Genesis 21 - Mawu a Mulluku

Oyariwa wa Isaki

¹ Apwiya yaamuupuwella Sara voomweerellani nnddo yamulonjezilliiwa.

² Sika Sara aakusa erukullu, amuyarella Abrahamu mwaana aamullopwana Abrahamooyo uulluvallille. Mwaanooyo ayariwe moollikana ni enthawi eyo Mulluku aromonlleeye.

³ Nave mwaana a Abrahamu oyo Sara amuyarelleeye Abrahamu aamuvaha nnddina nawi Isaki.

⁴ Abrahamu aamuphadda mwaanooyo ari ni mallapo matthanu ni mararu moollikana ni mmo Mulluku alamulelleeye.

⁵ Abrahamu aari ni miyakha 100, vooyariwani Isaki.

⁶ Vano Sara aallota wi, “Mulluku ookihakallalliha vamoddattho ookittheyiha. Arive muthu oyo aniiwe ddenndda, aneerohakallalla ni miyaano.”

⁷ Nave aallotattho wi, “Ttaani aawore ollota wa Abrahamu wi Sara ttuumwaamwiha mwaana? Komave koomuyarella mwaana aamullopwana Abrahamu ari awuulluvalla.”

⁸ Mwaanooyo ahunnuwa nave nllapo nawi ahiye waamwa, Abrahamu aapanga machellello.

Wiikarihiwa wa Hagara ni Ishmaele

⁹ Nllapo nimodda Ishmaele oyo Hagara Muiguputoolle aamuyarelleeye Abrahamu, aarera ni Isaki, mwaana a Sara.

¹⁰ Sara oonilleeye aamulleella Abrahamu wi, “Mwiikareni kaporoolla ni mwanayoolla vawi mwaana a kaporo ahihallena eyuumaanyu eyo anaahallena mwanaka Isaki.”

¹¹ Ddenndda ddaamuvoriiha murima Abrahamu kaambiiwa Ishmaele nayeenettho aari mwanaye.

¹² Koma Mulluku aamulleella Abrahamu wi, “Murima ohuuvoreye ekaamba ya mwaanooyo ni kaporwaawo Hagara. Erive ello anuulleelle Sara weere kaambiiwa oneerokhalla ni edduullu oweella mwa Isaki.

¹³ Mwaana a kaporoolla kineeromuvahattho anamwani anchichi nave aneerokhalla mutundu muullupalli vawi olliyoollattho tti mwanawo.”

¹⁴ Sika osaka wene, ohinase, Abrahamu aamuvaha Hagara yoocha ni nthumba na nttapara na maaddi. Vatulli viwa aamutukhulla mwaanooyo amuyaariha Hagara, enre ddiiddo aamulleella wi aroweke. Sika Hagara aatimulla ddawoona, aneeteeta mu echipululu ya Beeresheba.

¹⁵ Vano maaddaalle emmallelle aamuhiya mwaanooyo vatthi va nikukhu.

¹⁶ Olliye akeraatthi vatthi moowehana ni mwaanooyo va mutunda wa mamita 100 kaambiiwa aganiza wi, “Miyaano ngaakhullella omoonellella mwanaka akhwaka mwawi ddiidda.” Akeraatthille ddiiddo, mwaanooyo ahaamba winlla.

¹⁷ Mulluku aamwiiwa mwaanooyo inllaka nave mungelo a Mulluku aallota ni Hagara ovenyera oddullu wi, “Hagara, ethiyo enuukatamiha tti tini? Ohoove. Mulluku ohiiwa winlla wa mwaanoolla.

¹⁸ Venya, khawe, wamutukhulle nave omuphare moollipa ni nnatta nawo. Edduullu ddawo ddinaakhalle mutundu muullupalli.”

¹⁹ Mulluku aahulla miittho a Hagara nave ahoona ehime. Olliye aaya veehimenimvo aaddallihamo maaddi munthumbani na nnttaparannenne, amuwiryiha mwaanoolle.

²⁰ Mulluku aamuwehera mwaanooyo ophiyera unnuwalle. Ahunnuwella mu echipululu ya Parani ophiyera aakhalla mullupa muura.

²¹ Amennya yaamwaashera mutthiyana o Iguputo.

Echipangano ya Abrahamu ni Abimeleki

²² Va enthawi yeeyo mwene Abimeleki ni Fikolo, muttekweene a akhotwaaye yaallota ni Abrahamu wi, “Mulluku ari ni weyaano mu ddeko ddittheddene oneereewe.

²³ Sika vano llupella vamiitthoni va Mulluku wi khokilleka miyaano apaalle anaaka apaallettho edduullu ddaka. Miyaano kookhalla oororomelleya vamiitthoni vawo nave weyaanottho olonjeze wi oneeroromelleya vamiitthoni vaka, mu ellapo eyo onakhalleewemo wonanko mulleto.”

²⁴ Abrahamu aallota wi, “Kinimallupella.”

²⁵ Vatulli viwa Abrahamu aamukhupanyella Abimeleki dda ehime eyo allupa muttekwaaye yaakhilliiwa.

²⁶ Abimeleki aallota wi, “Nginamudduwella enre ddenndda. Naari nyuwaano khamwaakilleelle nave miyaano kiniiwella vaava.”

²⁷ Vano Abrahamu aamuvaha Abimeleki enkhosa ni eng'ombe nave eellaayo yaakeraatthiha echipangano.

²⁸ Abrahamu ahaapatulavo anamwani a enkhosa atthanu ni eelli ovenyera va eziweto ddaye.

²⁹ Abimeleki aamukoha wi, “Oneereeweella enattaphullella tini?.”

³⁰ Abrahamu ahaakhulla wi, “Nyuwaano akhellani enkhosa dditthanu ni piillinndda wonanko omboni wi ehimeella kakatille tti miyaano.”

³¹ Sika nipuronno naaromolliwa Beeresheba ekaamba yawi wenko sika eellaayo yakeraatthihalliiwa echipangano.

³² Ekeraatthihalle echipangano yeella o Beeresheba wulle, Abimeleki ni Fikolo muttekweene a akhotwaaye, yaahokollweella owaniwa, o ellapo ya Afilisti.

³³ Sika Abrahamu ahaalla muteekho wa bwemba o Beeresheba nave ahaallapella Apwiya Mulluku a Enthawi yoohimalla.

³⁴ Nave aakhalla mu ellapo ya Afilisti wonanko mulleto enthawi yoorekama.