Genesis 14 - Mawu a Mulluku

Abramu aamwaakihera Loti

¹ Va enthawi ya olamulello wa Amurafere mwene a o Babiloni, Ariyoki mwene a o Elasara, Kedori Laomere mwene a o Elamu ni Tidala mwene a o Goimu,

² attheenaalla yahiiwanana ddoohella ekhoto mamwene matthanu amodda. Alla yaari Bera mwene a o Sodomu, Birisha mwene a o Gomora, Shinabe mwene a o Adima, Shemebera mwene a o Zeboimu ni mwene a o Bela (apaalle Zowari).

³ Mamwene matthanwaalla yahiiwanana ni akhotwiiwa mu ntapo na Sidimu, (o Enyanja Yookhwa).

⁴ Miyakha khumi ni miilli alliwa yaamurumeyella Kedori Laomere koma muyakha wa khumi ni miraru attheenaalla yaamuwukila.

⁵ Va muyakha wa khumi ni sese Kedori Laomere ni akhwaaye awiiwananana yaawa ni ekhoto nave emugonjiha Arefaimu oyo akhalla o Ashiteroti Karanaimu, Azuzimu a o Hamu ni Aemimu o ntapo na Kiriyataimu.

⁶ Yaamugonjihattho Ahori omiyaangoni dda Seiri ophiyera o Eliparani va malire a echipululu.

⁷ Nave yaarukunuwa ephiya o Enimishipati (apaalle Kadeshi) nave yaagonjiha ellapo ettheene ya Aamaleke ni ya Aamori ayo yakhalla o Hazazoni Tamara.

⁸ Sika mamwene a o Sodomu, Gomora, Adima, Zeboimu ni Bela (apaalle) yahaatthukumaniha akhotwiiwa mu ntapo na Sidimu, owana

⁹ ni Kedori Laomere a o Elamu, Tidala a o Goimu, Amurafere a o Babiloni ni Ariyoki a o Elasara. Sika mamwene matthanu owana ni mamwene masese.

¹⁰ Ntapo na Sidimu naari nooddalla ni malliti awoopiha ni oopandda. Vano mvo akhoto a o Sodomu ni Gomora yathawiiwa yaamorella m'mallitini koma amodda yaathawella omiyaangoni.

¹¹ Mamwene masesaalle yaakusa erive ello o Sodomu ni o Gomora ni ddoocha evenyavo.

¹² Yaamukusattho Loti mwaana a mwanamunne a Abramu ni eyuumaaye ettheene vawi akhalla o Sodomu wenko.

¹³ Koma muthu mmodda athawille aawa nave amulleella ddittheddene Abramu, Muheberi. Abramu akhalla vakhuviru ni miteekho dda muthundu dda Mamure Muamori, mwanamunne a Eshikolo ni Anere ayo yiiwanana ni Abramu vakhotoni.

¹⁴ Abramu iiwalleeye wi mbalaaye oophariwa, ahaatthukumaniha akhoto. Attheenaalla vamodda yaarivo 318 nave yahaathwara mamwenaalle ettilla ettheene ophiyera o Dani.

¹⁵ Ephiyalle wenko, ahaakawa athwaaye millokomilloko nave olliye ni athwaaye yaawanana ni mahiiyu ophiyera yahaagonjiha attheene. Yaamwiikariha ophiyera o Hoba, ompoto wa Damasiko,

¹⁶ nave yaawaakha ddayiwa ddittheddene. Yaamwaakiherattho Loti, mwaana a mwanamunne ni ddaaye ddittheddene, opwesereravo atthiyana ni athu amodda attheene.

Melkizedeki anamudalisa Abramu

¹⁷ Abramu avenyeraka woomugonjiha Kedori Laomere ni mamwene awiiwanananayaalle, mwene o Sodomu aakhuma wi akumanena o ntapo na Save (apaalle ntapo na Mwene).

¹⁸ Nave Melkizedeki,* mwene a o Salemu, mullupa mukutho a Mulluku Amasiva Mattheene, aawa wa Abramu amukusalle buledi ni vinyo.

¹⁹ Aamudalisa Abramooyo wi, “Mulluku Amasiva Mattheene, oophatusa oddullu ni ellapo yavatthi, uudalise weyaano Abramu.

²⁰ Atitimihiwe Mulluku Amasiva Mattheene oyo aweerihalle wi waagonjihe adanaawo.” Vaavo Abramu aavelleella wa Melkizedeki erive yaneekhumi ya ddeko ddittheddene aakhilleeye.

²¹ Nave mwene a o Sodomu aamuveka Abramu wi, “Ddeko ddittheddene mwaakhilleenyunndda muddisunge koma athwaakave yaalla mukinnye.”

²² Koma Abramu ahaakhulla wi, “Kinimallupella vamiitthoni va Apwiya Mulluku Amasiva Mattheene, oophatusa oddullu ni ellapo yavatthi

²³ wi ngiwa kikusa olusi naari mukwe wa esapato, sika wi ohaambeelle ollota wi, ‘Tti mi kaamuvahille eyuuma Abramu.’

²⁴ Ngikusa erive ello koma kinaakusevo ddennddove nnddo akhotwaaka yachilliiwa ni ddoophwanella waakawella ayo yakivelleelle, monga Anere, Eshikolo ni Mamure. Alliwa ekusevo ddayiwa.”