Genesis 12 - Mawu a Mulluku

Mulluku anamwiithana Abramu

¹ Vano Apwiya yaamwiithana Abramu wi, “Hiya ellapwaawo ni abalaawo ni nibanja na attiittho nave oye o ellapo eyo kinuutthoonyihelleemi.

² Kineerewuutthattusa nikhollo na mutundu nuullupalli nave kineerewuudalisa ni wuutthattusa oovuwa wi okhalle madaliso.

³ Kineerewaadalisa attheene enuudalisa weyaano, koma kineeromutembelela arive muthu anuutembelela weyaano. Oweella mwa weyaano mitundu ddittheddene dda va ellapo yavatthi ddineerodalisiwa.”

⁴ Abramu aari ni miyakha 75 enthawi eyo atthaameeye o Harani moollikana ni mmo Apwiya yamulamulelliiwa nave Loti aathaanana nimodda.

⁵ Abramu aamukusa mwaariye Sarai, Loti mwaana a mung'onong'onwaaye ni eyuumaaye ettheene ni akaporo aariiyena o Harani. Sika ahaamba olendo wooya o Kanani. Ephiyalle o Kanani,

⁶ Abramu aheetella ellapo ettheeneeyo ophiyera o Shekemu, o muteekho wa muthundu wa o More. Va enthawi yeeyo tti vawi Akanani eri mwiillaponimmo.

⁷ Vano Apwiya yaamooneyella Abramu emulleella wi, “Ellapo yeella kineerovaha edduullu ddawo.” Sika va nipuro nenno Abramu ahaamakella nikuwa Apwiya ayo yamooneyelle.

⁸ Vatulli viwa aasusella o miyaango dda wookhuma nndduwa wa Betele nave aatthipella musasaaye variyari va Betele woovollowa nndduwa ni Ai wookhuma nndduwa. Wenkottho aamakawo nikuwa nave ahaallapella Apwiya.

⁹ Nave aakhwaranya ni olendwaaye vang'ono vang'ono, ovollweella o echigawo yoomwera ya Kanani.

Abramu o Iguputo

¹⁰ Koma mwiillaponimmo mwaakhalla ettalla. Ekaamba yawi ettalleeyo yahunnuwa wunchichi, Abramu aakhwaranyella omwera, aaphiya o Iguputo wi akhallewo enthawi yooyeva.

¹¹ Eri vakhuviru ollapuwa malire a ellapo ya Iguputo, aamulleella mwaariye Sarai wi, “Kinnadduwella wi weyaano ori mutthiyana ooreera.

¹² Vano Aiguputo yawoona weyaano nave yadduwella wi weyaano tti mwaaraka, sika voopaallani wi yuutthelle weyaano eneerokiipha miyaano.

¹³ Pepaani, waalleelleke wi ori murokoraka wi vaweerani ddiiddo ddeko ddikeetelle phaama ekaamba ya weyaano nave kineerovulluwa.”

¹⁴ Abramu allapuwalle malire ovollowa mu Iguputo, Aiguputo yahoona wi mutthiyanooyo tti ooreera wunchichi.

¹⁵ Enduna dda mwene ddimoonille mutthiyanooyo, ddaamulleella Farao dda oreera waye. Vaavo enduna ddaamukusa ddaamuhiya o enyumba yoomwene.

¹⁶ Ekaamba ya Sarai, Farao aamweerella ddaphaama Abramu voomuvahani enkhosa, epuri, eng'ombe, abulu, ekamira* vamoddattho ni akaporo aallopwana ni aatthiyana.

¹⁷ Koma Apwiya yaarumiha ereta ddawoopiha va Farao ni va athu attheene a mpa mwaye, ekaamba ya Sarai mwaara Abramu.

¹⁸ Sika Farao aamwiithana Abramu amukoha wi, “Ethiyo weyaano, okeerille tini? Kaambiiwa tini wahikilleelleewe wi olla tti mwaariyo?

¹⁹ Kaambiiwa tini walloteewe wi tti murokoriyo ni okaakhullella wi kimutthelle? Mwaariyo olla, mukuse nave ovenyevo!”

²⁰ Farao ahaalamula athwaaye nave alliwaayo yaamukhumiha Abramu ni mwaariye mwiillaponimmo ni ddittheddene aariiyena.