Genesis 22 - Mawu a Mulluku

Mulluku anamulamula Abrahamu wi amuvelleelle Isaki wonanko mukutho

¹ Vatulli viwa Mulluku aamweesa Abrahamu. Aamwiithana wi, “Abrahamu!” Nave Abrahamu ahaakhulla wi, “Ee Apwiya.”

² Mulluku aallota wi, “Mukuse Isaki, mwanawo mmoddave yooyo onamukondeewe wunchichi, oye o ellapo ya Moriya. Wenko wamuvelleelle wonanko mukutho wooshellelliha vamwaangoni oyo kineereemi kuulleelle.”

³ Ohinase wene Abrahamu aapotokosa esaduro ya va bulwaaye. Aatthallattho ekhuni ddawoosella mukutho nave aamukusa Isaki ni akaporwaaye eelli, etimulla olendo wooya o nipuro nno Mulluku amulleelleeye.

⁴ Va nllapo naneeraru Abrahamu aatukhulla miittho nave aawoonella mwaangooyo voorekama.

⁵ Vano ahaalleella akaporwaalle wi, “Nyuwaano keraatthini vaava ni buloolla. Miyaano ni musomboolla ninaya nko navekelle, vatulli viwa nineerewuuphwanyani.”

⁶ Abrahamu aamureya Isaki ekhuni ddawoosella mukutho wooshellelliha. Abrahamooyo akusalle munllo ni mpeni. Sika eellaayo yeetella nimodda.

⁷ Vano Isaki aawiithana attiitthinnya wi, “Attiitthi.” Abrahamu ahaakhulla wi, “Ee, mwanaka.” Isaki aakoha wi, “Munllo ni ekhuni kinnaddoona, ddookhallavo koma mwaanaankhosa awoosella mukuthooyo ari wuuwi?”

⁸ Abrahamu aamwaakhulla wi, “Mwanaka, Mulluku aneeronivaha mwaanaankhosa.” Sika vano attheenaayo yaavirellella weeta nimodda.

⁹ Ephiyalle onipuroni wulle Mulluku amulleelleeye, Abrahamu aamaka nikuwa nave aatthatta ekhuni vaddullu va nikuwanno. Enre ddiiddo ammaka mwanayoolle, amukonaatthiha vaddullu va ekhuninnddo.

¹⁰ Vano aahullulla mpeni wi amwiiphe mwanayooyo.

¹¹ Koma mungelo a Apwiya aamwiithana ovenyera oddullu wi, “Abrahamu, Abrahamu!” Olliye ahaakhulla wi, “Ee, Apwiya!”

¹² Mungelooyo aallota wi, “Ohinamwiipha mwaanooyo apaalle omweerana erive ello. Vano koodduwella wi weyaano onnamwiiwellella Mulluku vawi khokiimanne mwanawo mmoddave yooyo.”

¹³ Abrahamu atukhunlle miittho aamoona nankhoro a enkhosa aangille m'muttokhoromani. Nave aaya ayikusa aayiheraatthi mukutho wooshellelliha munipuroni mwa mwanayoolle.

¹⁴ Nipuronno Abrahamu aanivaha nnddina nawi, “Mulluku annavaha.” Sika ophiyera ollello vineeriwa “Vamwaangoni wa Apwiya ennavaha.”

¹⁵ Mungelo a Apwiya aamwiithana Abrahamu wiilli ovenyera oddullu wi,

¹⁶ “Apwiya enallota wi, ‘Kinimallupella wi ekaamba yawi woheera ddenndda, khokiimanne mwanawo mmoddave,

¹⁷ kineerewuudalisa wunchichi ni wuuvaha edduullu ddinchichi wonanko etheneeri dda oddullu navettho wonanko mihava dda mukhwipi mwa enyanja. Edduullu ddawo ddineerewaagonjiha adaniiwa attheene.

¹⁸ Vawi weyaano wookiiwellella navettho mitundu ddittheddene dda va ellapo yavatthi ddineerodalisiwa oyeella mwa edduullu ddawo.’ ”

¹⁹ Abrahamu aahokollweella wulle aahiyalleeye akaporwaayaalle. Nave attheenaayo yaaya o Beeresheba nko Abrahamu akhalleeye.

Edduullu dda Nahori

²⁰ Vatulli viwa Abrahamu ahiiwa wi Milika aamuyarella Nahori, mwanamunne, anamwani atthanu ni araru.

²¹ Mwanaye awaamba aari Uzi, mung'onong'onwaaye a Uzi aari Buzi. Vaakhallattho Kemuwele, attiitthinnya a Aramu,

²² Kesedi, Hazo, Pilidasi, Idilafe ni Betuele.

²³ Betuele aamuyara Rebeka. Sika Milika aamuyarella Nahori mwanamunne a Abrahamu anamwani atthanu ni araru yaalla.

²⁴ Nave Reuma, mwaariye mung'onong'ono a Nahori, aamuyara Teba, Gahamu, Tahasi ni Maaka.