Ezekiele 8 - Mawu a Mulluku

Mafano mu enyumba ya Mulluku

¹ Nllapo naneetthanu na mweeri waneetthanu ni mmodda mu muyakha waneetthanu ni mmodda wa okaporo, kikeraatthille mpa mwaka ni attekweene a Ayuda, moorurumusa nnatta na Apwiya Mulluku naari va miyaano.

² Kiwehaka kahoona ello yawooneya wonanko muthu. Ovenyera muyuununi oya vatthi yaari wonanko munllo. Ovenyera muyuununi oya muddullu yaanawala wonanko mukoko woonyezimella.

³ Aattaphurusa ello yookhalla wonanko nnatta akipharana meehi va muru. Vaavo Munepa a Mulluku aakivaviha. Mookhalla wonanko kinamoona Mulluku m'masomphenya, akikusella o Yerusalemu akihiya va mullako woovollowella muwari, ompoto nko nifano noottatthamulla osha murima wa Mulluku.

⁴ Ntitimiho na Mulluku a Aisraele nahooneyella wenko moollikana ni mmo koonelleemi khalle m'masomphenya muntaponi mulle.

⁵ Vano Apwiya yaakilleella wi, “We mwaana a muthu, weha ompoto.” Kaaweha ompoto. Wenko kahoona nifano noottatthamulla osha murima wa Mulluku vakhuviru ni nikuwa na va mullako.

⁶ Apwiya yaakikoha wi, “We mwaana a muthu, ethiyo onnoona nndda ddineera Aisraele, ddoonanara dduullupalli eneeriiwa wuno, ddookivenyihamo mu nipuro naka? Vanothi oneerewoona ddoonanara dduullupalli okhwaranya ddenndda.”

⁷ Vatulli viwa aakikusella o mullako woovollowella o nthato na enyumba ya Mulluku. Kiwehille kahoona mulliha va esiri.

⁸ Vano aakilleella wi, “We mwaana a muthu, vollowa va esiri.” Kaavollowa nave kaaphwanya wonanko mullako.

⁹ Akilleella wi, “Vollowa woone ddoonanara dduullupalli nnddo athu eneeriiwa.”

¹⁰ Sika kaavollowa nave vasirinimvo kahoonavo ddoosema dda ddeko ddoohiyanahiyana ddawaapadda, enama ddooripihiwa navettho dda mafano mamodda mattheene ayo Aisraele yaallapelliiwa.

¹¹ Attekweene a Aisraele 70 yaari yiimenlle vaavo. Yazaniya, mwaana a Shafani aari vaavo. Arive muthu aakhalla ni yoothuwihella mwiisi wa lubani* m'mattani mwaye nave nthuko naphaama wa lubani naaniiweya.

¹² Vano Apwiya yaakikoha wi, “We mwaana a muthu, ethiyo onnoona nndda eneera attekweene a Aisraele mwiipiphinimmu? Arive muthu anallapella nifano na Asherimu. Anallota wi, ‘Apwiya khenanoona! Apwiya aayihiya ellapweella!’ ”

¹³ Apwiya yaakilleellattho wi, “Oneerowoonattho yeeraka ddoonanara ddimodda dduullupalli okhwaranya ddenndda.”

¹⁴ Vatulli viwa aakikusella o mullako wa ompoto wa enyumba ya Mulluku. Kiwehille kaawoona atthiyana ekeraatthille, emwinllellaka mullukwiiwa Tamuzi.

¹⁵ Apwiya yaallota wi, “We mwaana a muthu, ethiyo onnaddoona ddenndda? Oneerowoonattho ddoonanara ddimodda dduullupalli okhwaranya ddenndda.”

¹⁶ Vano aakikusella o nthato na muwari mwa enyumba ya Apwiya. Wenko, va mullako wa enyumba ya Apwiya, variyari va nikhote ni nikuwa vaakhalla allopwana 25. Yaareya etulli enyumba ya Mulluku, enaweha wookhuma nndduwa nave enallapella nndduwa.

¹⁷ Apwiya yaakikoha wi, “We mwaana a muthu, ethiyo onnaddoona ddenndda? Ayuda kheddinaakwakhwana ddoonanara eneeriiwanndda. Koma enavuwihattho ddakhoto mwiillaponi ettheene. Vano ennattatthamulla owallaaka, ennakishiha murima ni ddaweera ddiwa.”

¹⁸ Vano miyaano kineerewaallaka moosha murima, Ngaamorella ethakaraka nave ngiweerella echifundo. Naari yinlleke wa miyaano mookhuwa, ngiwaapella maaru.