Genesis 13 - Mawu a Mulluku

Ohiyana wa Abramu ni Loti

¹ Abramu ni mwaariye yavenyilliiwawo o Iguputo, yaaya o echigawo yoomwera ya Kanani. Nave Loti aathaanana nimodda.

² Abramu aari mullupa eyuuma vawi aakhalla ni eziweto navettho siliva ni golide.

³ Ovenyera omwera aasusella o Betele, o nipuro wulle khalle amakilleeyewo musasaaye, variyari va Betele ni Ai.

⁴ Sika aahokollweellattho onipuroni wulle khalle amakilleeyewo nikuwa nave aallapella nnddina na Apwiya.

⁵ Loti nayeenettho aakhalla ni enkhosa, epuri ni eng'ombe ni nibanja naye nittheene vamoddattho ni akaporwaaye.

⁶ Sika khewaari munyepu wookwakhwanella ochihella eziweto dda eellaayo vawi arive muthu aakhalla ni eziweto ddinchichi. Sika waari woohiworeya wi ekhallelle va nipuro nimodda.

⁷ Sika abusa a Abramu ni abusa a Loti yahaamba okangana. Enthawi yeeyo Akanani ni Aperezi yaari ekhallakave mwiillaponimmo.

⁸ Sika Abramu aamulleella Loti wi, “Hiyaano niri voobaleni, sika vihikhalle okangana variyari va weyaano ni miyaano, emoddamoddave yeeyo variyari va abusaawo ni abusaaka.

⁹ Ethiyo ellapo ettheene kheri m'mattani mwawo? Hanko nihiyane, otthoolle embali ya ellapo eyo onapaalleewe. Watthoolla onnatta noonyottho, miyaano kinaaye onnattanatta nave watthoolla onnattanatta, miyaano kinaaye onnatta noonyottho.”

¹⁰ Vano Loti awehillewehille, ahoona wi ntapo nittheene na muhinje wa Yordani ophiyera o Zowari naakhalla ni maaddi manchichi. Ntaponno naari wonanko Edeni, emata ya Apwiya apaallettho wonanko ellapo ya Iguputo. Enthawi yeeyo Apwiya yaari ehinoononge mizinda dda Sodomu ni Gomora.

¹¹ Sika Loti aatthoolla ntapo nittheene na Yordani, aya akhalla wookhuma nndduwa wa ntaponno. Mmu sika athu eellaalla yahiyanelliiwa.

¹² Abramu aakhalla mu ellapo ya Kanani koma Loti aakeraattheya variyari va mizinda dda ntapo, atthipella musasaaye vakhuviru ni muzinda wa Sodomu.

¹³ Athu a m'muzindammo yaari oonanara ni oochimwesesa vamiitthoni va Apwiya.

Abramu aasusella o Hebroni

¹⁴ Loti atthaamille, Apwiya yaamulleella Abramu wi, “Tukhulla miitthwaawo nave owehesese ompoto, omwera, wookhuma nndduwa ni woovollowa nndduwa.

¹⁵ Kineerewuuvaha weyaano ni edduullu ddawo ellapo ettheene onooneeweeyo. Nave enaakhalle yaawoyaawo enthawi ddoohimalla.

¹⁶ Kineerewuuvaha edduullu ddinchichi nave khaavo naari mmodda anaawore oddeerenga. Yooyove anawora weerenga nthupi na va ellapo yavatthi sika anaawore.”

¹⁷ Vano timulla ni weetella ellapo ettheeneeyo vawi kineerewuuvaha.

¹⁸ Sika vano Abramu aatthaamiha musasaaye, aya akhalla o miteekho dda muthundu dda o Mamure nnddo ddiri o Hebroni. Nave wenko ahaamakella Apwiya nikuwa.