Genesis 18 - Mawu a Mulluku

Lonjezo na oyariwa wa Isake

¹ Apwiya yaamooneyella Abrahamu o miteekho dda muthundu dda o Mamure mvo Abrahamooyo akeraatthilleeye va mullako wa musasaaye enthawi yootthaana ovihalle.

² Moohitiyerella ello aawoona athu araru yiimellille vakhuviru ni olliye. Awoonille, aatimulla mwawaakuva wi aallochelle. Aakokhora vatthi,

³ allota wi, “Apwiyaaka, mwaarimi mukeerenlle echifundo wunchichi, pepaani muhikhwaranye vaatte va oorumeyellaanyu.

⁴ Asimaaddi vang'ono ewe wi muhuwe manyallo. Mweereke mwiithuuwaka vamuteekhonimva.

⁵ Miyaano vano kinaya kakuse yoocha wi mwacha muphwanye masiva ookhwaranyella olendwaanyu. Moophiya vaatte vakamva sika kinaphwanella miyaano kuurumeyelleni.” Athwaayo yaamwaakhulla wi, “Ddaphaama, era moollikana ni mmo ollotelleewe.”

⁶ Abrahamu aathamakella omusasani waye nave aamulleella Sara wi, “Okuse mwawaakuva etthello ddiraru dda othu waphaama, owoottowe nave omwaapeye buledi.”

⁷ Vatulli viwa, Abrahamu aathamaka amuphara mwaana a eng'ombe aphaama ooneneva, awinnya akaporwaaye wi empotokose mwawaakuva.

⁸ Aakusattho mukaka woonyuunya ni mmodda woohinyuunya ni enama yoopotokosiweelle aavaha ddittheddenennddo. Olliye ahiimella vakhwipi nngu athwaayo echaka vatthi va muteekho.

⁹ Vano athwaayo yaamukoha Abrahamu wi, “Ethiyo mwaariyo Sara ari wuuwi?” Abrahamu ahaakhulla wi, “Ari m'musasanimmu.”

¹⁰ Mmodda a athwaayo aari Apwiya nave aallota wi, “Kinimalonjeza wi vamalla miyeri mitthanu ni misese kineerohokollowattho nave mwaariyo aneeromuyara mwaana aamullopwana.” Nave Sara ahiiwa vawi akeraatthille otulli wa Abrahamu, va mullako wa musasa.

¹¹ Abrahamu ni Sara attheene yaari yuulluvanlle nave enthawi yeeyo sika Sara aari ahiyalle oya omweerini wonanko enakhallella atthiyana.

¹² Sika Sara aattheya muwariwari wi, “Ha, ethiyo kuulluvallelleemimmu, ttuuhakallallattho ni mamunaka? Navettho mamunakooyo tti awuulluvalla.”

¹³ Vano Apwiya yaamukoha Abrahamu wi, “Kaambiiwa tini Sara attheyeeye voollotani wi, ‘Ethiyo mi kuulluvallelleemimmu ttuumuyara mwaana?’

¹⁴ Ethiyo yookhallavo ello yoolepheleya weeriwa ni Apwiya? Sika va enthawiine, kineereweera nndda kilonjezilleemi nave Sara aneeromuyara mwaana aamullopwana.”

¹⁵ Ekaamba ya woova, Sara aaruna wi, “Ngaattheyille.” Koma Apwiya yaallota wi, “Ee, waattheya.”

Abrahamu anaavekellella athu a o Sodomu

¹⁶ Sika vano athwaayo yaatimulla, ephiya vanipuroni mvo yawehiiwa o Sodomu. Abrahamu aathaanana nimodda wi aavelleelle va olendwiiwa.

¹⁷ Nave Apwiya yaallota weekhiiwa wi, “Abrahamoolla ngimukhuwella eyo kinapaalleemi weera.

¹⁸ Edduullu ddaye ddinaakhalle mutundu muullupalli wa masiva. Nave mitundu ddittheddene dda va ellapo yavatthi ddineerodalisiwa oyeella mwa olliye.

¹⁹ Koomutthoolla olliyoolla wi aalamule anaaye ni mabanjaaye amuhoollo wi yiiwellelleke mawaaka vaweerani ddaphaama ni ddoolungama. Yeera ddenndda, kineereweera ddittheddene kamulonjezilleemi.”

²⁰ Sika Apwiya yaamulleella Abrahamu wi, “Vookhalla mullatu wawoopiha woohumullulla Sodomu ni Gomora nave nichimo niwa tti nuullupalli wunchichi.

²¹ Mwawi ddiiddo kinapaalla kikitthellewo wi koone dda mullatu oyo kiiwalleemi waarimi ori wawoona.”

²² Sika athu eellaalle yaatimulla enaya o Sodomu koma Abrahamu aahalla ni Apwiya.

²³ Enthawi yeeyo Abrahamu aawaatamella Apwiya nave aakoha wi, “Ethiyo wiiddiiddonko muneerewoononga athu oolungama ni oohilungama?

²⁴ Ethiyo mwaphwanyeya athu 50 oohilungama m'muzindanimmo, ethiyo muneerewoononga muzinda muttheene? Ethiyo khamuwuhiya wi mwaasunge athu 50 oolungamaayo?

²⁵ Ddawoona, khamuwiipha athu oolungama ni oohilungama. Yeella tti yooheereya! Ethiyo aweeruza a ellapo yavatthi ettheene khanaphwanella weera echilungamo?”

²⁶ Apwiya yaamwaakhulla wi, “Kaaphwanya athu 50 oohichimwa mu Sodomu, kineerewuuhiya muzinda muttheenooyo oohiwoononga, ekaamba ya athu 50 oolungamaayo.”

²⁷ Abrahamu aallotattho wi, “Pepaani, koollipa murima voollotani mwawi ddiidda ni nyuwaano, Apwiya. Miyaanothi tti muthu shisha vamiitthoni vanyu.

²⁸ Apaalle va echiwerengero ya 50, vayelleella athu atthanuve? Ethiyo muneerewoononga muzindooyo ekaamba yawi vooyelleella athu atthanuve?” Apwiya yahaakhulla wi, “Kaaphwanyamo athu 45 oolungama, ngiwoononga muzindooyo.”

²⁹ Abrahamu aakohattho wi, “Ethiyo nanga vaphwanyeya athu oolungama 40.” Apwiya yaamwaakhulla wi, “Kaaphwanyamo athu 40, ngiwoononga.”

³⁰ Abrahamu aallotattho wi, “Pepaani, kinimuuvekani, muhinakishella murima Apwiya nave kineerollotattho. Ethiyo nanga mwaaphwanyawo athu oolungama 30?” Apwiya yaamwaakhulla wi, “Kaaphwanyamo athu 30, ngoononga.”

³¹ Abrahamu aallota wi, “Kinimuuvekani, kikhululukelleni voollipani murima mwawi ddiidda nyu Apwiya. Ethiyo nanga mwaphwanyeya oolungama 20?” Apwiya yahaakhulla wi, “Kaaphwanyamo oolungama 20, ngoononga.”

³² Voomallihella, Abrahamu aallota wi, “Pepaani, muhinakishella murima Apwiya koma killote omoddave. Ethiyo nanga mwaaphwanya oohichimwa khumive?” Nave Apwiya yaallota wi, “Kaaphwanyamo oolungama khumi, ngoononga.”

³³ Nave Apwiya emallihalle ollota, yaamuhiya vaavo Abrahamooyo.