Genesis 16 - Mawu a Mulluku

Hagara ni Ishmaele

¹ Sarai mwaara Abramu, khaamuyarelle Abramooyo anamwani. Koma Sarai aakhalla ni kaporo o Iguputo nnddina naye Hagara.

² Sika Sarai aamulleella Abramu wi, “Apwiya khekivahille anamwani. Apaalle mukone ni kaporoolla wi akiyarelle mwaana.” Abramu ahaakhullella ddennddo.

³ Sika Sarai aamuvelleella Hagaroolle wa Abramu wi akhalle mwaariye mung'onong'ono. (Nndda ddeereyille Abramu akhanlle o Kanani miyakha khumi).

⁴ Abramu akonille ni Hagara, Hagarooyo aakhalla ni erukullu. Nave enthawi yeeyo Hagara ahaambeella wiitukhulla ni omunyaambusa adonaaye Sarai.

⁵ Vano Sarai aallota ni Abramu wi, “Dda va muru vanyu ddenndda wi Hagara akinyaambuseke ddiidda. Miyaano kahuuvahani kaporoolla nave waambeella valle akusalleeye erukullu, anakhallella okinyaambusave. Apwiya sika eneeruze wi nimuphwanye oolakwa ttaani variyari vahu.”

⁶ Abramu ahaakhulla wi, “Olliyoolla tti kaporwaawo nave ari m'mattani mwawo sika ttuumweerella erive ello eyo onapaalleewe.” Sika Sarai ahaamba omuhoosa Hagara, ophiyera Hagarooyo aathawa.

⁷ Mungelo a Apwiya aakumana ni Hagara va neetuutu a mu echipululu va musewu wooyeella o Shuri.

⁸ Nave aallota wi, “Hagara, kaporo a Sarai, ethiyo onavenyera wuuwi navettho onaya wuuwi?” Hagara ahaakhulla wi, “Kinaathawa adonaaka Sarai.”

⁹ Mungelooyo aallota wi, “Iyaayi, hokollweella wa adonaawo Sarai, wamugonjelle.”

¹⁰ Mungelo a Apwiyooyo aallotattho wi, “Kineerewoonjerera wunchichi edduullu ddawo vawi khaavo oyo anaawore oddeerenga.

¹¹ Vano oneerokhalla ni mwaana aamullopwana nave onaamuvahe nnddina nawi Ishmaele vawi Apwiya ahiiwa winlla wawo va ddookatamiha ddawo.

¹² Koma mwanawooyo aneerokhalla ni murima wa enama, eneerewiitana ni arive muthu nave athu attheene eneerewiitanana. Aneerewiitana ni abalaaye attheene.”

¹³ Sika Hagara ahaaromolla Apwiya yallotille ni olliye wi, “Nyuwaano tti Mulluku Awoona,” vawi aallota wi, “Vano koomoona oyo anakoona nave kookhallave ni okumi.”

¹⁴ Ella sika ekaambiiwa athu enamuromolla neetuutu a variyari va Kadeshi ni Beredi wi, “Neetuutu a Ookumi Anakoona Miyaano.”

¹⁵ Sika vano Hagara aamuyarella Abramu mwaana aamullopwana, aamuvaha nnddina nawi Ishmaele.

¹⁶ Abramu aari ni miyakha 86 va enthawi yeeyo.