Genesis 15 - Mawu a Mulluku

Echipangano ya Mulluku ni Abramu

¹ Ddimanlle nndda, Apwiya yaamooneyella Abramu mu masomphenya. Yaamulleella wi, “Ohoove Abramu, mi tti echishangwaawo. Yoothuviwaawo enaakhalle yuullupalli.”

² Koma Abramu aallota wi, “Apwiya Mulluku, miyaano nginna anamwani. Vano munaawore mwawiidde okivaha yoothuviwa? Oovollowa munipuroni mwaka tti Eliyezere a o Damasiko.

³ Khamukivahille anamwani vawi ddiiddo mmodda mwa allupa muttekwaaka sika anaahallena eyuumaaka.”

⁴ Vano Apwiya yaamulleella wi, “Eliyezere khahallana eyuumaawo koma mwaana aawaawo sika anaahallena eyuumaawo.”

⁵ Enthawi yeeyo Apwiya yaamukhumiha Abramu vaatte, emulleella wi, “Ngoona oddullunngu nave waaworaka weerenge etheneerinnddo, erenga. Weyaano oneerokhalla ni edduullu ddinchichi wonanko etheneerinnddo.”

⁶ Abramu ahaakhulupilila Apwiya nave ekaamba ya yeeyo Apwiya yaamwaakhullella wi tti oolungama.

⁷ Sika Apwiya yaamulleella Abramu wi, “Mi tti Apwiya oyo kuukhumihalle o Uri a o Babiloni wi kuuvahe ellapweella wi ekhalle yaawoyaawo.”

⁸ Koma Abramu aakoha wi, “Apwiya Mulluku, ethiyo kinaadduwelle mwawiidde wi ellapweella enaakhalle yaaka?”

⁹ Apwiya yaamwaakhulla wi, “Waana eng'ombe, epuri ni nankhoro a enkhosa, ddittheddenenndda dda miyakha miraru, vamoddattho ni nnddiya ni ekhunda.”

¹⁰ Abramu aawaana enama ddittheddenennddo wa Apwiya, addiphaddaphadda variyari. Aahiya ddoophaddannddo piillipiilli moowehana, mu mizere miilli koma epallamenndde khaaddiphaddille.

¹¹ Aneekhwaambe yaamorellavo wi eche enama nnddo iiphalleeyennddo koma Abramu aawiikariha.

¹² Voovollowani nndduwa, Abramu aakhwavo ni ekhove navettho epiphi yuullupalli ni yawoopiha yammorella olliye.

¹³ Sika Apwiya yaamulleella wi, “Odduwelle moosimikiza wi edduullu ddawo ddineerokhalla alleto o ellapo yaaneena, ddineerokhalla wonanko akaporo nave ddineerohoosiwa wa miyakha 400.

¹⁴ Koma kineerewaallaka athu enaarumeyellekeewaayo, vano edduullu ddawonnddo ddineerokhumawo o ellapweeyo ddikusalle eyuuma yinchichi.

¹⁵ Vano weyaano oneerokhalla ni okumi enthawi yoorekama nave oneerokhwa mwamurendelle. Oneerovitthiwa mu mahame wuulluvanllesese.

¹⁶ Viviralle mibado sese edduullu ddawonnddo ddineerohokollowattho ekaamba yawi ngiwiikariha a Aamori ophiyera onanara wiwa ophiyalle variyari wi ellakiwe.”

¹⁷ Nndduwa nivollowille wene, epiphi yaambaka, moorurumusa vahooneya embawula yoothuwa mwiisi ni mutthiko wookhara nave ddeko piillinndda ddaavira variyari va enama ddoophaddiwanndde.

¹⁸ Nllapo nenno Apwiya yaapangana ni Abramu. Yaallota wi, “Kinimalonjeza wi kineeroddivaha edduullu ddawo ellapo ettheeneella ovenyera o muhinje wa o Iguputo ophiyera o muhinje muullupalli wa Yufurate.

¹⁹ Kineerewuuvaha ellapo ya Akeni, ya Akenizi, ya Akadimoni,

²⁰ ya Ahiti, ya Aperezi, ya Arefaimu,

²¹ ya Aamori, ya Akanani, ya Agirigashi ni ya Ayebusi.”