Genesis 2 - Mawu a Mulluku

¹ Sika ellapo yavatthi ettheene, oddullu ni ddittheddene ddookhalla mwemmo, ddaamalla ophatusiwa.

² Va nllapo naneetthanu ni nimodda, Mulluku aamalliha mitteko ddaye ddittheddene aphareeye nave ahiithuuwa nllapo naneetthanu ni piilli.

³ Mulluku aadalisa nllapo naneetthanu ni piilli, aaneelliha ekaamba yawi tti nllapo nno iithuuwalleeye amallihalle muttekwaaye muttheene woophatusa.

⁴ Ella sika epilli yakhalle ya ophatusiwa wa ellapo yavatthi ni ddittheddene ddooddullu. Va enthawi eyo Apwiya Mulluku yaphatusiiwa ellapo yavatthi ni ddeko ddittheddene ddooddullu,

Emata ya Edeni

⁵ khavaari erive yoomella va ellapo yavatthi. Nave orive mmiddo waari ohinamelle ekaamba yawi Apwiya Mulluku yaari ehinamurupihe murimu va ellapo yavatthi. Navettho khavaari muthu oollima emata.

⁶ Koma maaddi yakhuma ovenyera vatthi va ellapo enahellella ethaya.

⁷ Sika vano Apwiya Mulluku yaakusa ethaya ovenyera vatthi nave emoopa muthu ni ethayeeyo. Yaamuviddeellella mphunani mpweya woovaha okumi nave muthooyo aakhalla ni okumi.

⁸ Sika Apwiya Mulluku yaallima emata mu Edeni wookhuma nndduwa nave muthu yamoopilliiwooyo yaamuhiya mwemmo.

⁹ Apwiya Mulluku yaamellihamo miteekho ddooreera dda ezipaso ddooddiva. Variyari va emateeyo vaakhalla muteekho woovaha okumi vamoddattho ni muteekho woodduwelliha ddaphaama ni ddoonanara.

¹⁰ Nave mu Edeni mwaakhalla muhinje oyo wahellella emateeyo. Muhinjooyo vookhumani mu Edeni waakawaneya mihinje misese.

¹¹ Muhinje wawaamba tti Pishoni oyo oneeta moowaapheella ellapo ya Havila nko onaphwanyeya golide.

¹² (Golide a ellapo yeella tti aphaama. Onnaphwanyeyattho makhura awunkhella a bedeliyo ni malluku oowallamella mutengo ooromolliwa onikisi.)

¹³ Muhinje waneepiilli tti Gihoni oyo oneeta mwawaapheella ellapo ya Kushi.

¹⁴ Muhinje waneeraru tti Tigrisi oyo oneeta wookhuma nndduwa wa ellapo ya Asiriya. Muhinje waneesese tti Yufurate.

¹⁵ Sika vano Apwiya Mulluku yaamukusa muthooyo, emuhiya mu emata ya Edeneelle wi ayillimeke navettho wi ayiwehereke phaama.

¹⁶ Nave Apwiya Mulluku yaamulamula muthooyo wi, “Ocheke dda orive muteekho wa m'matanimmu

¹⁷ opatula ezipaso dda muteekho woodduwelliha ddaphaama ni ddoonanara kaambiiwa nllapo nno onaacheewe ezipaso dda muteekho yooyo, ddawoona, onimakhwa.”

¹⁸ Sika vano Apwiya Mulluku yaallota wi, “Khe phaama wi mullopwana akhalle yeekha. Kineeromupangella mukhwaaye wi amukavihereke.”

¹⁹ Apwiya yaakusa ethaya yoopa enama ddittheddene ni epallame ddittheddene. Yaawaana wa muthu wi addivahe manddina. Vawi manddina ayo muthu aromollilleeye ovenyera vaavo ddinadduwelliwa ni manddina yaayo.

²⁰ Mullopwanooyo aaddivaha manddina eziweto ddittheddene, epallame ni enama ddittheddene ddamuhakani. Komave mullopwana khaarina mukhwaaye oomukavihera.

²¹ Sika vano Apwiya yaamukoniha ekhove ddookhwana mullopwanooyo. Nave akonaka, Mulluku aakusavo epararu emodda, akhuneellavo vanipuronimvo ni muhehe.

²² Apwiya yaampanga mutthiyana ovenyera o epararu yayikusalliiwa wa mullopwana nave yaamuwaana wa mullopwanooyo.

²³ Vano mullopwana aallota wi, “Vano olla sika nikhuva na makhuvaaka, nave muhehe wa muhehaaka. Anaaromolliweke wi Mutthiyana, ekaamba yawi akusiwe ovenyera wa mullopwana.”

²⁴ Sika ekaambiiwa mullopwana anaahiyeeye attiitthinnya ni amennya aya atthella, sika eellaayo ennakhalla mwiilli mmodda.

²⁵ Mullopwanooyo ni mwaariyoolle, attheene yaari epwillimwinddive komave kheyaawulliwa muru.