Genesis 20 - Mawu a Mulluku

Abrahamu ni Abimeleki

¹ Abrahamu aatthaamawo o Mamure aya o echigawo yoomwera ya Kanani. Aakhalla variyari va muzinda wa Kadeshi ni ellapo ya Shuri nave aakhalla wonanko mulleto mu echigawo ya Gerari.

² Wenko ahaalleella athu wi, “Sara tti murokoraka.” Sika Abimeleki, mwene o Gerari, aamukusa Sarooyo.

³ Vano mahiiyu mamodda Mulluku aamooneyella mwenooyo moolloha ni ollota wi, “Onimakhwathi kaambiiwa mutthiyana omukusalleewoolla tti ootthelliwa.”

⁴ Koma Abimeleki aari ahinakone ni mutthiyanooyo nave aallota wi, “Apwiya, ethiyo nyuwaano ttuuwiipha athu oohichimwa?

⁵ Abrahamu vookilleellani allotille wi, ‘Tti murokoraka,’ Nave olliyettho mwaneenaaye aallota wi, ‘Tti murokoraka.’ Miyaano vaweerani ddenndda, ngoonille yawuupusella murima nave ngichimwalle.”

⁶ Mulluku aamwaakhulla moolloha mwemmo wi, “Ee kinnadduwella wi weyaano waheera ddenndda moohikhalla ni yawuupusella murima. Mwawi ddiiddo kuuvaanyihalle tti miyaano wi ohikichimwelle vookonani ni mutthiyanooyo.

⁷ Koma vano, omuvelleelle mutthiyanoolla wa mamune. Mullopwanooyo tti namallotella nave aneerewuuvekellella wi ohikhwe. Koma waahimuvelleella, ddawoona, kinimuuchenjezeraatu wi onimakhwa weyaano ni nibanja nawo nittheene.”

⁸ Osaka wene, ohinase, Abimeleki aawiithana allupa muttekwaaye attheene aalleella ddittheddenenndda nave athwaayo yahoova wunchichi.

⁹ Sika Abimeleki aamwiithana Abrahamu amukoha wi, “Ethiyo oneerenlleeweella tti tini? Ethiyo kuuchimwenlle tini wi okittatthamullelle ddookatamiha mwawi ddiidda miyaano ni athu attheene a mu omwenaaka? Okeerelleewenndda khe ddaphaama.

¹⁰ Kaambiiwa tini weerilleewe ddenndda?”

¹¹ Abrahamu ahaakhulla wi, “Kaganiza wi wuno tti onipuroni noohimoova Mulluku nave wi eneerokiipha wi emukuse mwaarakoolla.

¹² Komave, ollota ddawoona, yoolla tti murokoraka, ekaamba yawi tti mwaana attiitthaaka koma ohiri a nipelle nimodda nave miyaano kaamutthella.

¹³ Vawi Mulluku akirumalleeye ovenyera owaani wa attiitthaaka wi kiye o ellapo ddeelleto, kaamulleella mwaarakoolla wi, ‘Okoonihe ororomelleya wawo voomulleellani arive muthu wi mi tti murokoriyo, orive weko nineereehu niyeekewo.’ ”

¹⁴ Sika Abimeleki aamuhokollosella Sara wa Abrahamu nave enthawi yeeyo amuvaha enkhosa, eng'ombe ni akaporo aallopwana ni aatthiyana.

¹⁵ Aamulleella Abrahamu wi, “Ellapo ettheeneella tti yaaka, ttuuwora okhalla orive weko onapaalleewewo.”

¹⁶ Nave aamulleella Sara wi, “Murokoriyoolla kinamvaha makobiri a masiliva 1,000 wi okhalle wonanko omboni wa attheene oriiwenaalla wi weyaano kholakwille.”

^17-18 Ekaamba ya Sara mwaara Abrahamu, Apwiya yaamumaka mwaara Abimeleki ni atthiyana attheene a munibanjani naye wi ehiyareke. Sika Abrahamu aamuvekella Abimeleki nave Mulluku aamuchiriha Abimelekooyo ni mwaariye vamoddattho ni awariye ang'onong'ono attheene wi yaayareke anamwani.