Genesis 11 - Mawu a Mulluku

Nttattha na Babiloni

¹ Vawaambawaamba athu attheene a va ellapo yavatthi yallota ellotello emoddave.

² Nave yatthaamilliiwa ovenyera wookhuma nndduwa, yaaphiya o ntapo na Babiloni nko yakeraattheyiiwa.

³ Vano yahaamba okambirana wi, “Hankoni noope enjerwa nave niddoose phaama.” Sika vano yaaphariha mutteko enjerwannddo voomakani nave yaamaka ni nimphora munipuroni mwa matokwi shisha.

⁴ Vano yaallota wi, “Hankoni niimakelle weekhiihu muzinda ni nttattha noorekama ophiyera oddullu. Neera ddiiddo nineerovuwa wunchichi nave khanimwareyattho va ellapo yavatthi.”

⁵ Vano Apwiya yaakittha wi yoone muzindooyo ni nttattha yamaka athwaayo.

⁶ Sika Apwiya yaallota wi, “Vano athu attheenaalla eri amodda nave enallota ellotello emoddave. Ddeko eneereewanndda tti maambeellello a ddeko enaaweeriiwa muhoollo. Sika alliwaalla ttuuweera erive ello eyo enapaalliiwa.

⁷ Hankoni nikitthelle wenko wi navirikanihe ellotellwiiwa wi ehiiwananeke.”

⁸ Sika Apwiya yahaamwara athwaayo va ellapo yavatthi ettheene nave athwaayo yaahiya omaka muzindooyo.

⁹ Sika muzindooyo waromolliwa wi Babiloni ekaamba yawi wenko Apwiya yaavirikaniha ellotello ya athu attheene. Nave ovenyera wenko yahaamwara athwaayo va ellapo yavatthi ettheene.

Edduullu dda Shemu

¹⁰ Nna sika ntthopoollo na edduullu ddoovenyera mwa Shemu. Ddiviralle miyakha miilli emanlle echigumula, Shemu ari ni miyakha 100, aamuyara Aripakishadi.

¹¹ Vatulli viwa aakhalla ni okumi miyakha ddimodda 500 nave ahaayarattho anamwani amodda aallopwana ni aatthiyana.

¹² Aripakishadi ari ni miyakha 35, aamuyara Shela.

¹³ Vatulli viwa aakhalla ni okumi miyakha ddimodda 403 nave ahaayarattho anamwani amodda aallopwana ni aatthiyana.

¹⁴ Shela ari ni miyakha 30, aamuyara Eberi.

¹⁵ Vatulli viwa aakhalla ni okumi miyakha ddimodda 403 nave ahaayarattho anamwani amodda aallopwana ni aatthiyana.

¹⁶ Eberi ari ni miyakha 34, aamuyara Pelegi.

¹⁷ Vatulli viwa aakhalla ni okumi miyakha ddimodda 430 nave ahaayarattho anamwani amodda aallopwana ni aatthiyana.

¹⁸ Pelegi ari ni miyakha 30, aamuyara Reu.

¹⁹ Vatulli viwa aakhalla ni okumi miyakha ddimodda 209 nave ahaayarattho anamwani amodda aallopwana ni aatthiyana.

²⁰ Reu ari ni miyakha 32, aamuyara Serugi.

²¹ Vatulli viwa aakhalla ni okumi miyakha ddimodda 207 nave ahaayarattho anamwani amodda aallopwana ni aatthiyana.

²² Serugi ari ni miyakha 30, aamuyara Nahori.

²³ Vatulli viwa aakhalla ni okumi miyakha ddimodda 200 nave ahaayarattho anamwani amodda aallopwana ni aatthiyana.

²⁴ Nahori ari ni miyakha 29 aamuyara Tera.

²⁵ Vatulli viwa aakhalla ni okumi miyakha ddimodda 119 nave ahaayarattho anamwani amodda aallopwana ni aatthiyana.

²⁶ Tera ari ni miyakha 70 aamuyara Abramu, Nahori ni Harani.

Edduullu dda Tera

²⁷ Nna sika ntthopoollo na edduullu dda Tera. Tera aamuyara Abramu, Nahori ni Harani. Nave Harani aamuyara Loti.

²⁸ Haranooyo akhwenlle owaniwa, nipuro na Uri a o Babiloni. Akhwille attiitthinnya eri ni okumi.

²⁹ Abramu ni Nahori yaatthella. Abramu amutthellille Sarai nave Nahori amutthellille Milika mwaana a Harani oyottho aari attiitthinnya a Isika.

³⁰ Sarai khaarina anamwani kaambiiwa khaayara.

³¹ Vano Tera aamukusa mwanaye Abramu ni edduullwaaye Loti, mwaana a Harani, vamoddattho mvokohaaye Sarai, mwaara Abramu. Aatimulla olendo ovenyera o Uri, o Babiloni oya o ellapo ya Kanani. Koma aaphiya o Harani, nko yakeraattheyeewawo.

³² Nave Tera akhwenlle wenko ari ni miyakha 205.