Ezekiele 9 - Mawu a Mulluku

Ollakiwa wa Yerusalemu

¹ Vano Apwiya yaakillotella owaruni mookhuwa wi, “Nyu oollaka muzindoolla, susellani vakhuviru. Arive muthu akuse echidaaye yawoonongella.”

² Vano kaawoona athu atthanu ni mmodda ephiyaka ovenyera o mullako woomwaako wa enyumba ya Mulluku, ompoto, arive muthu akusalle echidaaye yakhoto. Mwa alliwaayo vaakhalla muthu mmodda oowara bafuta akusalle yoolembella. Attheenaayo yahiimella vakhwipi va nikuwa namukoko.

³ Vano ntitimiho na Mulluku a Aisraele nahooneya ovenyera mwa akerubi* mmo nakhallelliiwa naphiya voovollowella va enyumba ya Mulluku. Apwiya yaamwiithana muthu oowara bafuta oyo akusalle yoolembella.

⁴ Yaamulleella wi, “Khawe o muzinda muttheene wa Yerusalemu, wahiye echizindikiro va eyuuchi ya arive muthu oyo aninlla ni wiipullella ekaamba ya onanariwa ni ddoonanara ddineereya wenko.”

⁵ Vatulli viwa kaamwiiwa Mulluku aalleellaka amoddaalle wi, “Muthwareni mu muzinda muttheene mwamwiiphe arive muthu. Muhinamumorella ethakaraka apaalle omweerella echifundo arive muthu.

⁶ Mwawiiphe attheene, awuulluvalla, asombwe, anamwalli, anamwani ni atthiyana. Koma muhinamuttannya oyo ari ni echizindikiro. Mwaambeelle o enyumbaaka.” Sika yahaamba owiipha attekweene va mullako wa enyumbeeyo.

⁷ Vano Apwiya yaallota wi, “Ripihani enyumbaaka nave ddallihani mathatwiiwa ni mitembo. Khaweni!” Sika yaayaawo yawiipha athu m'muzindanimmo.

⁸ Yawiiphiiwa miyaano kahanlle meekha. Vano kahiivokhella vatthi, kikhuwa wi, “Apwiya Mulluku, ethiyo mohaashella murima athu a o Yerusalemu, sika wi muneerowiipha attheene oohalla a o Yerusalemu?”

⁹ Mulluku ahaakhulla wi, “Ochimo wa Aisraele ni Yuda tti wuullupalli wunchichi. Ellapo yooddalla ni ddawiipha nave muzinda wooddalla ni ddoohilungama. Athu enallota wi, ‘Apwiya khenanoona! Apwiya aayihiya ellapweella!’ ”

¹⁰ Sika ngiweerella echifundo apaalle waamorella ethakaraka. Kineerewaallaka moollikana ni ddaweera ddiwa.

¹¹ Vano muthu oowara ddabafuta akusalle yoolembella ahaatthopoollella Apwiya wi, “Koheera nndde mwakilamulalleenyu.”