Genesis 17 - Mawu a Mulluku

Ophaddiwa, echizindikiro ya echipangano

¹ Abramu ari ni miyakha 99 Apwiya yaamooneyella emulleella wi, “Mi tti Mulluku Amasiva Mattheene. Vano wiiwellelleke enthawi ddittheddene nave ohichimweke

² vawi kineereweera echipangano ni weyaano nave kineerewuuvaha edduullu ddinchichi.”

³ Enthawi yeeyo Abramu aakokhora vatthi nave Mulluku aallota wi,

⁴ “Ella tti echipangano kineereemi ni weyaano. Kinimalonjeza wi onaakhalle nikhollo na mitundu ddinchichi.

⁵ Nnddina nawo khanikhallattho Abramu koma Abrahamu. Nna sika nnddina nawo kaambiiwa kinnuutthattusa nikhollo na mitundu ddinchichi.

⁶ Kineerewuuvaha edduullu ddinchichi vawi ddinaakhalle mitundu ddinchichi nave ddimodda mwa edduullunnddo ddinaakhalle mamwene.

⁷ Nave kineerokeraatthiha echipangano variyari va miyaano ni weyaano ni edduullu ddawo muhoollommo nave echipanganweella enaakhalle yoohimalla. Sika miyaano kinaakhalle Mullukwaawo ni Mulluku a edduullu ddawo.

⁸ Ellapo ella onakhalleewemo wonanko mulleto, kineerewuuvaha weyaano ni edduullu ddawo. Ellapo ettheene ya Kanani enaakhalle ya edduullu ddawo wa enthawi yoohimalla nave miyaano kineerokhalla Mullukwiiwa.”

⁹ Mulluku aamulleellattho Abrahamu wi, “Vano weyaanottho osungeke echipanganwaaka ni edduullu ddawo muhoollommo.

¹⁰ Weyaano ni edduullu ddawo muhoollo, musungeke echipanganweella yawi arive mullopwana variyari vanyu aphaddiweke.

¹¹ Waambeella ollello muphaddiweke nave ella enaakhalle echizindikiro ya echipangano ya variyari va miyaano ni nyuwaano.

¹² Mumuphaddeke arive mwaana aamullopwana akwakhwana mallapo matthanu ni mararu. Mumuphaddeke arive mullopwana va mibado ddanyu ddittheddene, arive kaporo ooyariwa mpa mwanyu apaalle kaporo mwamukunlleenyu ni makobiraanyu.

¹³ Aphaddiweke arive kaporo ooyariwa mpa mwanyu apaalle kaporo mwamukunlleenyu ni makobiraanyu. Nave yeella ekhalle echizindikiro ya va miilli ddanyu, yawooniha wi echipanganwaaka ni nyuwaano tti ya enthawi yoohimalla.

¹⁴ Mullopwana oohiphaddiwa kheerengelliwaka ni athu a mutundwaaye kaambiiwa ootathilla echipanganwaaka.”

¹⁵ Vatulli viwa Mulluku aamulleella Abrahamu wi, “Mwaariyoolla ohimuromullekettho wi Sarai. Vano nnddina naye tti Sara.

¹⁶ Olliyoolla kineeromudalisa nave kineerewuuvaha mwaana aamullopwana oweella mwa olliye. Kineeromudalisa nave anaakhalle moowe a mitundu ddittheddene dda athu. Variyari va edduullu ddayennddo vineerokhuma mamwene.”

¹⁷ Enthawi yeeyo Abrahamu aakokhora vatthi nave ahaamba ottheya m'murimani mwaye wi, “Ethiyo mullopwana a miyakha 100, ttuuyarattho? Ethiyo Sarooyo ari ni miyakha 90, ttuuyarattho?”

¹⁸ Nave aamulleella Mulluku wi, “Kinuuvekani wi munipuroni mwiwa m'mudalise Ishmaele.”

¹⁹ Koma Mulluku aallota wi, “Iyaayi, mwaariyo Sara sika anuuyarelle mwaana aamullopwana nave aneeromuvaha nnddina nawi Isaki. Kineerokeraatthiha echipanganwaaka ni olliyooyo navettho ni edduullu ddaye muhoollo. Nave echipanganweeyo enaakhalle ya enthawi yoohimalla.

²⁰ Koma ollota dda Ishmaele, miyaano koowiiwa weyaano nave ngoona, kineeromudalisa voomuvahani edduullu ddinchichi. Anaakhalle attiitthiiwa a mamwene khumi ni eelli nave edduullu ddaye ddinaakhalle mutundu muullupalli.

²¹ Koma kinaakeraatthihe echipanganwaaka ni mwanawo Isaki oyo anaayariwe mwa Sara mu enthawi wonanko yeella muyakha woosiisello.”

²² Nave Mulluku amallihalle ollota, aamuhiya vaavo Abrahamooyo.

²³ Nllapo nenno Abrahamu ahiiwellella nnddo Mulluku amulleelleeye. Sika aamuphadda mwanaye Ishmaele ni akaporo attheene ooyarelliwa mpa mwaye apaalle akaporo aakullalleeye ni makobiri, okhulla mi allopwana attheene a mpa mwaye.

²⁴ Abrahamu aari ni miyakha 99 va enthawi aphaddiweeye.

²⁵ Nave mwanaye Ishmaele aari ni miyakha 13 enthawi aphaddiweeye.

²⁶ Sika nllapo nenna Abrahamu ni mwanaye Ishmaele yaaphaddiwa,

²⁷ ni allopwana attheene, erive akaporo aallopwana ooyarelliwa mpa mwaye apaalle amodda aakullalleeye ni makobiri, attheenaayo yaaphaddiwa ni olliyooyo.