹ Koma Yakobo ahaakhulla wi, “Waambeelle okikullihella ottekweenaawo, kihinuuvahe yoocheella.”

³² Esau aallota wi, “Ngoona, miyaano kihanlle vang'ono okhwa ni ettalla. Ethiyo kinaaphurena tini ottekweene?”

³³ Yakobo aallota wi, “Waambeelle ollupella osimikizella wi ottekweenaawooyo wookikullihella?” Sika Esau aallupella nave akulliha ottekweenaaye wa awaamba oyariwa wa Yakobo.

³⁴ Vano Yakobo aamuvaha Esau buledi ni echipeleelle nave Esau aacha navettho aawiryella maaddi, vatulli viwa aatimulla avenyavo. Mmu sika Esau avevullelleeye ottekweenaaye wa awaamba oyariwa.