Filemoni 1 - Mawu a Mulluku

¹ Ovenyera wa miyaano Paulo, a mundende ekaamba yoomurumeyella Khrisitu Yesu. Navettho ovenyera wa Timoteo mwanamunnihu. Kinuulembella weyaano, mwanamunnihu ookondiwa Filemoni, oyo anamurumeyella Khrisitu wonanko hiyaano.

² Nave kinaalembellattho Afiya murokorihu ni Arkipo mukhwiihu oyo anamurumeyella Khrisitu wonanko akhoto ni mpingo oyo onakumanella mpa mwawo.

³ Echisomo ni murendelle ddoovenyera wa Mulluku Attiitthiihu ni Apwiya Yesu Khrisitu ddikhalle ni nyuwaano.

Echikondi ni echikhulupililo ya Filemoni

⁴ Kinnamuthokoza Mullukwaaka mallapo mattheene kaawuuganizaka weyaano Filemoni m'mavekelloni mwaka.

⁵ Vawi kinniiwa wi onnaakonda athu a Mulluku ni wi onnaakhulupilila Apwiya Yesu.

⁶ Nave kinnavekella wi eyaattanwaahu ni weyaano mu echikhulupililo ekhalle ya masiva sika wi oneerodduwella ddeko ddaphaama ddittheddene nnddo ddiri mwa hiyaano oweella mwa Khrisitu.

⁷ Vawi mwanamunnaka, echikondaawo yookihakallalliha ni okillipiha murima wunchichi! Nave wohaallipiha mirima athu a Mulluku.

Oveka dda Onesimo

⁸ Sika kiri oollipa murima wuullupalli mwa Khrisitu wuulamula yoophwanella weera.

⁹ Koma ekaamba ya okondana wahu, kinapaalla wuuveka, miyaano Paulo, oomwimellella Khrisitu Yesu navettho a mundende ekaamba ya omurumeyella olliye.

¹⁰ Sika kinimuuveka weyaano dda Onesimo. Olliye ari wonanko mwanaka vawi kiriimi mundende ohaamba okhulupilila oweella mwa ollalleya waka.

¹¹ Khalle khaari ni mutteko wa weyaano koma vano ookhalla ni mutteko wa weyaano ni wa miyaano.

¹² Kinimamurumiha omuhokollosella wa weyaano, wonanko kinarumiha murimaaka.

¹³ Kaanapaalla wi akhalleke ni miyaano wuno wi akikavihereke munipuroni mwa weyaano kiriimi mundendemmu ekaamba ya othenga waphaama.

¹⁴ Koma nginapaalla weere erive ello weyaano wakhoota vawi nginapaalla wi kuuwatihere wi okikavihere koma wi weere ddenndda moopaalla mwawo.

¹⁵ Apaalle ekaamba eyo Onesimo ahiriiye ni weyaano wa enthawi yooyeva yaari yawi akhalle ni weyaano wa enthawi ettheene.

¹⁶ Vano khaari wonanko kaporove koma oomukhwaranya kaporo, tti mwanamunno ookondiwa. Miyaano kinnamukonda koma weyaano onaphwanella omukondeke wunchichi, wonanko kaporo navettho wonanko mwanamunno mu eyaattano ni Apwiya!

¹⁷ Vano waakoonaka miyaano wonanko mukhwaawo oomurumeyella Khrisitu, omwaakhelle olliyoolla wonanko mmo wakaakhellelleewe miyaano.

¹⁸ Aarimi aweerelle ddoonanara apaalle ookhalla ni ekongoli wa weyaano, ekongoli yeeyo ekhalle ya miyaano.

¹⁹ Vano, kinalemba yeella ni nnatta naka wi, “Mi Paulo, kineerollivella.” Upuwella wi ekongolaawo wa miyaano tti okumaawo.

²⁰ Sika, mwanamunnaka, okeerelle echifundo ekaamba ya Apwiya. Okillipihe murima wonanko mwanamunnaka ekaamba ya Khrisitu.

²¹ Kinnakhulupilila wi oneerokiiwellella nave kinalemba yeella wa weyaano voodduwellani wi oneereweera naari ohiyana ni mommu kinallotelleemi.

²² Navettho okikhozere vookonavo kaambiiwa kinatiyerella wi Mulluku aneerewiiwa mavekello a nyuwaano nave kineerohokolloselliwa wa nyuwaano.

Ollaanya

²³ Epafra, oyo ari mundende vamodda ni miyaano ekaamba yoomurumeyella Khrisitu Yesu, annuuvaha mooni.

²⁴ Nave Mariko, Aristariko, Dema ni Luka, oomurumeyella Khrisitu akhwaaka, ennuuvahattho mooni.

²⁵ Echisomo ya Apwiya Yesu Khrisitu ekhalle ni weyaano.