Genesis 1 - Mawu a Mulluku

Epilli ya ophatusiwa

¹ Vawaambawaamba Mulluku aaphatusa oddullu ni ellapo yavatthi.

² Ellapo yavatthi kheyaari ni erive ello. Nave epiphi yaakhuneella enyanja yoowallamella navettho Munepa a Mulluku aaneeteeta vaddullu va maaddaayo.

³ Vano Mulluku aallota wi, “Owale” nave waawala.

⁴ Nave Mulluku ahoona wi owalanko waari waphaama. Vaavo Mulluku aahiyaniha owala ni epiphi.

⁵ Mulluku aaromolla owalanko “Otthaana” navettho epiphiiyo aayiromolla “Mahiiyu”. Nave waakhalla misikuwa navettho waakhalla ohinase, nllapo nawaamba.

⁶ Vano Mulluku aallota wi, “Vikhalle yoohiyaniha maaddi wi maaddaayo ekawaneye mapuro meelli”

⁷ nave nndda ddaheereya. Sika Mulluku aaphatusa yoohiyaniha maaddi, waahiyaniha maaddaayo wi amodda ekhalla vatthi va yoohiyaniheeyo amoddaayo vaddullu viwa.

⁸ Yoohiyaniheeyo aayiromolla “Oddullu”. Nave waakhalla misikuwa navettho waakhalla ohinase, nllapo naneepiilli.

⁹ Vano Mulluku aallota wi, “Maaddi a vatthaalla etthukumane vamodda wi mutunda okhallevo,” nave nndda ddaheereyella mwemmo.

¹⁰ Mutundooyo aawuromolla “Ellapo” nave maaddi ootthukumanaayo ahaaromolla “Enyanja.” Nave Mulluku ahoona wi nndda ddaari ddaphaama.

¹¹ Sika Mulluku aallota wi, “Ellapo ekhalle ni ddoomella ddoohiyanahiyana ddookhalla ni mmiddo navettho miteekho dda ezipaso ddookhalla ni mmiddo moollikana ni mitundu ddiwa.” Nave nndda ddaheereyella mwemmo.

¹² Sika ellapo yaakhalla ni ddoomella ddoohiyanahiyana ddookhalla ni mmiddo ni miteekho dda ezipaso ddookhalla ni mmiddo moollikana ni mitundu ddiwa. Mulluku ahoona wi nndda ddaari ddaphaama.

¹³ Nave waakhalla misikuwa navettho waakhalla ohinase, nllapo naneeraru.

¹⁴ Vano Mulluku aallota wi, “Oddullu okhalle ddoomolleella wi ddihiyaniheke otthaana ni mahiiyu navettho wi ddikhalle ezizindikiro dda enthawi, Ehakallallo dda Mallapello.

¹⁵ Nave ddoomolleellanndda ddikhalle oddullu wi ddimolleelleke ellapo yavatthi.” Nave nndda ddaheereyella mwemmo.

¹⁶ Vano Mulluku aaphatusa yoomolleella yuullupalli, nndduwa wi nilamuleke voomolleellani otthaana. Aaphatusattho yoomolleella eng'onong'ono, mweeri wi olamulelleke voomolleellani mahiiyu. Aaphatusattho etheneeri.

¹⁷ Mulluku aahiya ddoomolleella oddullu wi ddimolleelleke ellapo yavatthi

¹⁸ nave wi ddilamulelleke otthaana ni mahiiyu navettho wi ddihiyaniheke omolleella ni epiphi. Nave Mulluku ahoona wi nndda ddaari ddaphaama.

¹⁹ Nave waakhalla misikuwa navettho waakhalla ohinase, nllapo naneesese.

²⁰ Vano Mulluku aallota wi, “Mu enyanja mukhalle ddoophatusiwa ddinchichi ddoohiyanahiyana nave vikhalle epallame ddoovava muddullu.”

²¹ Sika Mulluku aaphatusa ehomba dduullupalli ddamunyanja ni ddoophatusiwa ddimodda ddittheddene ddookhalla m'maaddini, vamoddattho ni epallame ni ddoovava ddimodda ddamitundumitundu. Nave Mulluku ahoona wi nndda ddaari ddaphaama.

²² Aaddidalisa voollotani wi, “Muttotthollane wi muddalle munyanja nave epallamettho ddiddalle va ellapo yavatthi.”

²³ Nave waakhalla misikuwa navettho waakhalla ohinase, nllapo naneetthanu.

²⁴ Vano Mulluku aallota wi, “Va ellapo yavatthi vikhalle ddoophatusiwa dda mitundu ddoohiyanahiyana moollikana ni mitundu ddiwa. Vikhalle eziweto, ddawaapadda ni enama ddamuhakani moollikana ni mitundu ddiwa.” Nave nndda ddaheereyella mwemmo.

²⁵ Sika Mulluku aaphatusa enama ddamuhakani, eziweto ni ddawaapadda, ddittheddenenndda moollikana ni mitundu ddiwa. Nave Mulluku ahoona wi nndda ddaari ddaphaama.

²⁶ Vano Mulluku aallota wi, “Hankoni nimuphatuse muthu moophwanaphwana ni hiyaano, akhalle wonanko hiyaano. Alamulelleke ddamunyanja, epallame, eziweto, enama ddamuhakani ddawaapadda ddittheddene dda va ellapo yavatthi.”

²⁷ Sika Mulluku ahaaphatusa athu, mullopwana ni mutthiyana, moophwanaphwana ni olliye.

²⁸ Ahaadalisa athwaayo vawaalleellani wi, “Muyarane wi mwaate, muddalle va ellapo yavatthi wi muyilamulelleke. Mulamulelleke va ddamunyanja, epallame ni enama ddittheddene ddinakhalla va ellapo yavatthi.”

²⁹ Nave Mulluku aallota wi, “Kohuuvahani ddoomella ddoohiyanahiyana ddookhalla ni mmiddo ni miteekho dda mitundu ddittheddene dda ezipaso ddookhalla ni mmiddo wi mucheke.

³⁰ Nave enama ddittheddene ddamuhakani, epallame ni ddawaapadda ddittheddene, kooddivaha munyepu wi ddicheke yooyo,” nave nndda ddaheereyella mwemmo.

³¹ Mulluku aaweeha ddittheddene nnddo addiphatusalleeye nave ahoona wi ddaari ddaphaama wunchichi. Nave waakhalla misikuwa navettho waakhalla ohinase, nllapo naneetthanu ni nimodda.