Genesis 23 - Mawu a Mulluku

Okhwa wa Sara nave Abrahamu anakulla mahame

¹ Sara aakhalla ni okumi miyakha 127,

² nave akhwenlle o Kiriyati Ariba (sika wi Hebroni) mu ellapo ya Kanani. Abrahamu aaya wenko iinlla maliro a Sarooyo.

³ Vano Abrahamu aahiya mutembo wa mwaariye, aya allota ni athu a o Hiti wi,

⁴ “Mi tti mulleto, ookhalla enthawi yooyeva, owaninyu wuno. Mukikullihelle emata wi ekhalle mahame wi kimvitthevo mwaaraka.”

⁵ Athwaayo yaamwaakhulla wi,

⁶ “Niiweseseni, apwiya. Nyuwaano tti enduna yuullupalli variyari vaahumva. Amwaarinywaalla mwaavitthe mu erive mahame aphaama niriihuna. Khaavo muthu naari mmodda variyari vaahumva anaawiimaneni mahame niriihuna apaalle wuuvaanyihani waavitthamo amwaarinywaalla.”

⁷ Enthawi yeeyo Abrahamu aakokhora vatthi vamiitthoni va athwaayo,

⁸ nave aalleella wi, “Mwaarimi mukaakhullenlle wi kimuvitthe mwaarakoolla weewuno, mukivekelle wa Efuroni mwaana a Zohari,

⁹ wi akikullihelle nikhungu naye na Makipera. Nikhungunno niri mukhwipi mwa emataaye. Muvekeni wi akikullihelle vamutengoni woophwanellella, nyuwaano moonaka wi nipuronno nikhalle mahame.”

¹⁰ Vaavo Efuronooyo sika ari ni Ahiti o nipuro na mutthukumano va mullako woovollowella m'muzindani. Nave athu attheenaayo yiiwaka, ahaakhulla wi,

¹¹ “Iyaayi, apwiya. Miyaano kineerewuuvahani emata ettheene ni nikhungunno. Kineerewuuvahani nipuronno vamiitthoni va athwaaka attheenaalla wi mwaavitthemo amwaarinyu.”

¹² Vaavo Abrahamu aakokhora vamiitthoni va athu attheenaalle,

¹³ nave amulleella Efuroni wi, “Mwawuuvekani, mukiiwellelle, miyaano kinapaalla kikulle emateeyo. Akhellani makobiri va mutengo woophwanella ni emateella wi kimvitthemo mwaaraka.”

¹⁴ Koma Efuroni ahaakhulla wi,

¹⁵ “Kiiweseseni apwiya. Emateeyo mutengweene tti makobiri a siliva 400. Koma ddennddo khehiyo ello variyari va nyuwaano ni miyaano. Vitthani malirwaanyu.”

¹⁶ Abrahamu ahaakhullella nave vamiitthoni va athu attheene a o Hiti aheerengella makobiri a siliva 400 ayo Efuroni aromonlleeye moollikana ni makobiri ayo athu amalonda yapharihiiwa mutteko mwiillaponimmo va enthawi yeeyo.

¹⁷ Mmu sika emata ya Efuroni o Makipera, wookhuma nndduwa wa Mamure, yatthattuselliwiiwa ya Abrahamu. Nipuronno naakhalla ni emata ni nikhungu mukhwipi mwa emateeyo, vamoddattho ni miteekho ddittheddene dda mukhwipi mwa emateeyo.

¹⁸ Sika ddittheddenenndda ddaakhalla ddaayeddaaye dda Abrahamu vamiitthoni va Ahiti ayo yakhallillena va mutthukumano va mullako woovollowella wa m'muzindani.

¹⁹ Vatulli viwa Abrahamu aamuvittha mwaariye munikhunguni na emata ya o Makipera wookhuma nndduwa wa Mamure (sika wi Hebroni), mu ellapo ya Kanani.

²⁰ Sika emateeyo ni nikhungu nnddo khalle ddaari dda Ahiti, nipuro nittheenenno naakullihiwa wa Abrahamu wi nikhalle mahame.